പൊക്കമില്ലായ്മയാണെന്റെ പൊക്കം

പൊക്കമില്ലായ്മയാണെന്റെ പൊക്കം

നമ്മുടെ കുഞ്ഞുണ്ണി മാഷിനെ അറിയില്ലേ .മാഷിനെ
എനികക്ക് വളരെ ഇഷ്ട്ടമാണ്. മാഷിന്റെ കവിതകൾക്ക് പുറമെ മറ്റൊരു കാരണം കൂടിയുണ്ട് കേട്ടോ. കുഞ്ഞുണ്ണി മാഷു എന്നെപ്പോലെയാ പൊക്കമില്ല.പക്ഷെ ആ അഹങ്കാരംഗമൊന്നും ഞങ്ങൾക്ക് രണ്ടു പേർക്കുമില്ലാട്ടോ.

ചെറുപ്പം മുതലേ പൊക്കമില്ലായ്മയുടെ ഗുണങ്ങൾ ഒട്ടേറെ കിട്ടിയിട്ടുള്ള ഭാഗ്യവതികളിൽ ഒരാളാണ് ഈയുള്ളവളും. അച്ഛന് ഉയരം കുറവായിരുന്നതിനാൽ ആ സൽപ്പേര് നില നിർത്താനാണ് അടിയൻ പരിശ്രമിക്കുന്നതെന്ന് അഭിമാനപൂർവം പറയുമ്പോഴും ഒളികണ്ണിട്ടു അച്ഛനെ നോക്കിക്കൊണ്ട് മനസിലോർത്തു .'എന്നാലും അച്ഛാ എന്നോടീ ചതി..' ഹാ പോട്ടെ അപ്പൊ പറഞ്ഞു വന്നത് പൊക്കക്കുറവിന്റെ ഗുണങ്ങളെക്കുറിച്ചാണ്.

സ്കൂളിൽ പഠിക്കുമ്പോൾ അവിടെ അനുവർത്തിച്ചു വരുന്ന ഒരു സമ്പ്രദായമാണ് ബെഞ്ച് മാറ്റം. നിശ്ചിത ഇടവേളകളിൽമുന്നോട്ടും പിന്നോട്ടുമുള്ളൊരു ചാടിക്കളി !അത്ര തന്നെ. എന്തായാലും ആ കലാപരിപാടി നമുക്ക ബാധകമല്ല. നമുക്കെന്നു വച്ചാൽ പൊക്കമില്ലാത്തവർക്കു. കിട്ടിയില്ലേ അവിടെയൊരു വിഐപി പരിഗണന.
ഒന്നാം ക്ലാസ്സിൽ ഇട്ട ഉടുപ്പ് കീറിയില്ലെങ്കിൽ ഒരു അഞ്ചാം ക്ലാസ് വരെ ഉപയോഗിക്കാം! സംഗതി ലാഭമല്ലേ. (പക്ഷെ വണ്ണം വച്ചാൽ ഇക്കാര്യം മറന്നേക്കു). അസംബ്ലിയിൽ മുന്നിൽത്തന്നെ അത് നിര്ബന്ധമാ.മുൻ നിര വിട്ടൊരു കളിയില്ല. ചില സ്ഥലങ്ങളിൽ വേറെയും ഇളവുകളുണ്ട് . അത് വഴിയേ പറയാം.

പക്ഷെ ചില അപൂർവ നിമിഷങ്ങളിൽ ., ഉദാഹരണത്തിന് വിവാഹാലോചന മുതലായ പ്രക്രിയകളിൽ അതൊരു കുറവായി കാണുന്ന ഒരു പ്രത്യേക വിഭാഗമുണ്ട് അവരാണ് ' കല്യാണ ബ്രോക്കർമാർ' അവർ നമ്മളെ അടിമുടി നോക്കികൊണ്ട്‌ അവസാനമൊരു ചോദ്യമുണ്ട്. 'പൊക്കം കുറവാണല്ലേ? അഞ്ചടിയുണ്ടോ?' പക്ഷെ ഇതുകൊണ്ടൊന്നും നമ്മളെ തോൽപ്പിക്കാനാവില്ല മക്കളേ എന്ന മട്ടിൽ അയാളെ പുച്ഛിച്ചൊരു നോട്ടവും പാസ്സാക്കി തിരിഞ്ഞു നടക്കുമ്പോഴും മനസ്സിൽ സ്വയം ചോദിച്ചു നോക്കി 'ഉണ്ടോ അഞ്ചടി?'
അങ്ങനെ പൊക്കം പ്രശ്നമല്ലാത്ത ഒരു പൊക്കക്കാരനെ കിട്ടി .അങ്ങു കെട്ടി.സാധാരണ ഉയരക്കാരും നമുക്കു ബുർജ് ഖലീഫയാണല്ലോ.

ഭർത്താവു അങ്ങ് അറബി നാട്ടിലായതോണ്ട് ഒരു വിമാനവും പിടിച്ചു ചെന്നെത്തി അങ്ങ് മസ്കറ്റിൽ. അവിടെ ചെന്നപ്പോ ഒരു സംഭവമുണ്ടായി. അതാണ് നേരത്തെ സൂചിപ്പിച്ച ഒരു ഇളവിൻറെ കഥ. ഒരു ദിവസം ഞങ്ങൾ ഒരുകാർണിവൽ കാണാൻ പോയി .കൂടെ സുഹൃത്തുക്കളുമുണ്ട്. അവിടെ ചെന്നപ്പോൾ ദേ വാതിൽക്കലിരിക്കുന്നു ഒരു അറബി ചേച്ചി! സംഭവം വേറൊന്നുമല്ല പാസ് എടുക്കണം അകത്തു പ്രവേശിക്കണമെങ്കിൽ. എടുത്തുകളയാം. എന്നെ അവിടെ നിർത്തിയിട്ടു കെട്ടിയോനും കൂട്ടുകാരും ടിക്കറ്റ് എടുക്കുവാൻ പോയി. അവർ കുറച്ചു നേരമായി അറബി ചേച്ചിയുമായി സംസാരിക്കുന്നു. 'എന്തോ പന്തികേടുണ്ടല്ലോ. ചിക്കു എന്ന് മാത്രം കേൾക്കുന്നുണ്ട്' .സംഭവം പിന്നീടാണ് എനിക്ക് പിടി കിട്ടിയത് കുട്ടികൾക്കു പാസ് വേണ്ട. അറബി ചേച്ചി എന്നെ കുട്ടിയായി കണ്ടു കൊണ്ട് ഇളവ് അനുവദിച്ചിരിക്കുകയാണ്. ഞാൻ ചിക്കുവാനെന്ന്നാ ആ ചേച്ചിയുടെ വാദം അറബിയിൽ ചിക്കു എന്നാൽ കുട്ടി എന്നാണ്. പക്ഷെ രസം ഇതൊന്നുമല്ല അന്ന് എൻറെ വയറിനുള്ളിൽ 5 മാസം പ്രായമുള്ള മറ്റൊരു ചിക്കു ഉണ്ടായിരുന്നു! അറബി ചേച്ചിയെ പറഞ്ഞു മനസ്സിലാക്കി എന്റെ അരികിൽ വന്നു എന്നെ നോക്കി ഭർത്താവു നെടുവീർപ്പിട്ടുകൊണ്ടു പറഞ്ഞു ' ഈ ഇളവ് വല്ല ഫ്ലൈറ്റ് ടിക്കറ്റിനും കിട്ടിയിരുന്നെങ്കിൽ നിനക്ക് ജീവിതത്തിൽ ടിക്കറ്റ് എടുക്കേണ്ടി വരില്ലായിരുന്നു' ഇത് കേട്ടപ്പോൾ ഇത്തവണ അന്തം വിട്ടത് ഞാനാണ്.
നമുക്ക് ഇതൊക്കെ എന്ത?
എന്റെ
കുഞ്ഞുണ്ണി മാഷെ, അങ്ങ് പറഞ്ഞ പോലെ 'പൊക്കമില്ലായ്മയെന്റെ പൊക്കം'.

By princy Sankershine