സമത്വം

സമത്വം വേണം...ആർക്ക്..ഞങ്ങൾ സ്ത്രീകൾക്ക്..ആർക്കൊപ്പം ..എന്തിന്..

പുരുഷന്മാർക്കൊപ്പം..വീട്ടിൽ, ജോലിയിൽ, സമൂഹത്തിൽ ആൺപെൺ വ്യത്യാസം ഇല്ലാതെ കഴിയാൻ സമത്വം വേണം..

ഇത് കുറെ ആയി കേൾക്കുന്നു..ഈ സമത്വം ഏതെങ്കിലും കടയിൽ കിട്ടുമോ? അതോ ആരെങ്കിലും ഒളിപ്പിച്ചോ കൈയടക്കിയോ വെച്ചേക്കുവാണോ?

ഞാൻ ഒന്ന് അന്വേഷിച്ചു..സമത്വം എവിടെ പോയി എന്നും ആര് കൊണ്ടുപോയി എന്നും..വീടുകളിലൂടെ, ബാല്യത്തിലൂടെ ഒന്ന് കയറി ഇറങ്ങി..

ജനിച്ചപ്പോൾ ,നോക്കടാ ,പെൺകുഞ്ഞ, നിന്റെ അടിച്ചു പൊളി ഒക്കെ നിർത്തി കുറേക്കൂടി ഉത്തരവാദിത്തം ഒക്കെ ആയിക്കോ..പതിനെട്ട് വര്ഷം കഴിഞ്ഞാൽ കെട്ടിക്കാൻ ഉള്ളതാണെന്ന് അച്ഛനോട് അച്ഛമ്മ പറഞ്ഞത് കേട്ടു.. അനിയൻ ഉണ്ടായപ്പോൾ ആ, ആൺകുട്ടിയ, ഇനി വയസ്സ് ആകുമ്പോ നോക്കാൻ ആളില്ലെന്ന പേടി വേണ്ടെന്ന് പറഞ്ഞതും അച്ഛമ്മ ആണ്..

പെൺകുട്ടി ആണെങ്കിൽ പിങ്ക് ഡ്രസ്സ് വേണമെന്നും ആൺകുട്ടി ആണെങ്കിൽ ബ്ലൂ ഡ്രസ്സ് വേണമെന്നും പാപ്പയോട് മമ്മി പറയുന്നത് മമ്മിയുടെ വയറ്റിൽ കിടന്നാണ് കേട്ടത്..കളിപ്പാട്ടങ്ങൾ ഉണ്ടായിട്ട് വാങ്ങാം, മോൾ ആണെങ്കിൽ പാവകളും മോൻ ആണെങ്കിൽ വണ്ടികളും വാങ്ങാം എന്നും പറഞ്ഞു..

മദ്രസയിൽ പോയപ്പോൾ അടുത്ത വീട്ടിലെ കൂട്ടുകാരന്റെ കൂടെ ഒരു ബെഞ്ചിൽ ഇരുന്നതിന്, ഉസ്താദല്ല, ഉമ്മിയ വഴക്കു പറഞ്ഞത്..

പെൺകുട്ടികളോട് കൂട്ട് കൂടിയാൽ മതിയെന്ന് ഉമ്മച്ചിയും, അമ്മയും ഒക്കെ പറഞ്ഞെന്നു കൂട്ടുകാരും പറഞ്ഞു.

മരത്തിൽ കയറിയത്തിനു അടി കിട്ടിയത് ചിറ്റയുടെ കൈയിൽ നിന്നാണ്..പെൺകുട്ടികൾ അടങ്ങി ഒതുങ്ങി ഇരിക്കണം, ചാടി തുള്ളി നടക്കരുത് എന്ന് പറഞ്ഞത് അമ്മായി ആണ്. .

ബാപ്പച്ചി സൈക്കിൾ വാങ്ങി തരാം എന്ന് പറഞ്ഞപ്പോൾ ആ പൈസക്ക് ഓള്ക്ക് ഒരു തയ്യൽ മെഷീൻ വാങ്ങി കൊടുക്ക്, അതാകുമ്പോ പുരയ്ക്കകത്ത്‌ ഒതുങ്ങി ഇരുന്നോളും എന്ന് പറഞ്ഞത് വല്ലുമ്മ ആണ്..

പത്തു വയസ്സായപ്പോൾ ,ഇനി തൊട്ട് മുറ്റം അടിയും, തുണി അലക്കും ,പാത്രം കഴുകലും ഒക്കെ തന്നെ ചെയ്തു പഠിക്കാൻ പറഞ്ഞ മമ്മി, എന്നേക്കാൾ നാല് വയസ്സ് മൂത്ത ചേട്ടായിയെ കൊണ്ട് ഒന്നും ചെയ്യിക്കുന്നില്ലാരുന്നു..

അടുക്കള പണി ചെയ്തു പഠിക്കാൻ പറഞ്ഞ മുത്തശ്ശി തന്നെ ആണ് പീരിയ്ഡ്സ് ആകുന്ന സമയത്ത് അടുക്കളയിൽ കയറേണ്ട എന്ന് വിലക്കിയത്.

മെറിറ്റ് ലിസ്റ്റിൽ എൻജിനീയറിംഗ് കോളേജിൽ പോകാൻ നേരം ,രണ്ടു കൊല്ലം കഴിഞ്ഞാൽ കെട്ടിച്ചു വിടാൻ ഉള്ളതാ, വല്ല ഡിഗ്രിക്കും വിട്ടാൽ പോരെ എന്ന് ബാപ്പച്ചിയോട് ചോദിച്ചത് ഉമ്മിയാണ്.. സീറ്റിനു പണം നൽകി ഇക്കയെ കോളേജിൽ ചേർക്കാൻ ഉമ്മിയാണ് ബാപ്പച്ചിയെ നിർബന്ധിച്ചതും..

പ്രണയത്തിൽ പെട്ടത്തിനു കോളേജിൽ പോകേണ്ട എന്ന് പറഞ്ഞ അമ്മ, ഏട്ടന്റെ പ്രേമം അറിഞ്ഞപ്പോൾ ആൺകുട്ടികൾ ആയാൽ ഈ പ്രായത്തിൽ അങ്ങിനെ ഒക്കെ ഉണ്ടാകും എന്ന് പറയുന്ന കേട്ടു..

ക്രിക്കറ്റ് ടീമിൽ സെലക്ഷൻ കിട്ടിയപ്പോൾ വിടാത്തത് അമ്മ, കോളേജിൽ ഇലക്ഷനു നില്ക്കാൻ സമ്മതിക്കാത്തത് ഉമ്മച്ചി, റോഡിൽ ശല്യം ചെയ്തവനെതിരെ പരാതി കൊടുക്കാൻ സമ്മതിക്കാത്ത മമ്മി..

പെണ്ണായാൽ അത് പാടില്ല, ഇത് അരുത്, അങ്ങിനെ ചെയ്യരുത്, അരുതുകൾ ഏറെ കേൾക്കണം..വിലക്കുകൾ ഏറെ താണ്ടണം.. പക്ഷെ ,വിലക്കുകളും അരുതുകളും ,അസമത്വവും എല്ലാം എന്നോ ആരിൽ നിന്നോ കൈമാറി വന്നവയാണ്..എന്തിനെന്ന് പോലും അറിയാതെ..കൈമാറുന്നത് ഏറെയും സ്ത്രീകൾ തന്നെ..

ജനിച്ചു വീഴുമ്പോൾ ഇടുന്ന ഡ്രസ്സിൽ തുടങ്ങുന്ന, കളിപ്പാട്ടങ്ങളിലൂടെ വളരുന്ന, വീട്ടുജോലികളിലും കളികളിലും, കലകളിലും , തുടരുന്ന, നമ്മൾ സ്ത്രീകൾ തന്നെ ചൊല്ലി കൊടുത്തു വളർത്തി വലുതാക്കുന്ന അസമത്വം..നമ്മുടെ കാൽകീഴിൽ ഉണ്ടായിരുന്നു, ഉണ്ട് സമത്വം എന്ന രത്നം..കാണുന്നില്ല, കണ്ടിട്ടും കാണാതെ വീണ്ടും പഴയ ചട്ടക്കൂട് എടുത്ത് ധരിക്കുന്നു..അടുത്ത തലമുറയ്ക്ക് നൽകുന്നു..

പതിനെട്ട് വയസ്സുള്ള പുത്രന്റെ അടിവസ്ത്രം അലക്കുന്ന അമ്മമാർ ,പന്ത്രണ്ട് വയസ്സുള്ള മകളുടെ ഒരു വസ്ത്രവും അലക്കുന്നില്ല..അതിനർത്ഥം മകളുടെ അലക്കണം എന്നല്ല, മകന്റെ കഴുകാതെ, അവനെ പഠിപ്പിക്കണം..നമ്മൾ വീട്ടിലെ സ്ത്രീകൾ വളർത്തി എടുക്കുന്ന ഈ പുരുഷ മേധാവിത്വം
ആണ് സമത്വം ഇല്ലാതെ ആക്കിയത്..സ്വന്തം മക്കളെ ആരോഗ്യപരമായി ആൺപെൺ വേർതിരിവ് കാണിക്കാതെ വളർത്തിയാൽ അതാകും അവരോടു ചെയ്യുന്ന നന്മ..സ്വന്തം കാര്യങ്ങൾ സ്വയം ചെയ്യാൻ ഉള്ള അവകാശം ആണ്മക്കളിൽ നിന്നും തട്ടിയെടുക്കുമ്പോൾ അവരിലും നമ്മൾ സമത്വം നിഷേധിക്കുകയല്ലേ..

ഈ എഴുതിയതിന്‌ അർഥം, പെൺകുട്ടികളെ ആശ്രദ്ധയോടെ വളർത്തണം എന്നല്ല.. കൂട്ടിലടച്ചല്ല സുരക്ഷയും മര്യാദയും പഠിപ്പിക്കേണ്ടത്..പറത്തി വിട്ടിട്ട് അതിരുകൾ കാണിച്ചു കൊടുത്തിട്ട് ആകണം..

SajnaNishad,