ഒരു സന്ധ്യ....
നാട്ടില് പടര്ന്നു പിടിച്ച പനി അയാള്ക്കും പകര്ന്നു കിട്ടിയിരുന്നു.
പിഞ്ഞാണില് വിളമ്പിയ പൊടിയരി കഞ്ഞിയും കനലില് ചുട്ട പപ്പടവും മുന്നില് വച്ചു അയാള് വിശപ്പില്ലാത്തവനെപോലെ ഇരുന്നു.
തെരുവില് ഒരു ബഹളം..
ആക്രോശങ്ങള്...
അട്ടഹാസങ്ങള്....
നിലവിളി...
കിളിവാതില് തുറന്നു താഴേക്ക് നോക്കുമ്പോള് വഴിവക്കില് നേരമ്പോക്കില് ഏര്പ്പെട്ടിരുന്ന ഒരു സംഘം ചെറുപ്പക്കാര് ചേര്ന്ന് ഒരാളെ അടിച്ചു നിലത്തിട്ടിരിക്കുന്നു.
മുണ്ടു മാടി കുത്തി ആയാസപ്പെട്ട് കോണിപ്പടികള് ഇറങ്ങി താഴേക്ക് ചെല്ലുമ്പോള് ഭവാനി അക്കനും മുസലിയാരുടെ മില്ലിലെ പുതിയ അറപ്പുകാരന് ഇത്താക്കും കൂടി നിലത്തു വീണുകിടക്കുന ആളെ പിടിച്ചു എഴുന്നെല്പ്പിക്കുകയാണ്.
രംഗം ഏറക്കുറെ ശാന്തം.
ചെറുപ്പക്കാര് അപരിചിതനെ നന്നായി ദേഹോപദ്രവം ഏല്പ്പിച്ചിരിക്കുന്നു. കൂടെ ഉണ്ടായിരുന്ന പെണ്കുട്ടി ഭയന്ന് വിറച്ചു നില്ക്കുകയാണ്.
അക്രമികള് ഓടിക്കൂടിയ കാഴ്ചക്കാരുടെ നേരെ കണ്ണുരുട്ടി മുറുമുറുക്കുന്നുണ്ട്.
പെണ്കുട്ടിയെ പിന്നിലിരുത്തി, തോട്ടുരുമ്മാതെ, നേര്ക്കുനേര് നോക്കാതെ, നിശബ്ദനായ് ബൈക്ക് ഓടിച്ചു അപരിചിതന് എങ്ങോ മറഞ്ഞു.
പനിച്ചൂടില് ശാപവാക്കുകള് ഉരുവിട്ട് അയാള് തന്റെ ഒറ്റമുറി സാമ്രാജ്യത്തിന്റെ കോണിപ്പടികള് കയറി.
**************************
"ആര്ക്കാടാ ഏമാന്റെ മേത്ത് കൈവക്കാന് പൂതി?"
പുലര്ച്ചെ ഒരലര്ച്ച കേട്ടാണ് അയാള് ഉറക്കമുണര്ന്നത്.
കിളിവാതില് പകുതി തുറന്നു താഴേക്ക് നോക്കി.
ഹെഡ് കോണ്സ്റ്റബിള് മിന്നല് വിക്രമന്! കുറെ പോലീസുകാരും.
ഭവാനി അക്കന്റെ ചായപീടികയില് നിന്ന് ആരെയൊക്കെയോ പിടിച്ചിറക്കി ഭേദ്യം ചെയ്യുകയാണ്.
തെരുവില് കണ്ട അപരിചിതന് പോലീസ് വേഷത്തില് ജീപ്പില് ഇരിക്കുന്നു... സ്ഥലം മാറി വന്ന അവിടുത്തെ പുതിയ സബ് ഇന്സ്പെക്ടറാണത്രെ..
അയാള് കിളിവാതിലിന് പിന്നില് കാതോര്ത്തു.
.........സഹോദരിയുമൊത്ത് മാടമ്പിലെ കുറുപ്പിന്റെ ഒഴിഞ്ഞു കിടക്കുന്ന വാടകവീട് പറഞ്ഞുറപ്പിച്ചു തിരികെ വരുമ്പോഴാണ്....
"ഭഗവതീ.............."
അയാളില് നിന്ന് ഒരു നിലവിളി ഉയര്ന്നു.
ആരെയൊക്കെയോ പിടികൂടി ജീപ്പില് കയറ്റി പോലീസുകാര് പാഞ്ഞുപോയി. .
തെരുവില് കനത്ത നിശബ്ദത...
ഒരു വിപ്ലവത്തിന്റെ അന്ത്യം...
(ചിത്രത്തിനു കടപ്പാട്)
© 2017 NELSON PHILIP
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക