ആത്മ സഖി

**************

പകൽ മയങ്ങുന്ന നേരത്ത്, സ്വപ്നത്തിലെന്നരികിലെത്തി ചെമ്മെ മമ സഖി .

ഇതൾ വിടർന്നൊരാ ചെമ്പക പൂക്കൾ പോൽ,
കനവിലോർമ്മതൻ ഗന്ധം പരക്കുന്നു .

മലർ മിഴിയവളുടെ നീൾമിഴി കണ്ണിണ
മനമിതിൽ നീന്തിത്തുടിക്കുന്നു പരലുപോൽ .

ചിറകടിച്ച് ഞാൻ സ്വപനത്തിലവളുമായ്
മലർ നിറഞ്ഞൊരു തോപ്പിലെത്തീടുന്നു .

കളി ചിരി കൊഞ്ചലുകൾ കൊണ്ടു ഞാൻ
അവളുമൊത്താ തോപ്പിൽ ചരിക്കവെ .

നിമി തിളങ്ങി മറഞ്ഞതെന്തോമലെ
തിരികെയെത്താത്ത ദൂരത്തിലേക്കു നീ .

മമ സഖീ നീ മറഞ്ഞൊരാ നേരത്ത്
ഇരുൾ പടർന്നെന്റെ മുന്നിലെ പാതയിൽ ,
അകലെ മാഞ്ഞൂ, വസന്തം ഇതളിട്ട
നിറമണിഞ്ഞോരു കുഞ്ഞു കനവുകൾ .

ചകിതനായ് ഞാൻ ഇരുൾ മൂടിയ വീഥിയിൽ
ഇതൾ വിടർന്ന നിശ തന്നിലേകനായ് .

അകലെ മാഞ്ഞ നീ തന്നൊരാ ഓർമ്മകൾ
നിണമൊഴുക്കിയെൻ ഹൃത്തടം നീറ്റുന്നു .

ഇനിയടുക്കലേക്കില്ലെന്ന ചിന്തയിൽ,
ഉരുകി നീറുന്നിതെൻ മനം മേൽക്കുമേൽ.

പിരിയുകെൻ മനതാരിൽ നിന്നു നീ,
അകലെദൂരേക്ക് മായുക മൽ സഖീ .

കഴിവതില്ലീ ജന്മ മകലുവാൻ
നിന്നിൽ നിന്ന-
റിയുമെങ്കിലും ഞാനിതാ കേഴുന്നു .

അഴൽ നിറഞ്ഞൊരാ ചിന്തയിൽ നിന്നൊന്നു
കുതറി മാറുവാൻ വേണ്ടിയെന്നോമലെ .

കരൾ പിളർക്കുന്ന നോവുണ്ടിതെങ്കിലും,
ഹൃദയവേദന സഹിക്കുന്നു ഞാൻ വൃഥാ .

പിരിയുകെൻ മനതാരിൽ നിന്നു നീ,
അകലെ ദൂരേക്ക് മായുക മൽസഖി .

ക്ഷണികമായൊരീ മായിക ലോകത്തിനി,
ശൂന്യമാം ഹൃദയവുമായ്,
ഏകനായിരിക്കട്ടെ ഇത്തിരി നേരം...

അരുൺ -