മയൂരനടനങ്ങൾക്കൊടുവിൽ

മയൂരനടനങ്ങൾക്കൊടുവിൽ
*******************************

മഴമേഘങ്ങൾ തിരികൊളുത്തിയ ആനന്ദ-
ഭാവങ്ങൾ വിരിഞ്ഞിറങ്ങും നയനങ്ങൾ.

ചിലങ്ക കെട്ടാത്ത ലാസ്യനടന-
മുയിർകൊള്ളും ചേലൊത്ത പാദങ്ങൾ.

മഴവിൽ ചന്തമണിഞ്ഞിറങ്ങുന്ന വെഞ്ചാമരങ്ങൾ
വിറ കൊള്ളിക്കും കാറ്റിന്റെ സ്പന്ദനങ്ങൾ.

പൂവുടൽ ഉലയുകയായ്
മേഘ തപസ്സ് ഭംഗം വരികയായ്.

മറ്റൊരു മോഹിനി, മയൂരമായ് ആടവേ
തുറന്ന കണ്ണുകളവളെ കാണവേ
ആർത്തലച്ചെത്തുകയായ്
മുടിയഴിച്ചിട്ട സന്യാസി മേഘങ്ങൾ.

വിടർന്ന പീലികൾ ഒതുക്കി
രോമഹർഷയായ് മിഴി കൂമ്പി
ചുംബനം ഏറ്റുവാങ്ങയായ് മയൂരം.

ആടിത്തളർന്നൊടുവിൽ പിരിയവേ
മുടിയറുത്ത് കാഷായ-
മഴിച്ചു വെക്കുന്നു മേഘങ്ങൾ.

പ്രണയ നയനയായ് പിന്നെയും പിന്നെയും തപസ്സിളക്കുന്നു മയൂര നടനം.
കോൾമയിർകൊണ്ട് ഉന്മാദനൃത്തം ചവിട്ടുന്ന
മേഘകേശങ്ങൾ തേടിയെത്തുകയായ് അവളെ.
*****
Ritu