പ്ലീസ്, ഇതാരും വായിക്കരുത്.

പ്ലീസ്, ഇതാരും വായിക്കരുത്.
********************************
മനുഷ്യരുടെ ഒരു പ്രത്യേകതയാണ് നിയന്ത്രണങ്ങളെ എതിർക്കുക. ചെയ്യരുത് എന്നു പറഞ്ഞവ ചെയ്യാനും, പറയരുത് എന്നു പറയുന്നവ പറയാനും,കാണരുത് എന്നു പറയുന്നവ കാണാനും ഉള്ള ആഗ്രഹം പ്രപഞ്ചോൽപ്പത്തി മുതൽ ഉണ്ട്.
ബൈബിളിൽ ആദത്തോട് ഈ ഒരു കനി ഭക്ഷിക്കരുത് എന്ന് ദൈവം പറഞ്ഞപ്പോൾ ആ ഒരു കനി ഭക്ഷിക്കുവാൻ ആണ് ആദത്തിനും ഹവ്വയ്ക്കും ഏറ്റവും കൂടുതൽ പ്രേരണയുണ്ടായത്.
അതും സാക്ഷാൽ ദൈവം തമ്പുരാൻ പോലും പറഞ്ഞിട്ട്. അപ്പോൾ പിന്നെ മനുഷ്യനായിട്ട് ഉള്ള നിയന്ത്രണങ്ങളെ എതിർക്കുവാൻ ഉള്ള പ്രേരണയെ പറ്റി പറയേണ്ടതില്ലല്ലോ?

രാജ്യത്തുള്ള ലൈംഗികാതിക്രമങ്ങൾ ലൈംഗിക വിദ്യഭ്യാസത്തിന്റെ പോരായ്മ കൊണ്ടാണ് എന്ന് പറയുന്നവർ ഏറെയുണ്ട്.
ഉന്നത വിദ്യഭ്യാസം നേടിയ എത്രയോ പേർ, രാഷ്ട്രീയ രംഗത്ത് നയിക്കുന്ന എത്രയോ പേർ കുത്തഴിഞ്ഞ ഈ അഴിഞ്ഞാട്ടങ്ങളുടെ പേരിൽ പിടിയിലാകുന്നു.
അപ്പോൾ വിദ്യഭ്യാസം അല്ല ഇതിന്റെ അളവ് കോൽ എന്ന് വ്യക്തം.
ലൈംഗിക വിദ്യഭ്യാസം അവശ്യമുള്ള ഒന്നു തന്നെ എന്നു വ്യക്തം.
അത് നന്നേ ചെറുപ്രായത്തിൽ തന്നെ വേണം എന്നു വാദിക്കുന്നത് ശരിയാണോ?
ശരീരവും മനസ്സും ഓരോന്നിനു പക്വത നേടുന്ന പ്രായത്ത് വേണം ഓരോന്ന് പഠിപ്പിക്കുവാൻ.

ഈയടുത്ത് സ്ക്കൂൾ ടെംബോ ഡ്രൈവറെ കുട്ടിയെ പീടിപ്പിച്ചു എന്ന് പറഞ്ഞ് നാണം കെടുത്തിയത് നാം വായിച്ചിട്ടുണ്ടാകും. കൗൺസിലിംങ്ങ് എന്ന് പറഞ്ഞ് എല്ലാവരും ഇന്ന് കൗൺസിലേഴ്സ് ആണ്.
അപക്വമായ മാർഗ്ഗ നിർദേശങ്ങൾ നൽകുന്ന എത്രയോ വ്യക്തികൾ ഈ മേഖലയിൽ ഉണ്ടാകും.

ഏറ്റവും പരമമായത് മാതാപിതാക്കൾ നല്ല മാതാപിതാക്കൾ ആവുക എന്നതാണ്.
മക്കളുമായി ഏറ്റവും അടുത്ത ബന്ധം സ്ഥാപിക്കണം.
മക്കളുടെ ഏറ്റവും അടുത്ത സുഹൃത്ത് ആകണം.
അവരുടെ ഒരു അധ്യാപകനാകണം.
അവർക്ക് എന്തും തുറന്ന് പറയുവാൻ സ്വാതന്ത്രവും വേണം. നല്ല പാഠങ്ങൾ വീട്ടിൽ നിന്നും തുടങ്ങണം.
അല്ലെങ്കിൽ വായിക്കരുത് എന്നു പറഞ്ഞാൽ വായിക്കാനും കാണരുത് എന്നു പറഞ്ഞാൽ കാണാനും ശ്രമിക്കും ഒപ്പം അതാണ് ശരി എന്ന് തെറ്റിദ്ധരിക്കുകയും ചെയ്യും.

By: ഷാജു തൃശ്ശോക്കാരൻ