സംശയം

സംശയം ഒരു രോഗലക്ഷണമാണ് .അത് എനിക്കറിയാം എങ്കിലും സംശയക്കാതിരിക്കാൻ ആവില്ല ...
പുരാതനകാലം മുതൽക്ക് സംശയം രോഗമായി തന്നെ ഭാര്യാഭർത്തക്കന്മാരുടെ കൂടെ ഉണ്ടായിരുന്നു .രാവണന്റെ കാരാഗൃഹത്തിൽ നിന്ന് മോചിപ്പിച്ച് കൊണ്ട് വന്ന സീത ദേവിയെപ്പോലും, ദൈവത്തിന്റെ അവതാരപുരുഷനായാ ശ്രീരാമന് സംശയിക്കാമെങ്കിൽ,സാധാരണക്കാരനായ എനിക്കാണോ ഭാര്യയെ സംശയിക്കാൻ പറ്റാത്തത്. രാമന്റെ കാലത്ത് ഫെയിസ്ബുക്ക്, വാട്സപ്പ് ഒന്നും ഇല്ലാതിരുന്നിട്ടും രാമൻ സീതയെ സംശയിച്ചു .ഇന്നത്തെ അവസ്ഥ അതാണോ. ഫെയിസ് ബുക്ക് കണ്ട് പിടിച്ചവനെ കൈയിൽ കിട്ടിയാൽ തല്ലി കൊല്ലണം എന്ന് എനിക്ക് തോന്നി.......

ഏതു സമയത്തും ഭാര്യ മൊബൈലിൽ
കുത്തി കൊണ്ടിരിക്കും .
ചോദിച്ചാൽ പറയും,

" നിങ്ങൾക്ക് എന്താ മനുഷ്യാ ഭ്രാന്തുണ്ടോ?
ഞാൻ കഥയെഴുതുകയാണ് "

അവൾ ആരാണ് ? കഥയെഴുതാൻ .മുട്ടത്ത് വർക്കിയോ.ഭാര്യയില്ലാത്ത സമയത്ത്
മൊബൈൽ എടുത്ത് നോക്കും. ഒന്നും മനസിലാവില്ല മൊത്തം
ഇംഗ്ലിഷിലായിരിക്കും .മറ്റുള്ളവരുമായുള്ള സംഭാക്ഷണം .അന്ന് സുഹൃത്തുക്കൾ പറഞ്ഞതാണ് എട്ടാം ക്ലാസ് വരെ പഠിച്ച
നിനക്ക് Bടc പാസായ പെണ്ണിന് വേണ്ടയെന്ന്. പക്ഷേ അന്നു ഞാനത് കേട്ടില്ല . അവർക്ക് എന്നോട് അസൂയായിരിക്കും എന്നുകരുതി.
അത് തെറ്റായി പോയെന്ന് കാലം എന്നെ ഓർമ്മപെടുത്തി....

വല്ല നാട്ടിൻപുറത്തുകാരി
രമണിയോ, ഗിരിജയോ ,മതിയായിരുന്നു .
വീട്ടുകാരുടെ കാശിനോടുള്ള ആർത്തി കാരണം, നഗരത്തിൽ നിന്ന് കെട്ടിയതാണ്.
കക്ഷം കാണിച്ച് ബ്ലൗസ് ഇട്ട് നടക്കുന്ന പരിഷ്കാരി പെണ്ണിനെ ,അത് ഇപ്പോൾ പൊല്ലാപ്പായി .

ജോലിക്ക് പോയാൽ സമാധാനമുണ്ടോ?
കുറച്ച് മോഡനായി നടക്കുന്ന പെണ്ണുങ്ങളെ കാണുമ്പോൾ. കുടെ പണിയെടുക്കുന്ന കിളവൻ മാർക്ക് സൂക്കേട് തുടങ്ങും.....

" ദേ ആറ്റം ചരക്ക് ഒരെണ്ണം പോകുന്നു. പോക്ക് കേസാന്നാ തോന്നുന്നു? "

ചൂട് താങ്ങാനാവാതെയാണ് പെണ്ണുങ്ങൾ. ബ്ലൗസിൽ വാതിലും ജനാലയും മറ്റും പണിയുന്നത്, കാറ്റ് കേറിക്കോട്ടെ എന്ന് കരുതി കാണും. അല്ലാതെ ആളുകൾ വിജാരിക്കുന്നതുപ്പോലെ, ആരെയെങ്കിലും കാണിക്കാൻ വേണ്ടിയായിരുന്നില്ല ,എന്ന സത്യം എനിക്ക് അറിയാം പക്ഷേ ആ വിവരദോഷികൾക്ക് മനസിലാവില്ലാലോ....

പറഞ്ഞ് വന്ന കാര്യത്തിൽ നിന്ന് ഞാൻ, വ്യതിചലിച്ചു എന്ന് തോന്നുന്നു.

ഭാര്യയുമായി യാത്ര പോയാൽ .അവളെ നോക്കുന്ന കണ്ണുകൾ മൊത്തം കാമുകൻമാരാണെന്ന് തെറ്റ് ധരിച്ച് അവളോട് വഴക്ക് കൂടി . തെളിവ് ഇല്ലാതെ ആരെയും കുറ്റപ്പെടുത്താൻ പറ്റില്ലാലോ? ഫെയിസ് ബുക്കിന്റെ ആഴങ്ങളിൽ ചിലപ്പോൾ അവൻ ഒളിച്ചിരിക്കുകയായിരിക്കും.
ആ തിരിച്ചറിവ് എന്നെ മുഖപുസ്തകം ഉണ്ടാക്കാൻ നിർബന്ധിതനാക്കി....

സുഹൃത്തുക്കളുടെ സഹായത്തോട് ഫെയിസ് ബുക്ക് ഉണ്ടാക്കി .അങ്ങനെ കുറെ സുഹൃത്തുക്കളെയും ആഡ് ചെയ്തു. അതൊടെപ്പം ഭാര്യക്കും റിക്വസ്റ്റ് കൊടുത്തു .എന്റെ ഉദ്ദേശം എന്താണെന്ന് അറിയാതെ അവളും ആക്സപ്റ്റ് ചെയ്തു.ഭാര്യയുടെ ഫോട്ടോക്ക് താഴെ എതോ ഒരു ഞരമ്പ് രോഗി കമന്റ് ഇട്ടിരുന്നു. '
നീ സുന്ദരിയാണ് ട്ടോ ' അതു കണ്ട് എന്റെ സമനിലതെറ്റി.
അവന്റെ ഇൻബോക്സിൽ നല്ല പച്ചതെറി അയച്ചു വിട്ടു .അതു വായിച്ചവൻ എന്റെ ഭാര്യയെ ബ്ലോക്ക് ചെയ്തു ,അത് അറിഞ്ഞ ഭാര്യ ദേഷ്യം കൊണ്ട് എന്നെയും ബ്ലോക്ക് ചെയ്തു. കുറച്ച് ദിവസങ്ങൾ കഴിഞ്ഞപ്പോൾ എതോ ഒരു സ്ത്രീയുടെ നഗ്നഫോട്ടോ ഞാൻ 'അറിയാതെ 'ഷെയർ ചെയ്തു .ആരോ റിപ്പോർട്ട് ചെയ്തു എന്ന കാരണം പറഞ്ഞ് ,ഫേയിസ് ബുക്കിന്റെ മുതലാളി എന്നെ ബ്ലോക്ക് ചെയ്തു. ചിലപ്പോൾ ഭാര്യയായിരിക്കും റിപ്പോർട്ട് ചെയ്തത്. ഇനി ഫേയിസ് ബുക്കിന്റെ ഉടമസ്ഥാനാണോ ?അവളുടെ കാമുകൻ .ആവാനും സാധ്യതയുണ്ട് ഇത്രയൊക്കെ കാര്യങ്ങൾ പോരെ .ഒരു ഭർത്താവിന് ഭാര്യയെ സംശയിക്കാൻ.......

ഭാര്യ ഭ്രാന്തനെന്ന് വിളിച്ചപ്പോൾ ,പിന്നെ അതായി എന്റെ സംശയം .കണ്ണാടിയിൽ ചെന്ന് നോക്കി . അതെ ശരിക്കും ഭ്രാന്ത് തന്നെ ,പിന്നെ അമാന്തിച്ചില്ല നാട്ടിലെ അറിയപ്പെടുന്ന ഭ്രാന്തിന്റെ ഡോക്ടറെ കാണാൻ ചെന്നു ....

എന്റെ നൊമ്പരക്കഥ കേട്ടിരുന്ന ഡോക്ടർ
പറഞ്ഞു.

" സംശയം ഒരു രോഗമാണ് ?തുടക്കത്തിലെ ചികിത്സിച്ചില്ലെങ്കിൽ വലിയ അപകടത്തിൽ ചെന്ന് ചാടും. "

മനുഷ്യമനസുകളുടെ ആഴങ്ങളിൽ സഞ്ചരിച്ച ഡോക്ടർ, കുറെ ഉപദേശങ്ങൾ തന്നു .അനുസരണയുള്ള കുട്ടിയെപ്പോലെ എല്ലാം ഞാൻ കേട്ടിരുന്നു.

ഉപദേശികൾക്ക്‌ പ്രയോഗിക പരിജ്ഞാനം അവശ്യമില്ല നല്ല അവതരണ മേന്മയും
സാന്ദ്രമധുരമായ സംഗിതം പോലെയുള്ള
ശബ്ദവും ഉണ്ടായിരുന്നാൽ മതി.

ഉപദേശങ്ങൾ കേൾക്കാൻ മാത്രം ഉള്ളവയാണ് ,പ്രയോഗികമാക്കാൻ നിർബന്ധിക്കരുത്. എന്റെ മനസ്സിലിരുന്ന് ആരോ ഉപദേശിച്ചു കൊണ്ടിരുന്നു...

ഡോക്ടറുടെ വീടിന്റെ ഒരു മുറിയാണ് ക്ലനിക്കായി ഉപയോഗിച്ചിരുന്നത്. അപ്പുറത്ത് മുറിയിൽ ഫോൺ ശബ്ദിച്ചപ്പോൾ ഡോക്ടർ എന്നോട് മിണ്ടരുത് എന്ന് ആംഗ്യം കാണിച്ചു. കള്ളനെപ്പോലെ പതുങ്ങി അടുത്ത മുറിയിലേയ്ക്ക് കയറി പോകുന്ന, ഡോക്ടറെ ഞാൻ നോക്കി കൊണ്ടിരുന്നു....

കുറച്ചു നിമിക്ഷങ്ങൾ കഴിഞ്ഞപ്പോൾ.
ആ മുറിയിൽ നിന്ന് ഒച്ചയും ,ബഹളവും
കേൾക്കാൻ തുടങ്ങി. ഞാൻ പതിയെ നടന്ന് മുറിയുടെ വാതിക്കലിൽ ചെന്ന് അകത്തേക്ക് നോക്കി .സ്ംതഭിച്ചു നിന്നു.

ഡോക്ടർ ഒരു സുന്ദരിയായ സ്ത്രീയുടെ
കഴുത്തിൽ കുത്തി പിടിച്ച് കൊണ്ട് ചോദിക്കുന്നു.

" സത്യം പറഞ്ഞോ,നിന്റെ കാമുകൻ അല്ലേ വിളിച്ചത് ?"

ആ സ്ത്രീ ബലം പിടിച്ച് ഡോക്ടറുടെ
കൈയെടുത്ത് മാറ്റാൻ ശ്രമിക്കുന്നതിനിടക്ക് പറഞ്ഞു.

" നിങ്ങൾക്ക് എന്താ മനുഷ്യ ഭ്രാന്തുണ്ടോ ?"

അത് കേട്ട് ഞാൻ കണ്ണ് മിഴിച്ച് നിന്നു..

കാര്യം എനിക്ക് വെളിവായി തുടങ്ങി. അവിടെയും സംശയം തന്നെ ഡോക്ടർക്ക്, ഭാര്യയോട്‌ സംശയം നല്ലതു തന്നെ പക്ഷേ ആ സംശയം എന്നിലേക്ക് നീളുകയായിരുന്നു .......

"സംശയരോഗമാവുമായി വന്നിരിക്കുന്നത്
നിന്റെ കാമുകൻ അല്ലെ ."

കലി തുള്ളി നിന്ന ഡോക്ടർ ഭാര്യയോട് ചോദിക്കുന്നത് കേട്ടപ്പോൾ ,ഞാൻ അടി
മുടി വിറച്ചു ..

" അവനെ ഞാനിന്ന് ശരിപ്പെടുത്തും "

ഡോക്ടർ ഭാര്യയെ വിട്ട് ,
ചാടീ ആടുക്കളയിൽ കയറി .വെട്ട് കത്തിയുമായി,
എനിക്ക് നേരെ പാഞ്ഞ് അടുത്തു.........

'ദൈവമേ'
എന്റെ ഉറക്കെയുള്ള നിലവിളി കേട്ടപ്പോഴണെന്നു തോന്നുന്നു, ഭാര്യയെഴുന്നേറ്റ് ലൈറ്റിട്ട് ,എന്നെ തട്ടി ഉണർത്തി..
ചുരിദാറിട്ടിരിക്കുന്ന ഭാര്യയെ കണ്ടപ്പോഴായിരുന്നു എനിക്ക് സ്ഥലകാലബോദ്ധം ഉണ്ടായത്. നാണത്തോട് തലകുനിച്ചിരിക്കുന്ന എന്നോട് ഭാര്യ ചോദിച്ചു....

" പഴയ സ്വപ്നം വീണ്ടും കണ്ടു അല്ലേ "

ഞാൻ വെറുതെ മൂളുക മാത്രം ചെയ്തു.

" രാവിലെ എഴുനേറ്റ് അലമാരയിൽ തിരയണ്ട, എനിക്ക് കതകും ജനാലയും വച്ച ബ്ലൗസ് ഇല്ല ."

അവൾ ചിരിച്ച് കൊണ്ട് പറഞ്ഞപ്പോൾ.
അവളെ എന്നിലേക്ക് വലിച്ച് അടിപ്പിച്ച്
കൊണ്ട് ഞാൻ പറഞ്ഞു.

" ഒരു സംശയ രോഗിയല്ലേ? നീ ക്ഷമിക്ക് "

ആ സ്വപ്നങ്ങൾ കാണുമ്പോൾ ഞാൻ എന്റെ ഭാര്യയെ കൂടുതൽ സ്നേഹിക്കുകയും, വിശ്വസിക്കുകയും ചെയ്യുന്നു .ആ സ്നേഹം സത്യമാണെങ്കിൽ, എല്ലാ രാത്രിയിലും ആ സ്വപ്നം ഞാൻ കാണട്ടെ എന്ന് അവളും ആഗ്രഹിക്കുന്നു.......

***********************
ശുഭം

മനു എണ്ണപ്പാടം