ഐസുകാരൻ

ഐസുകാരൻ😊
_________________

ന്യൂ ജനറേഷൻ തലമുറയ്ക്ക് ഒരുപരിധി വരെ അന്യമായ ഒരു കാഴ്ചയാണ് സൈക്കിളിന് പിന്നിൽ വലിയ പെട്ടിയും വെച്ച് മണിയടിച്ചുകൊണ്ട് വരുന്ന ഐസുകാരൻ....എന്റെ ബാല്യ കാലത്ത്
ഒരു പക്ഷേ ഞങ്ങൾ കുട്ടികൾ ഐസുകാരൻ ചേട്ടനു വേണ്ടിയല്ലാതെ മറ്റാർക്കു വേണ്ടിയും കണ്ണിമവെട്ടാതെ കാത്തിരുന്നിട്ടുണ്ടാകില്ല.....

റോഡിൽ നിന്നും കുറച്ച് അകലെയാണെന്റെ വീട്.പതിനൊന്ന് അംഗങ്ങളുളള ഒരു വലിയ കുടുംബം.നല്ലച്ഛൻ(The Great Grandfather)
ആണ് ആ വലിയ കുടുംബത്തെ സ്വരുമയോടെ നയിക്കുന്നത്.

എനിക്ക് അന്ന് പതിമൂന്ന് വയസ്സ് പ്രായമുണ്ടാകും.എനിക്ക് ഒരു അനിയത്തിയും അനിയനും ഉണ്ട്.എന്നേക്കാൾ പത്ത് വയസ്സിന് ഇളയതാണ് എന്റെ അനിയൻ.കുസൃതി
നിറഞ്ഞ എന്നാൽ നിഷ്ക്കളങ്കമായ അവന്റെ മുഖം ഇന്നും സ്നേഹത്തോടെ ഞാൻ ഓർക്കുന്നു....

പതിവു പോലെ ഒരു അവധി ദിവസം ഞങ്ങൾകാത്തിരിക്കുകയാണ്...
ഞങ്ങൾക്ക് പ്രിയ്യപ്പെട്ട...,അമ്മയുടെ ഭാഷയിൽ തോട്ടിലെ അഴുക്കു വെളളം കൊണ്ട് മധുരമുളള ഐസുണ്ടാക്കുന്ന ഞങ്ങളുടെ ഹീറോയ്ക്ക് വേണ്ടി...അതാ കേൾക്കുന്നു ഞങ്ങൾ കാത്തിരുന്ന ശബ്ദം...ടിം...ടിം..

ഉമ്മറത്ത് പത്രം വായിച്ചിരുന്ന നല്ലച്ഛനോട്
പാവം എന്റെ അനിയൻ അപേക്ഷാ രീതിയിൽ ചോദിച്ചു...

നല്ലച്ഛാ...ഒരു ഐസ് വാങ്ങി തര്വോ?

എന്നത്തേയും പോലെ പതിവു മറുപടി...

"വേണ്ട..വേണ്ട...അതൊന്നും വാങ്ങിത്തിന്നാൻ കൊളളില്ല.കണ്ട അഴുക്കു വെളളത്തിലൊക്കെ ഉണ്ടാക്കുന്നതാ..."

എന്നിട്ട് ഞങ്ങൾക്ക് മാത്രം കേൾക്കാൻ ഉച്ചത്തിൽ ഐസുകാരനോട്....

"അവന്റെ ഒരു മണിയടി.വെറുതെ കുഞ്ഞുങ്ങളെ പറ്റിക്കാൻ..വേഗം പോടോ..
ഇവിടെക്കിടന്ന് ബഹളമുണ്ടാക്കാതെ..."

ഞാനും അനിയത്തിയും, ഉണ്ടായ വിഷമം ഉളളിലൊതുക്കി.പക്ഷേ,നിഷ്ക്കളങ്കനായ എന്റെ അനിയൻ എല്ലാവരും കേൾക്കേ ഉറക്കെ പ്രാർത്ഥിച്ചു....

"ദൈവമേ...അടുത്ത ജന്മത്തിൽ ആ ഐസുകാരനെ എന്റെ നല്ലച്ഛനാക്കണേ...."

പിന്നെ ചിരിയുടെ മണിനാദമായിരുന്നു വീട് നിറയെ.....

വീണ ബിനൂപ്.