ആകാശം പങ്കിടുന്നവർ

ആകാശം പങ്കിടുന്നവർ
´´´´´´´´´´´´´´´´´´´´´´´´´´´´´´´´

ആൺ കിളി:
നിന്റെ ചിറകുകൾക്കെന്തു നിറം 
ഏറെയിഷ്ടം പ്രിയേ നിൻ കൊഞ്ചലും.

പെൺകിളി:
എത്ര നാൾ കൂടെ പറന്നിടും നീ
കൊക്കുരുമ്മിപിന്നെ മെയ്യുരുമ്മി..

നീലമീ വാനിലിനിയുമുണ്ടാം
ഏറെ വർണ്ണങ്ങൾ ചിറകുകളിൽ
പൂശിയൊരായിരം പൈങ്കിളികൾ.
മോഹന നാദവും സൌന്ദര്യവും
കണ്ടു നീയെന്നെ മറന്നീടുമോ..

ആൺ കിളി :
എൻ സ്നേഹമൊന്നാകെ
നീയെടുത്തു...
ഇല്ലിനിയൊട്ടുമേ വീതിക്കുവാൻ
എന്റെ ഹൃദയം നിനക്കു മാത്രം...

പെൺകിളി :
പ്രണയത്തിലൊന്നാകും
ആത്മാവുകൾ
അറിയുന്നു തമ്മിൽ പറഞ്ഞിടാതെ
ശ്വാസ വേഗങ്ങളും നോവുകളും..
നീറും ഭയങ്ങളും കണ്ണു നീരും..
അറിയുന്നുവോ.. നീയറിയുന്നുവോ ?

ആൺകിളി:
അറിയുന്നുവോരോ മിടിപ്പുകളും
അകമേ വരച്ച നിൻ സ്വപ്നങ്ങളും.
ഒരു കൂട് ചായം കടം തരികിൽ
നിന്റെ കിനാവുകൾ ഞാൻ വരയ്ക്കാം.

പെൺകിളി :
അത്തികൾ പൂക്കാത്ത കാലം വരും,
അന്നത്താഴമില്ലാതെ കൂട്ടിരിക്കാൻ
വന്നെത്തുമോ നീ
ഈ ചില്ലമേൽ...

ആൺ കിളി :.
അത്തിപ്പഴമൊന്നുമില്ലെങ്കിലും
നെഞ്ചിലെ ചൂടു പകർന്നിടാം ഞാൻ,
ശ്വാസ വേഗങ്ങൾ നിലയ്ക്കും വരെ
ഒന്നായ് പുണർന്നു നമുക്കുറങ്ങാം.

പെൺ കിളി :
എങ്കിലീ ജീവിതം തീരും വരെ
നമുക്കൊപ്പം പറന്നിടാം വിണ്ണിലെന്നും.

ആൺകിളിയും പെൺകിളിയും കവിയോട് :

ഒരു കുട്ട പൂക്കൾ കടം തരുമോ
മണിയറ ഞങ്ങൾക്കലങ്കരിക്കാൻ..

കവി:
ഒരു വസന്തം തന്നു കൈതൊഴാം ഞാൻ..
എന്നും പ്രണയിച്ചു പാട്ടു പാടൂ...
പ്രണയത്തിൻ ചില്ലയിൽ ചേക്കേറുവാൻ
എന്നും കൊതിക്കുന്നു എൻ മനവും.

=================
സായ് ശങ്കർ, മുതുവറ
=================