ലോട്ടറി വിൽപ്പനക്കാരൻ

മുച്ചക്ര വാഹനത്തിൻ
മുന്നിലാപ്പലകപ്പുറത്തിന്നത്തെ,
നാളത്തെ - ലോട്ടറി നിരത്തി
തീവണ്ടിയാപ്പീസിൻ
തിരക്കുള്ള വാതിൽപ്പുറത്ത്
ധ്യതിയോടെ പായും
മുഖങ്ങളിലേയ്ക്കൊരു
ദയനീയ നോട്ടമായ്.....

ഭിക്ഷ തെണ്ടാനിരിക്കുന്ന പോലെ
ചില പുച്ഛഭാവ വദന -
ങ്ങളിടയ്ക്കിടെ മിന്നിമറയുന്നു
ഭവ്യതയോടെ വിളിച്ചു നീട്ടുമ്പോൾ
ബധിരരായ് നടിച്ചത്തറിൻ
മണമേകി നീങ്ങുന്നവർ

ഉച്ചയൂണിന്നു പോലുമൊന്നും
തരപ്പെടാ വിൽപ്പനയ്ക്കിടയിൽ
ഉച്ചിയിൽ തുപ്പി കുളിപ്പിച്ചു സൂര്യനും

ആഢംബരത്തിനല്ലിതെൻ
അടുപ്പിൽ തീ പുകച്ചാറു
വയറ് നിറയ്ക്കാൻ...
മിച്ചം പിടിച്ചെന്നൊറ്റമുറി വീടിന്റെ
ചിതലിച്ച വാതിലൊന്നു പുതുക്കാൻ
അട്ടു പോയ മേൽക്കൂരയ്ക്കിത്തിരി
ഓലവാങ്ങി മേഞ്ഞുറങ്ങാൻ...

ഭാഗ്യമൊക്കെ വിറ്റു തള്ളിയീ
പ്രാരാബ്ദ തോണി തുഴഞ്ഞിനിയും

ഗോപകുമാർ കൈമൾ