വിശുദ്ധി

വിശുദ്ധ ഗ്രന്ഥങ്ങൾ,
വെറുതെ വിഴുങ്ങുന്നവർ
വിഡ്ഢികളാണവർ
വെറും വിഡ്ഢികൾ തന്നെ.

നേടിയിട്ടില്ലിവരൊരുനാളും,
വിശുദ്ധ വിജയവുമിവിടെ.

വിശുദ്ധ പുസ്തകങ്ങൾ,
വെറുതെ വിഴുങ്ങിയാൽ
ദഹിയ്ക്കാതെയതൊരു
ദഹനക്കേടായിത്തീരും.

ദഹനക്കേടിനാൽ വിഷം
ഛർദ്ദിച്ചീടും നാടുനീളെ
വർഗ്ഗീയ ഘോര വിഷം.

പടർന്നു പരന്നൊഴുകിയാ-
ഘോര വിഷം പിന്നെയും
പൊതുവിടങ്ങളൊക്കെയും
മാലിന്യമലീസമാക്കി
ദുർഗന്ധപൂരിതമാക്കി
കെടുതികളാൽ നിറയ്ക്കും.

വിശുദ്ധ വേദങ്ങളെ നിങ്ങൾ
വിവേകത്തിനുമിനീരിലലിയിച്ച്
ചവച്ചരച്ച് മെല്ലെ ഭുജിക്കേണം.

ദഹിച്ചീടുമത് നല്ല പോൽ
ദഹനക്കേടൊട്ടുമുണ്ടാക്കില്ല.

കരി വിഷമായ് പടർന്നു പരന്ന്
പൊതുവിടങ്ങളെയാകെയും
മലിന്യമലീസമാക്കി വെറുതെ
ദുർഗന്ധപൂരിതമാക്കിയത്
കെടുതികളാൽ തകർക്കില്ല.

കുറിയും,കാഷായവുമായി
ഗതിയില്ലാത്തവരായലഞ്ഞ്,
തിരിഞ്ഞഴുകി ജീർണ്ണിച്ചിടാതെ.

താടിയും, തലപ്പാവുമായി
കുറ്റവാളികളേപ്പോൽ കുഴിയിൽ
വീണടിഞ്ഞളിഞ്ഞു നാറാതെ.

കിരീടവും, ചെങ്കോലുമായി
ബോധമില്ലാത്തവരേപ്പോൽ
പുഴുത്തില്ലാതെയാകാതെ.

നഗ്ന സത്യങ്ങളെ കറുത്ത,
ചേലയാൽച്ചുറ്റി മറയ്ക്കുന്ന
അവിശുദ്ധ വേതാളങ്ങളെ
വേഗത്തിലാട്ടിപ്പായിക്കുക
മനസ്സകങ്ങളിൽ നിന്നുമുടനെ.

വിശുദ്ധ ഗ്രന്ഥങ്ങളെ വെറുതെ,
വിഴുങ്ങുന്ന ജന്മങ്ങളാകാതെ
വിശുദ്ധ ജന്മങ്ങളായിത്തീരാം
നമുക്കെല്ലാവർക്കുമിവിടെ.....

നാസർ
21/7/2017