ഒളിച്ചോട്ടം

സ്നേഹത്തിന്‍റേയും പരിഗണനയുടേയും അടയാളമെന്താണ് ? ആരോ ചോദിച്ചു.
'' കാപ്പി '' ഞാന്‍ പറഞ്ഞു . എപ്പോഴെന്നില്ലാതെ വന്നു കയറുന്ന അതിഥികളെ , അവരോട് സ്നേഹമുണ്ടെന്ന് തെളിയിക്കാന്‍ , നിരന്തരം അടുക്കളയില്‍ ഞാന്‍ കാപ്പി കൂട്ടിക്കൊണ്ടേയിരുന്ന കാലത്താണത്.

ഞാനയാളോട് പറഞ്ഞു '' അടുക്കളയെ ബ്രസീല്‍ എന്നും വിളിക്കാം. കാപ്പി കയറ്റുമതിയുടെ നാട്....''

കളിമണ്‍ കപ്പുകളിലൊതുങ്ങുന്ന തവിട്ടു സമുദ്രത്തില്‍ ഞാന്‍ ലോക സഞ്ചാരങ്ങള്‍ ചെയ്യുന്നു. അടുക്കളയില്‍ നിന്നും അതിഥി മുറിയിലേക്കും... തിരിച്ചും . കപ്പുകള്‍ , പേറിയും മോറിയും കഴിഞ്ഞു പതിനഞ്ചു വര്‍ഷങ്ങള്‍.

അടുക്കളക്കാരിയെ ആരും സ്നേഹിച്ചില്ല. അനാരോഗ്യവതിയായ വെപ്പുകാരി ഒടുവില്‍ തലചുറ്റി വീണു . സ്നേഹരാഹിത്യത്താലും..., ക്ഷീണത്താലും.

മൂന്ന് മാസം കൂടുമ്പോഴുളള പരിശോധനയ്ക്ക് ചെല്ലുമ്പോള്‍ ഡോക്ടര്‍ ശാസിച്ചു '' റെസ്റ്റില്ല... അത് ശരിയാകില്ല ... റെസ്റ്റ് എടുത്തേ പറ്റു...''

'' എന്നാലെങ്ങനെ ? '' ഞാന്‍ ഭര്‍ത്താവിനോട് പറഞ്ഞു '' ഇങ്ങനെ ആണെങ്കില്‍ ഞാന്‍ ഒളിച്ചോടും ''

'' എങ്ങോട്ട് ? ''

ഭര്‍ത്താവിന് അത് മനസ്സിലായില്ല. ഒന്ന് പെറ്റ രോഗിണിയായ ഈ സ്ത്രീ ആരോടൊപ്പം ഒളിച്ചോടാനാണ്...? ഇവളുടെ കൂടെ ആര് ഓടാനാണ്...?

പക്ഷേ .... ആ ഒളിച്ചോട്ടം നടക്കുക തന്നെ ചെയ്തു . കുട്ടിക്കാലം മുതല്‍ കാത്തുവെച്ച പ്രണയത്തെ , പില്‍ക്കാലത്തൊരിക്കല്‍ കണ്ടറിഞ്ഞ് ... ശിശുവിനെയും കൈയ്യിലെടുത്ത് , അതിവേഗം ഓടിപ്പോയ ക്ലേശ ജന്മമായ ഒരു കാമുകിയെപ്പോലെ.....!!

By: Aami fatima