ആ ഒരാൾ ആരാണാവോ?

നിഴലുംവെളിച്ചവും-
കലർന്ന തടവറ
നോവിന്റെ കനം പേറി -
യിരിപ്പാണയാൾ മൂകം

അസ്തമിക്കുവാനിനി -
യേതു സാഗരഗർത്തം
ഒറ്റുകാരനെപ്പോലെ -
യുറ്റുനോക്കുന്നൂ ചന്ദ്രൻ ...

കുറ്റവാളിയും ന്യായാ-
ധിപനും കരം കോർത്തു
സത്യത്തെയടച്ചിട്ട
സ്വപ്നത്തിൻ ജയിൽമുറി.

തെറ്റാത്ത ക്രമനമ്പർ,
കാവലായിടം വലം -
കാത്തു രക്ഷിക്കാൻ കാലം
(ശിക്ഷ തീരുവാൻ വേണ്ടി! )

ആയിരം സൂര്യന്മാർ വ -
ന്നൊന്നിച്ചു വലിച്ചാലും
നീങ്ങുകില്ലരയിഞ്ചും
പിന്നെയത്തമോയാനം

മുറ്റിയ നേരം പൊള്ളി -
യറ്റു വീഴുമ്പോൾ, കൂടെ -
ത്തോറ്റു ചെല്ലുവാൻ സൂചി -
യാരുടെ നേർക്കാണാവോ?

ശ്രീനിവാസൻ തൂണേരി