എന്നെ തിരയുന്ന ഞാൻ

ഈ രാവിൽ നിദ്രയോട് കലഹിച്ച്
ഞാൻ എന്നിലെ എന്നെ
തേടുകയായിരുന്നു

ഒരു നിഴലായ് കൂടെ നടന്നവർ
മറുപാതിയായ് കൂടെ കഴിഞ്ഞവർ
അറിയാത്തൊരു ഞാനുണ്ടോ
എന്ന് തേടുകയായിരുന്നു

വിചാരങ്ങൾ വിചാരണയ്ക്ക്
വിധേയമായ വേളയിൽ
വികാരങ്ങളുടെ വേലിയേറ്റങ്ങൾ
വിഷാദ വിഷമുള്ളിൽ നിറച്ചീടവേ

ഭയമെന്നിൽ ഫണമുയർത്തി
നിരാശയുടെ ഗർത്തങ്ങളിൽ
ഞാൻ വീണിടവേ
കത്തിപ്പടർന്ന പ്രതികാര ജ്വാലയിൽ

എരിഞ്ഞടങ്ങിടാൻ വിധിക്കപ്പെട്ടവളെന്നു
ചുറ്റുമുള്ളവർ തൻ ശാപതീമഴയിൽ
ഞാൻ പിടഞ്ഞിടുമ്പോൾ
ഏതോ അജ്ഞാത കോണിൽ നിന്നും

ഒരു കുടയായെന്നെ രക്ഷിച്ചിടാൻ
അണഞ്ഞിടും
വർണ്ണ വിസ്മയങ്ങളേ...
മാറോടു ചേർക്കുന്നു നിങ്ങളെ സാദരം.....

അന്ന ഷാജി