മിസ്ഡ് കോൾ

മിസ്ഡ് കോൾ
_______________

അവരുടെ പ്രണയത്തിനു വഴിവച്ചതു ഒരു മിസ്സ് കോളായിരുന്നു. ഒന്ന് രണ്ട് കൊച്ചുവർത്താനങ്ങളൊക്കെ പറഞ്ഞവർ അടുത്തു. അവൾ ചെന്നൈയിൽ എജിനിയറിങ് പഠിക്കുകയാണ്. അയാൾ എജിനിയറിങ് ഒക്കെ കഴിഞ്ഞു ഇപ്പോ പതിനയ്യായിരം രൂപ മാസ ശബളത്തിൽ ജോലി ചെയ്യുന്നു. അങ്ങനെ പ്രേമിച്ചു രണ്ടു വർഷമായി. അതുവരെ നേരിൽ കണ്ടിട്ടില്ല. അവസരമെല്ലാം ഒത്തു ചേര്‍ന്നപ്പോൾ അയാള്‍ അവളെ കാണാൻ അങ്ങു ചെന്നൈയിലേക്ക് വണ്ടി കയറി.

നേരിട്ടങ്ങനെ കണ്ടു. അയാൾ വെളുത്തു മെലിഞ്ഞിട്ടാണ്. അവൾ കറുത്തു തടിച്ചിട്ടും. എന്തായാലും അവൾക്കാണ് ഭംഗി കൂടുതൽ. കണ്ടപാടെ ഒരു താലി അങ്ങ് കെട്ടി അയാള്‍. പിന്നെ ബാക്കി പറയണ്ടല്ലോ? എല്ലാത്തിനും ലൈസൻസായി. പക്ഷേ പെട്ടെന്ന് അവൾ ഗർഭിണിയായപ്പോഴാണ് അവർ പെട്ട് പോയത്. അതുകാരണം അയാളുടെ വീട്ടുകാർ കല്യാണം നടത്തി കൊടുത്തു . വീട്ടിലെത്തിയപ്പോഴാണ് അവിടുത്തെ അവസ്ഥ അവൾക്ക് മനസിലായത്. അയാൾക്ക് ജോലിയൊന്നും ഇല്ല. എന്തിനേറെ പറയുന്നു, ആവശ്യത്തിനുള്ള വിദ്യഭ്യാസം പോലുമില്ല. അച്ഛന്റെയും അനിയന്റെയും ചിലവിലാണ് കഴിയുന്നത്. ഭയങ്കര കഷ്ടപ്പാട്. താമസിക്കുന്നത് വാടകവീട്ടിൽ, ഒരു മുറിയും അടുക്കളയും മാത്രം.

അവൾ ഇടത്തരം കുടുംബത്തിലാണ് ജനിച്ചത്. നല്ല ഒരു ജീവിതം സ്വപ്നം കണ്ട് ഒളിച്ചോടിയതാണ്. അച്ഛൻ മാനസികരോഗിയാണ്. പാവം അമ്മ. എല്ലാവരുടേയും നിർബന്ധപ്രകാരം അവളെ പടിയടച്ചു പിണ്ഠം വച്ചു. പറഞ്ഞിട്ടെന്താ കാര്യം ! വരാനുള്ളത് വഴിയിൽ തങ്ങില്ല. അയാളത്ര നല്ലവനൊന്നുമല്ല കേട്ടോ! അയാളുടെ മൂന്നാമത്തെ പ്രണയമാണ് ഇത്. കൂടാതെ സുഖമില്ലാതെ കിടക്കുന്ന സ്വന്തം അമ്മയെ പോലും നോക്കാത്തവനാണു ഈ കക്ഷി. പിന്നെ അവളോടുളള അഗാധ പ്രണയമൊന്നുമല്ല ഇതുവരെ കാര്യങ്ങൾ എത്തിച്ചത്, മുപ്പതു വയസായ തനിക്ക് ഇനി പെണ്ണ് കിട്ടുമോന്നുള്ള പേടിയാണ്.

ഏറ്റവും വലിയ രസം ഇതൊന്നുമല്ല. ഇതൊക്കെ വായിക്കുമ്പോൾ നിങ്ങൾ കരുതും അവൾ നല്ലവളാണെന്ന്. പക്ഷേ അത് വെറുമൊരു തെറ്റിധാരണ മാത്രമാണ്. അയാൾ അവളുടെ നാലാമത്തെ പ്രണയമാണ്. ഒരാൾക്ക് ഒന്നിൽ കൂടുതൽ പ്രണയമുണ്ടാകുന്നത് തെറ്റാണോ എന്ന് എനിക്കറിയില്ല. എന്നാൽ ഒരു സമയം ഒന്നിൽ കൂടുതൽ ആളുകളെ പ്രണയിക്കുന്നത് തെറ്റുതന്നെയാണ്. അവളുടെ ബലഹീനത അതായിരുന്നു. തമ്മിൽ ഭേദം തൊമ്മൻ എന്നു പറഞ്ഞ് തിരഞ്ഞെടുത്തതാണ് അയാളെ. അതിപ്പോ ഒടുവിൽ ഇങ്ങനെയും ആയി.

ആരോട് പറയാന് ആര് കേക്കാനാണ്.......

~ ചാരു