പ്രവാസി

ഈ മണൽക്കാട്ടിലെ
തീച്ചൂടിൽ പെട്ടു ഞാൻ
ഇന്നും തളർന്ന് പോയി

മണൽ വാരി വിതറിയാ-
കാറ്റിൻ കുസൃതികൾ,
മണ്ണുതിന്നു വിശപ്പാറ്റിയാ-
പകലിലെൻ
കണ്ണുമൂടിക്കറങ്ങിച്ചിരിക്കുന്നു.

ഈറൻ മുടിത്തുമ്പിൽ
തുളസിക്കതിർ ചൂടി
ഈ നേരമോർമ്മയിൽ
നീയെത്തിടുന്നു സഖീ

ഓർമ്മകളെന്നെയീ
അകലങ്ങളെ ചൂണ്ടി
നിറയ്ക്കുന്നു കൺകൾ

ചുവരിലെക്കലണ്ടറിൽ
പിന്നിട്ട മാസങ്ങളെണ്ണി -
ക്കൊതിയ്ക്കുമ്പോൾ -

പിന്നെയും മുന്നിലക്കങ്ങളെന്നിലൊരു
നെടുവീർപ്പിലൊതുങ്ങി

പുത്തൻ പ്രതീക്ഷ തൻ
കുളിര് ചുമന്നെത്ര സ്വപ്നാടകർ
വന്നിറങ്ങുന്നിന്നുമിനിയും

ഗോപകുമാർ കൈമൾ