അല്ല.........ഈ ദേവൂട്ടി ക്കെന്താ കൊഴപ്പം

അല്ല.........ഈ ദേവൂട്ടി ക്കെന്താ കൊഴപ്പം.... ഈ കഴിഞ്ഞ അഞ്ചു കൊല്ലവും ദേവൂട്ടീന്ന് തന്നെയല്ലേ ഇവരെന്നെ വിളിച്ചിരുന്നെ..... വിളിക്കുമ്പോഴൊക്കെ "ന്തോ...... " ന്ന് നീട്ടി വിളിയും കേട്ടിട്ടുണ്ട്..... ന്നിട്ടും..... ന്റെ പേര് മാറ്റണം ത്രേ... സ്ക്കൂളിൽ ചേർക്കുമ്പം ദേവൂട്ടി പേര് ചേരില്ലാ പോലും.... ചേച്ചിക്ക് സംഗീത യാ പേര് അതുകൊണ്ട് ദേവൂട്ടിക്കും " S" ൽ തുടങ്ങണ പേര് വേണം ന്ന്... ഈ അമ്മേടൊരു പരിഷ്ക്കാരം.....ഹും

രാവിലെ മുതൽ ചിന്താധീനയായിരിക്കുന്ന ദേവൂട്ടിയെ കണ്ട് അമ്മ അവളുടെ അടുത്തു വന്നിരുന്നു ചേർത്തു പിടിച്ചു എന്നിട്ട് ചോദിച്ചു

"ന്താ ന്റെ മോൾക്കിത്ര വല്യ ആലോചന......ന്താമുഖം വല്ലാണ്ടിരിക്കണെ....?"

ദേവൂന്റെ കണ്ണ് നിറഞ്ഞു വന്നു......

"എന്തിനാ അമ്മേ ന്റെ പേര് മാറ്റണെ..... പേര് മാറ്റാതെ തന്നെ ന്നെ സ്കൂളിൽ ചേർത്തൂടെ......"

" ആഹാ അതാണോ ന്റെ മോൾടെ വിഷമം..... നോക്ക് നിന്റെ ചേച്ചിക്കും രണ്ട് പേരുണ്ടല്ലോ സ്ക്കൂളിൽ സംഗീതയും വീട്ടിൽ മഞ്ചുവും..... ന്നിട്ടവൾക്കൊരു വിഷമോമില്ലല്ലോ...... "

ഒന്ന് നിർത്തിയിട്ട് അമ്മ തുടർന്നു.....

"അത് മാത്രാണോ..... അവൾക്ക് രണ്ട് പേരും ദേവൂട്ടിക്ക് ഒറ്റ പേരും..... ശ്ശെ.... മോശല്ലേ അത്... അവൾ വല്യ ഗമ കാണിച്ച് നടക്കില്ലേ ന്റെ കുഞ്ഞിന്റെ മുന്നിലൂടെ... "

പണ്ട് മുതലേ ചേച്ചിയും അനിയത്തിയും തമ്മിലുള്ള ഐക്യം അറിയാവുന്ന അമ്മ ദേവൂട്ടിയുടെ വീക്ക് പോയിന്റിൽ തന്നെ പിടിച്ചു.....

"ശെടാ അത് ശരിയാണല്ലോ.... പറ്റില്ല.... പറ്റില്ല.... അങ്ങനിപ്പം അവൾ വല്യാളാവണ്ട.... ദേവൂട്ടി ചിന്തിച്ചു.

" നിക്ക് ന്ത് പേരാ ഇടുന്നെ അമ്മേ...."

" അതോ അമ്മയൊരു നല്ല പേര് കണ്ടു വച്ചിട്ടുണ്ട് "ട " ൽ തന്നെ തുടങ്ങുന്നത്....."

"ആണോ ന്ത് പേരാ അമ്മേ"

"നല്ല പേരാ അമ്മ ഒരു കഥയിൽ വായിച്ച പേരാ....... " സ്മിത '' സ്മിതയെന്നാ പേര്....എങ്ങനുണ്ട് ഇഷ്ടായോ..."

"ങേ... അയ്യേ.... സ്മിതയോ അതെന്ത് പേരാ... നിക്കെങ്ങും വേണ്ട..... കണ്ടു പിടിച്ചൊരു പേരേ.... സ്മിത.... ഹും.... "

ദേവൂട്ടി ദേഷ്യത്തോടെ മുഖം തിരിച്ചിരുന്നു.

'' അയ്യോ...... ന്ത് നല്ല പേരാ സ്മിത..... ദേവൂട്ടിയെക്കാൾ നല്ല പേരല്ലേ.... മോൾക്കറിയാത്തോണ്ടാ....."

" നിക്ക് വേണ്ടാന്ന് പറഞ്ഞില്ലേ..... ഒരു പേരും കൊണ്ട് വന്നേക്കുന്നു...... ഹും"

ദേവൂട്ടി ആകെ ദേഷ്യം കൊണ്ട് ചുവന്നു.

മകളുടെ ഈ മാറ്റം കണ്ട അമ്മ അടുത്ത നമ്പരിറക്കി....

"നിനക്കിഷ്ടായില്ലേൽ വേണ്ട..... ഇനീപ്പോ വേറെന്തെലും നോക്കാം.... ശ്ശൊ നല്ല പേരായിരുന്നു സ്മിത... സുന്ദരിമാർക്കിടണ പേര്.... ങാ നിനക്ക് യോഗമില്ല.... "

" സുന്ദരിമാർക്കോ..... അതെന്താ അങ്ങനെ.... "

" അതേന്ന് സുന്ദരിമാർക്കിടണ പേരാ.... സ്മിത എന്നാൽ നല്ല സുന്ദരമായി പുഞ്ചിരിക്കുന്നവൾ ന്നാ.... "

''ഹാണോ....."

'' ആ.... അതേ... ന്റെ ദേവൂട്ടീടെ ചിരി കാണാൻ ന്താ ഭംഗീന്നറിയോ...... അതു കൊണ്ടാ അമ്മ ആ പേരിടാന്ന് കരുതിയെ......."

" എന്റെ ചിരി കാണാൻ അത്രക്ക് ചന്താ...? " ദേവൂട്ടിയുടെ മുഖം ചുവന്നു തുടുത്തു....

" പിന്നില്ലേ... ന്റെ മോൾടെ ചിരിയും ചുവന്നു തുടുത്ത തക്കാളി പോലത്തെ കവിളുമൊക്കെ കാണാൻ ന്ത് ഭംഗിയാ.... അതല്ലേ ആ പേരിടാന്ന് കരുതിയെ..... മോൾക്കിഷ്ടല്ലേൽ വേണ്ടാ ട്ടോ... അമ്മ വേറെ പേര് നോക്കാം....

" യ്യോ വേണ്ട.....വേണ്ട....നിക്ക് സ്മിത തന്നെ മതീ.... " ദേവൂട്ടി പുഞ്ചിരിച്ചു.....

" ഉം....ന്നാ അതുമതി...." അമ്മ ഒരു കുസൃതി ചിരിയോടെ എണീറ്റുപോയി

ദേവു ഓടിപ്പോയി കണ്ണാടിയിൽ നോക്കി.... ചാഞ്ഞും ചരിഞ്ഞും നിന്ന് ചിരിച്ചു..... കവിളിലേക്ക് സൂക്ഷിച്ചു നോക്കി... തക്കാളി പോലാണോ തന്റെ കവിൾ.....ശെടാ ന്നിട്ട് ഇന്നലേം കൂടി ചേച്ചി ന്നെ മത്തങ്ങാ കവിളീന്ന് വിളിച്ചതാണല്ലോ....... കുശുമ്പിയാ അവൾ ഹും....."

അങ്ങനെ ചിന്തിച്ചു നിൽക്കെയാണ് ദേവൂന്റെ അമ്മായീ ടെ മകൻ സുധിയും ചേച്ചിയും അയൽവക്കത്തെ കളി കൂട്ടുകാർ പിള്ളേരും അങ്ങോട്ട് കയറി വന്നത്.

കണ്ണാടി നോക്കി പുഞ്ചിരിച്ചു നിൽക്കണ ദേവൂനെ കണ്ടതും അവൻ ചോദിച്ചു

"ന്താടീ ഒറ്റയ്ക്ക് നിന്ന് ചിരിക്കണെ.... വട്ടായോ നിനക്ക്....... "

പുഞ്ചിരിച്ച മുഖവുമായി ഗമയൊട്ടും കുറയാതെ ദേവു അവരോട് പറഞ്ഞു....

"അതേയ് നിക്ക് അമ്മ പുതിയൊരു പേരിട്ടിട്ടുണ്ട്. സുന്ദരിമാർക്ക് മാത്രമിടണ പേരാ.... "

" സുന്ദരിമാർക്കിടണ പേരോ.... അതെന്ത് പേരാ " സുധി ചേട്ടൻ ആകാംക്ഷയോടെ ചോദിച്ചു.....

"അതേയ്..... അതേയ്..... സ്മിത.... സ്മിതയെന്നാ ഇനിയെന്റെ പേര്...." അഭിമാനത്തോടെ..... ലേശം നാണത്തോടെ ദേവു പറഞ്ഞു.

" എല്ലാവരും ഒന്ന് നിശബ്ദരായി..... പരസ്പരം മുഖത്തേക്ക് നോക്കി...... വളരെ പെട്ടെന്ന് ആ നിശബ്ദത ഒരു പൊട്ടിച്ചിരിയിലേക്ക് തെറിച്ചു വീണു..... നിലയ്ക്കാത്ത ചിരി... അതിങ്ങനെ മാലപ്പടക്കം പോലെ ഒരാളിൽ നിന്ന് മറ്റൊരാളിലേക്ക് പടരുകയാണ്.....

ദേവൂട്ടി അന്തം വിട്ട് നിന്നു. അവൾക്ക് ചെറിയ ദേഷ്യം വരുന്നുണ്ടായിരുന്നു.....

'' നിങ്ങളെന്തിനാ ചിരിക്കണെ.... " ദേവൂന് സങ്കടം വന്നു.

സുധി ചേട്ടൻ ചിരിയടക്കാൻ പാടുപെട്ടു കൊണ്ട് അവിടെ കിടന്ന ഒരു സിനിമാ മാസികയെടുത്ത് തുറന്ന് കാണിച്ചു....

" ദേനോക്കെടീ.... ഇതാ നിന്റെ ചുന്നരി സ്മിത...... " അതിലേക്കൊന്ന് നോക്കിയ ദേവു ഞെട്ടിപ്പോയി....

സുന്ദരിയായൊരു ചേച്ചി വെറും രണ്ടു കഷണം തുണിയിൽ മാനം മറച്ച് വെളുക്കെ ചിരിച്ചു നിക്കണു........ പാവം ഇത്രേം തുണിക്ക് ദാരിദ്ര്യമനുഭവിക്കുന്നൊരു ചേച്ചിയെ ആദ്യായി കാണുകയാരുന്നു ദേവു

അത്ഭുതസ്തബ്ധയായി അതിലേറെ നാണിച്ച് നിന്ന ദേവൂട്ടിയോട് ചേട്ടൻ.....

" ഇങ്ങനെ തുണിയുടുക്കാത്ത പെണ്ണിന്റെ പേരാ സ്മിത.... സിൽക്ക് സ്മിത....... അയ്യേ....... കൂയ്..... കൂയ്..... " എല്ലാരും പൊട്ടിച്ചിരിച്ചു കൊണ്ട് പുറത്തേക്ക് പോയി.

ഇതികർത്തവ്യാ മൂഢയായി നിന്ന ദേവൂട്ടി സ്വബോധം വീണ്ടെടുത്ത്, ചീറിക്കരഞ്ഞുകൊണ്ട് അടുക്കളയിലേക്ക് പാഞ്ഞു.

മിഴിച്ചു നിന്ന അമ്മയുടെ മുഖത്ത് നോക്കി പൊട്ടിത്തെറിച്ചു....... നിലത്ത് വീണുരുണ്ട് നിലവിളിച്ചു.....

'' നിക്ക് തുണിയില്ലാത്ത പെണ്ണിന്റെ പേര് വേണ്ടേ.....യ്....... "

കാര്യം കൈവിട്ടു പോയീന്ന് മനസിലായ അമ്മ നിലത്ത് കിടന്നു കാറുന്ന ദേവൂനെ പിടിച്ചെഴുന്നേൽപ്പിച്ച് പറഞ്ഞു.....

" കരയണ്ട മോൾക്കിഷ്ടല്ലാത്ത പേര് അമ്മയിടില്ല ട്ടോ... വേറെ നല്ലൊരു പേരിടാം പോയി മുഖം കഴുകി വാ....."

അങ്ങനെ സന്തോഷത്തോടെ അടുക്കളയിൽ നിന്ന് പുറത്തേക്കിറങ്ങിയ ദേവു വീണ്ടും ആ സിനിമാമാസികയെടുത്ത് സിൽക്ക് സ്മിതയെ നോക്കി... വിജയീ ഭാവത്തിൽ പുച്ഛത്തോടെ ഒന്നു ചിരിച്ചു........

അങ്ങനെ നാളുകൾക്ക് ശേഷം അമ്മ കണ്ടു പിടിച്ച......അധികമാർക്കുമില്ലാത്ത..... സുന്ദരമായ.....ഒരു നല്ല പേരുമായി സ്ക്കൂളിൽ ചേർന്നു ദേവൂട്ടീ.....
*******************************

വർഷങ്ങൾക്കിപ്പുറം കൃത്യമായി പറഞ്ഞാൽ ഇരുപത്തെട്ട് വർഷങ്ങൾക്കു ശേഷം ഒരു സുപ്രഭാതത്തിൽ ടി വി തുറന്ന ദേവു ഞെട്ടിപ്പോയി.........ഏതു ചാനൽ മാറ്റിയാലും തന്റെ പേര്..... ഒപ്പം വൃത്തിയായി വസ്ത്രം ധരിച്ചൊരു സുന്ദരിപ്പെണ്ണും....

കുറച്ച് നേരം ടിവിയിൽ കണ്ണും മിഴിച്ചിരുന്ന ദേവു തന്റെ പേരു കാരിയായ ആ പെണ്ണിന്റെ തൊലിയുരിയുന്ന കദനകഥകൾ കേട്ട് പകച്ചുപോയി.... ദേഷ്യത്തോടെ ടിവി ഓഫ് ചെയ്തിട്ട് ബെഡ്റൂമിലേക്ക് നടന്ന അവളുടെ മുന്നിലേക്ക് ഒരു ടു പീസുകാരി തന്റെ മാദകത്വം നിറഞ്ഞ മിഴിചിമ്മി ഒരു പൊട്ടിച്ചിരിയോടെ കടന്നു വന്നു.

ഇതിലും ഭേദം സ്മിതയായിരുന്നു..... സിൽക്ക് സ്മിതയെന്ന് മുഴുവനായിട്ടിട്ടാലും സാരമില്ലാരുന്നു....
അന്യായം തന്നെ ചേച്ചീ..... ങ്ങടെ ശാപത്തിന് ഇരുപത്തെട്ട് വർഷത്തെ ഗ്യാരണ്ടിയുള്ള കാര്യം മ്മളറിഞ്ഞില്ല....

മനോഹരമായ ഒരു വേണുഗാനത്തോടെ മൊബൈൽ കൺചിമ്മിയുണർന്നു.

ആരാണാവോ........ദേവു മൊബൈലെടുത്തു നോക്കി......

ങാ...നിഷയാണ്.... കുഞ്ഞമ്മയുടെ മകൾ
എത്ര ദിവസായി അവൾ വിളിച്ചിട്ട് ദേവു പുഞ്ചിരിയോടെ ഫോൺ ചെവിയോട് ചേർത്തു.....

ഹലോ.......

"ഹലോ.......സരിതാ എസ് നായരുണ്ടോ....???" മറുപുറത്ത്....!!

'' പ്ഫാ...... വച്ചിട്ടു പോടീ..... "
ദേഷ്യം കൊണ്ട് വിറച്ചു പോയ ദേവു ഫോൺ സ്വിച്ച് ഓഫ് ചെയ്ത് കട്ടിലിലേക്കെറിഞ്ഞു..... എന്നിട്ട് FM ഓണാക്കി....

" ഏഴിമല പൂഞ്ചോല.....
മാമലയ്ക്ക് മണിമാല.....
പൊന്മാലാ..... പൊന്മാല......
പുത്തൻ ഞാറ്റുവേലാ.......
കൊഞ്ചെടി കൊഞ്ചെടി കൊഞ്ചെടി കൊഞ്ചെടി ഞാറ്റുമുത്തേ......

Malu G Nair