മഞ്ചാടിമണികൾ

പുതുവർഷപ്പുലരി !!

 പ്രതീക്ഷയോടെ പുതുവർഷത്തിലേക്ക്..
ഇന്നിത്തിരി തണുപ്പൊക്കെയുണ്ട്, മങ്കി ക്യാപ്പും സ്വറ്റെറും എടുത്തണിഞ്ഞു...

2015 ,മനസ്സും ശരീരവും തണുപ്പിച്ച് സമാധാനിപ്പിച്ച് വിട പറയുന്നതാണോ? അതോ 2016 മനസ്സും ശരീരവും കുളിർപ്പിച്ച് ഊഷ്മളമായി വരവേൽക്കുന്നതാണോ?
അറിയില്ല...

ഏതായാലും പോയ വർഷം കാര്യമായ ക്ഷതമൊന്നും ഏല്പിച്ചില്ല.. സമാധാനിക്കാം നന്ദി രേഖപ്പെടുത്താംനാഥനോട് അൽഹംദുലില്ല.. (ദൈവത്തിന് സ്തുതി)

6 മുതൽ 6.50 വരെ പതിവ് നടത്തം ശേഷം പതിവ് ചായേം പുട്ടും. മോശമാക്കരുതല്ലോ പുതുവർഷമായിട്ട്...അധികനേരം തങ്ങിയില്ല വേഗം മടങ്ങി വീട്ടിലേക്ക്.
പതിവായി കാണാറുള്ള പലരേയും കണ്ടില്ല ഇന്ന്, തണുപ്പ് കാരണമാണോ? അതോ പുതുവർഷമായിട്ട് എടുത്ത തീരുമാനത്തിൻ്റെ ഭാഗമായി ഇറങ്ങാത്തതാണോ? എന്തോ.
ഞാനേതായാലും അത്തരം കടുത്ത തീരുമാനങ്ങളൊന്നും എടുക്കാനില്ല.
എല്ലാം പതിവുപോലെ ഇങ്ങനെ പോയാൽ മതി.. തിരിച്ച് നടക്കുന്നതിനിടെ മനസ്സിൽ ഉറപ്പിച്ചു.

പണ്ട് പുതുവർഷമായാൽ ചില മാറ്റങ്ങളൊക്കെ ജീവിതത്തിൽ വരുത്തണമെന്ന് തീരുമാനിക്കാറുണ്ട്

പുകവലി നിർത്തണം...

രാവിലെ നേരത്തെ എണീക്കണം

രാവിലെയുള്ള ചായക്കട ചർച്ചയിൽ നിന്ന് ഒഴിഞ്ഞ് നില്ക്കണം..

വീട്ട് കാര്യങ്ങളിൽ ഭാര്യയെ സഹായിക്കണം...

വീട്ട് മുറ്റത്തൊരു ചെറിയ പൂന്തോട്ടം നിർമ്മിക്കണം.

തെങ്ങിൻ ചുവടൊക്കെ കിളച്ച് മറിച്ച്
വളം ചെയ്യണം, ഒപ്പം ആരോഗ്യ സംരക്ഷണവുമാകുമല്ലോ?

വീട്ടിലേക്കാവശ്യമായ പച്ചക്കറി സ്വന്തമായി കൃഷി ചെയ്യണം..

പക്ഷെ ഒന്നും നടക്കാറില്ല.
ഒരിക്കലും നടക്കാത്ത സുന്ദരമായ സ്വപ്നങ്ങൾ.. അത് കൊണ്ട് തന്നെ ഇപ്പോൾ അത് പോലുള്ള തീരുമാനങ്ങളൊന്നും എടുക്കാറില്ല.
എല്ലാം പതിവു രീതിയിലങ്ങനെ പോട്ടെ !! എത്തുന്നിടം വരെ..

പലതും ഓർത്തും ചിന്തിച്ചും നടക്കുന്നതിനിടയിൽ കുറെ മഞ്ചാടിമണികൾ ചിതറിക്കിടക്കുന്നത് ശ്രദ്ധയിൽപ്പെട്ടു.
ആരായിരിക്കാം ഇതിവിടെ കൊണ്ടിട്ടത്? വണ്ടി കയറാൻ വന്ന വല്ല കുട്ടികളുമായിരിക്കും. പണ്ടാണെങ്കിൽ ഇതാന്നും ശ്രദ്ധയിൽപ്പെടില്ല.പുതിയൊരു ശീലം വന്ന് പെട്ടിരിക്കുന്നു.തല താഴ്ത്തിപ്പിടിച്ച്... പുല്ല്, പൂക്കൾ, വഴിയരികിലുള്ള സസ്യങ്ങൾ.. പക്ഷികൾ ...
ഈയടുത്ത് ഒരു സുഹൃത്തിൻ്റെ കമൻ്റ് കേട്ടു " ഇങ്ങനെ തല താഴ്ത്തി പിടിച്ച് നടന്നാൽ പോരാ തല ഉയർത്തി കൈകൾ വീശി കുറച്ച് കൂടി വേഗതയിൽ നടക്ക്..."

"ഇത്രയൊക്കേ എന്നേക്കൊണ്ട് പറ്റു
വേണമെങ്കിൽ നീ അങ്ങനെ നടന്നോ "
എൻ്റെ മറുപടി .

ഇത് തന്നെ മനസ്സുണ്ടായിട്ടല്ല അപ്പോഴാണവൻ്റെ ഒരു..... മനസ്സിൽ അരിശം തീർത്തു.

കുനിഞ്ഞ് മഞ്ചാടിമണികൾ പെറുക്കിയെടുത്തു...
ഉപേക്ഷിച്ച് പോരാൻ തോന്നിയില്ല. മഞ്ചാടിമണികളോടും കുന്നിക്കുരുവിനോടും ഇഷ്ടമായിരുന്നല്ലോ എന്നും..
അത് പോലെ തെച്ചിപ്പൂവിനോടും
ചെമ്പരത്തിയോടും...
ഇഷ്ടമെന്ന് പറഞ്ഞാൽ കൂടുതലിഷ്ടം.

തുമ്പ,മുല്ല, കാശിത്തുമ്പ, നാല് മണി, റോസ്, മന്ദാരം എല്ലാം ഇഷ്ടം തന്നെ, കള്ളിപ്പൂവ്, കോളാമ്പി പ്പൂവ്, മുക്കുറ്റി, കൈതപ്പൂ, ചെമ്പകം എല്ലാം എല്ലാം.......

രാത്രി റെയിൽ പാളത്തിലൂടെ നടന്ന് വന്നിരുന്ന കാലത്ത് റെയിൽ വക്കത്ത് നിന്നിരുന്ന പടുകൂറ്റൻ പാലമരത്തിൻ്റെ ചുവട്ടിലെത്തിയാൽ മനസിൽ നേരിയ ഭയം തോന്നിയിരുന്നെങ്കിലും പാലപ്പൂ വിൻ്റെ ഗന്ധം ഇഷ്ടമായിരുന്നു.. ഇന്ന് പക്ഷെ ആ പാലമരം അവിടെയില്ല. രാത്രിയിലെ കാൽ നsയാത്രയും ഇന്നില്ലല്ലോ?

അത് പോലെ സസ്യങ്ങളിൽ പണ്ട് കണ്ടിരുന്ന ആടലോടകം, എരുക്ക്,
ചവത, മുരിക്ക്, ആവണക്ക് ഇവയൊക്കെ അന്യം നിന്ന് പോയോ? കാണുന്നില്ല... തിരയുന്നുണ്ട് കണ്ണുകൾ....

തേവിടിശ്ശിയെന്ന് വിളിച്ചിരുന്ന പാവം പൂച്ചെടിയും (അരിപ്പൂ ചെടി)കമ്മൽ പോലുള്ള ചുവന്ന ചെറു പൂക്കളുള്ള പാവം തെവിടിശ്ശി..' ഇല്ല.. അന്യം നിന്ന് പോയിരിക്കുന്നു.

മഞ്ചാടിമണികൾ തുടച്ച് മണ്ണും പൊടിയും മാറ്റി പോക്കറ്റിലിട്ടു.
സ്നേഹവാത്സല്യങ്ങളോടെ.,

മഞ്ചാടിമണികളോട് ഇഷ്ടം തോന്നിത്തുടങ്ങിയതെന്നാ?
അതെ, പത്തിൽ പഠിക്കുമ്പോൾ..
ഇഷ്ടമായിരുന്നു..... ഇഷ്ടത്തോടെ സമ്മാനിച്ചത് കൊണ്ടാകാം....
നീണ്ടു മെലിഞ്ഞ വെളുത്ത വിരലുകളിലെ നഖങ്ങൾക്കും മഞ്ചാടിമണികളുടെ നിറമായിരുന്നല്ലോ നല്കിയിരുന്നത്....
................ ശുഭം..........................