അനുഭവങ്ങൾ പാളിച്ചകൾ

അനുഭവങ്ങൾ പാളിച്ചകൾ
****************************

പണ്ട്....

പണ്ട് .....

കൃത്യായിപ്പറഞ്ഞാൽ ഒരു ആറേഴ്‌ വർഷം മുൻപ് ...സുക്കറണ്ണന്റെ സ്വന്തം പ്രസ്ഥാനത്തിൽ ഞാനും അണിചേർന്നു ...

മ്മ്‌ടെ ഫേസ്ബുക്കിലേയ്....(ഒരു അന്തോം കുന്തോമില്ലെങ്കിലും എല്ലാത്തിലും പോയി തല വെച്ചു കൊടുക്കും )

പിന്നെ കുറച്ചൂസം കഴിഞ്ഞപ്പോ ....ദാ വരുന്നു ...നഴ്സറിയിൽ കൂടെ പഠിച്ചവര് തൊട്ട് ,തൊട്ടയല്പക്കത്തെ ടിട്ടു വരെ .പിന്നെ നാട്ടുകാരായി ,വീട്ടുകാരായി കൂട്ടുകാരായി ...ആകെ മേളം ...വഴിയിൽ കണ്ടാൽ ചിരിക്കാത്ത നാട്ടുകാര് വരെ സുഹൃത്തുക്കളായി ...

എന്നാലും വല്യേ അഭ്യാസമൊന്നും പിടിയില്ല ...

ഒന്നു പ്രൊഫൈൽ പിക്ച്ചർ മാറ്റണേൽ പോലും നാലാളോട് സംശയം ചോദിക്കണം ..

നമ്മളങ്ങോട്ട് വാരിക്കോരി ലൈക്കും ,കമന്റും കൊടുത്താലും ഒറ്റയൊരെണ്ണം ഇങ്ങോട്ട് തരില്ല ..ആകെ പത്തു ലൈക്കും ,രണ്ട് കമന്റും ...ഒരു നോട്ടിഫിക്കേഷൻ വരാൻ കൊതിച്ചനാളുകളിൽ ഞാൻ ജനലഴികളിലൂടെ വിദൂരതയിലേക്ക് നോക്കി ശോഭനയെപ്പോലെ പാടും ...

"വരുവാനില്ലാരുമൊരു
ലൈക്കുമായ് ...
ഈ വഴിക്കറിയാം ,
അതെന്നാലുമിന്നും ...
കൈതട്ടി വീണൊരു-
ലൈക്കെങ്ങാൻ വരുമെന്ന് ....
വെറുതെ കൊതിക്കാറുണ്ടെന്നും
ഞാൻ വെറുതെ ......
കൊതിക്കാറുണ്ടെന്നും ".....

നോട്ടിഫിക്കേഷനോ ഇല്ലാ ...

എന്നാപ്പിന്നെ മറ്റുള്ളോരുടെ പോസ്റ്റ് ഒക്കെ നോക്കി തേരാ പാരാ കറങ്ങിനടക്കാമെന്ന് കരുതി ഇറങ്ങും ..

അപ്പോ കാണാം ...

ആനിവേഴ്സറി ,

ബർത്ത്ടഡേ ,

പുതിയ ചെരുപ്പ് വാങ്ങിയത് ,

ഇന്നത്തെ അത്താഴം
സ്പെഷ്യൽ എന്നും പറഞ്ഞ് ടേബിളിൽ കുറേ കറികളും ചോറും നിരത്തി (രണ്ട് കറിയെങ്കിലും അയല്പക്കത്തുനിന്നു കടം വാങ്ങിക്കാണും )ഫോട്ടോ ഇടും ...

സ്വന്തം പിള്ളേര് വിശന്ന് കാറിക്കൂവി കരഞ്ഞാലും ഫോട്ടോ അപ്‌ലോഡ് ചെയ്യാതെ വിളമ്പി കൊടുക്കൂല ...

അങ്ങനെ കുറേനാൾ ....വല്ലപ്പോഴും ഒന്നു വരും ...തെങ്ങിൻ തോട്ടത്തിൽ വീണു കിടക്കുന്ന കൊട്ടത്തേങ്ങ പോലെ ഒന്നോ രണ്ടോ ലൈക്ക് വീണു കിട്ടും ...പിന്നെ ഇങ്ങു പോരും

അങ്ങനെ കുറേ കാലം കടന്നുപോയി ...

പിന്നെ കാണാം കുറേ ആപ്പുകൾ ...

നിങ്ങൾ കഴിഞ്ഞ ജന്മം ആരായിരുന്നു ?

നിങ്ങളുടെ ഭർത്താവ് ഏതു മോഹൻലാൽ കഥാപാത്രമായിരുന്നു ?

നിങ്ങളുടെ മുഖച്ഛായയുള്ള സിനിമാനടി ആരാണ് ?

നിങ്ങളുടെ ഛായയുള്ള സുഹൃത്ത് ആരാണ് ?

തുടങ്ങിയ ആപ്പുകൾ ...
എല്ലാത്തിലും കൊണ്ടുപോയി തല വെച്ചുകൊടുത്തു ...

കഴിഞ്ഞ ജന്മത്തിൽ ഒരു മരം വെട്ടുകാരനായിരുന്നെന്നും , ഭർത്താവ് ദൃശ്യത്തിലെ മോഹൻലാൽ ആണെന്നും ,എന്നെ കണ്ടാൽ നയൻതാരയെ പറിച്ചു വെച്ചിരിക്കയാണെന്നും ,എന്റെ ഛായയുള്ള സുഹൃത്ത് എന്റെ മോള് ആണെന്നും അവര് പറഞ്ഞു തന്നു ..

ഈ വക ആപ്പുകളൊക്കെ നമ്മുടെ പ്രൊഫൈലിലെ എല്ലാ വിവരങ്ങളും ചൂണ്ടാനുള്ള പണിയാണെന്നും ..നമ്മളെ ആപ്പിലാക്കുമെന്നും മനസ്സിലായപ്പോ ആ പണി വിട്ടു ..

അങ്ങനെ സൂചി വിഴുങ്ങിയ പിള്ളേർക്ക് ഷെയർ കൊടുത്ത് ( നമ്മടെ പറമ്പിന്റെ ഷെയർ അല്ലാട്ടാ ...)ഒരു രൂപ കൊടുപ്പിച്ചു കാരുണ്യപ്രവർത്തനങ്ങൾ ചെയ്തു പോരുന്ന കാലം .

അപ്പഴാണ് ഒരു കൂട്ടുകാരി വഴി ഇവിടെ എത്തിച്ചേരുന്നത് ...കുറേ നല്ല നല്ല എഴുത്തുകൾ ,നല്ല കഥകൾ കവിതകൾ ...അതിനൊക്കെ മനോഹരമായ കമന്റുകൾ ...കമന്റുകൾ കണ്ടാൽ അറിയാം എല്ലാവരും ഒരേ കുടുംബത്തിലെ അംഗങ്ങളെപ്പോലെ പരസ്പരം സ്നേഹോം ബഹുമാനവും ഉള്ളവർ ...

കുറേ നാള് കഥ വായിച്ചിട്ട് ഒരു നാൾ ഞാനും ഒരു പോസ്റ്റ് ഇട്ടു ..

ഒരു മോഹത്തിന്...

അപ്പോഴതാ ...

ആദ്യത്തെ ലൈക്കും ,കമന്റും തന്നൊരു സുഹൃത്ത് രംഗത്ത് വന്നു ....( അതിന് ശേഷം അദ്ദേഹത്തിന് വെച്ചടി വെച്ചടി കയറ്റമായിരുന്നു ട്ടാ ...)

പിന്നെ കുറേ പേര് ,നല്ല അഭിപ്രായങ്ങളും ,ആശംസകളും ,
അഭിനന്ദനങ്ങളുമൊക്കെ ആയി വന്നു ...

പണ്ടൊക്കെ എന്തെങ്കിലും ഒന്നെഴുതി ,വീട്ടിൽ ആരെയെങ്കിലും കാണിച്ചാൽ മുട്ടൻ വഴക്ക് കേൾക്കുമായിരുന്നു .പഠിക്കാനുള്ള നേരത്ത് ഓരോ വേണ്ടാതീനം എഴുതിവെക്കും എന്ന് പറഞ്ഞ് ...

ഒരിക്കൽ സ്കൂളിൽ പഠിക്കുമ്പോ ചെറുകഥക്ക് സമ്മാനം കിട്ടിപ്പോ ടീച്ചർ ഒരു നല്ല വാക്ക് പറഞ്ഞതെ ഓർമയിലുള്ളു ...

പിന്നെ ഇപ്പഴാണ് കുറേ പേര് നല്ലതെന്നും ,അപാകതകളും പറഞ്ഞു തരുന്നേ ...സന്തോഷായി ...

പിന്നേം ഇവിടെ കഥകൾ വായിക്കും ...

കഥയിലൂടെയും കമന്റിലൂടെയും ഇവിടന്നും കുറച്ചു കൂട്ടുകാരെ കിട്ടി ...

കുറച്ചു കഴിഞ്ഞപ്പോ ഒന്നൂടെ എഴുതി ....

അങ്ങനെ സന്തോഷായി നടക്കണ കാലം ..

കഥകൾ വാളിലും ഇടും .നേരത്തെ പറഞ്ഞ ഫ്രണ്ട്സ് ഒക്കെ വായിക്കും ,നാട്ടുകാര് വായിക്കും ..ചിലര് അഭിപ്രായം പറയും ..

ബട്ട് ..ചില അഭ്യുദയകാംക്ഷികളുണ്ട്‌ ...ഇവിടെ കമന്റൂല ...സുക്കറണ്ണനെ പേടിച്ചാവും !!
ഭരതേട്ടനോടാണ് കമന്റ് ..

" ഭാര്യ ഓരോന്നൊക്കെ എഴുതുന്നുണ്ടല്ലോ ,വായിക്കാറുണ്ട് !!

ഒരു വരി കമന്റില് കുറിക്കില്ല ...

കഴിഞ്ഞ ആനിവേഴ്സറിക്ക് ,മത്തങ്ങാ പോലിരിക്കണ അവനും ,വെളുത്തു മെലിഞ്ഞ് ഉയരം കുറഞ്ഞ ഭാര്യയും കൂടി നിൽക്കുന്ന ഫോട്ടോക്ക് ,

" മെയ്ഡ് ഫോർ ഈച്ച് അദർ "

എന്ന് കമന്റുകൊടുത്ത എന്നോട് തന്നെ വേണമിത് ....

***********************

അങ്ങനിരിക്കെ ...ചില സുപ്രൻമാരെ പരിചയപ്പെട്ടു ..

ഓഹ് ...സുപ്രനെ അറിയില്ലല്ലേ ....

കോപ്പി പേസ്റ്റ്കാരുടെ ഓമനപ്പേരാ ...അവരെങ്ങാനാന്നു വെച്ചാ ...

ആകാശത്തിലെ പറവകളെപ്പോലെയാ ...അവര് ചിന്തിക്കുന്നില്ല ,ടൈപ്പുന്നില്ല ,വാളിൽ സൂക്ഷിക്കുന്നില്ല ...നേരെ കോപ്പി എടുത്തത് അപ്പ്രൂവലിനു സമർപ്പിക്കും ...ഒറിജിനലിനേക്കാൾ കൂടുതൽ ലൈക്കും ,കമന്റും ഇവിടെ ആയിരിക്കും ..

പിന്നെ മീശമാധവനെപ്പോലെയാ ...മാധവൻ കട്ടതൊന്നും ചേക്ക് വിട്ട് പോയിട്ടില്ലെന്നപോലെ ....ഫേസ്ബുക്ക് വിട്ട് ഒരു മോഷണമുതലും പുറത്ത് പോയിട്ടില്ല ,അത്‌ സത്യം !!

*********************

അങ്ങനെയിരിക്കെ ഓണം വന്നു ...ഇവിടന്നു സമ്മാനങ്ങളുമായി ചിത്രദീപയെ കാണാൻ മാവേലി സൗദിയിൽ പോയി ....മാവേലിയുടെ കൈയിൽ ഇങ്ങോട്ടും ഒരു കെട്ട് സാധനങ്ങള് കൊടുത്തു വിട്ടു ...അങ്ങനെ എല്ലാരും ഒരു കുടുംബത്തിലെ അംഗങ്ങളെപ്പോലെ ആ കഥവായിച്ചു സന്തോഷിച്ചു ചിരിച്ചു ..

ചിരിയുടെ കാര്യം പറയണ്ട ...ഓരോരുത്തര് നല്ല രസമായിട്ട് ചിരിക്കഥകൾ എഴുതും ..അത്‌ പിന്നെ മനസ്സിന്നു പോവില്ല ...സങ്കടങ്ങളും കാണും ..അത്‌ കൂടെ കൂട്ടില്ല ..ബസ്സിലിരിക്കുമ്പഴാവും ഓരോന്ന് ഓർമ്മ വരാ ..

ഓൺലൈൻ ഓമനയും ,ജ്യൂസ് കുടിക്കണ മലേഷ്യക്കാരനും ,ഹെൽത്ത് ക്ലബ്ബിലെ അമ്മയും ,റിസർച്ച് ക്ലാസ്സിലെ എക്സ്ട്രാക്ഷനും ,കളഞ്ഞു കിട്ടിയ പേഴ്‌സിലെ കൽക്കണ്ടവും ,കിടുക്കാച്ചി ചേച്ചിയും ,ആറുവരിപ്പാതയും ,തവളക്കും ,മീനിനും ചായമടിച്ച നിഷ്കളങ്കയും, ശ്രീകൃഷ്ണപ്പരുന്ത് സിനിമ സെക്കന്റ് ഷോ കാണാൻ പോയതും ,ടൈ കെട്ടിയ കോഴിയും ,ബോബൻ പ്രണയവും
ആനവാക്കും ,, ലൈക്കിനും കമന്റിനും സാരിവാങ്ങിയതും , നിരഞ്ജൻ ആയ ലാലേട്ടനെയും....ഒക്കെ അങ്ങട് ഓർമയിലേക്കോടി വരും ...ചിരി അടക്കാൻ പറ്റില്ല ..എന്നാണാവോ ആൾക്കാരെന്നെ ബസ്സിന്ന് ഇറക്കിവിടണേ ...പിന്നെ ചിരി വന്നാൽ രണ്ട് ചുമയിലേക്ക് തിരിച്ചുവിടാൻ എനിക്കു പണ്ടേ അറിയാം !!!

ഇപ്പൊ ഉള്ളൊരു പ്രശ്‍നം മെൻഷിക്കലാണ് ..

അമ്മുവിനാണ് മെൻഷൻ അസുഖം കൂടുതൽ ...വായിച്ച് ഇഷ്ടപ്പെട്ടാൽ എന്നെയങ്ങ് മെൻഷിക്കും ...ബിനി എന്നൊക്കെ പേരിട്ട അച്ഛനെ പറഞ്ഞാൽ മതി ..വല്ല "സിനിമാവോഭണ്ഡാരനായകെ " എന്നൊക്കെ ഇട്ടിരുന്നേൽ ഇങ്ങനെ മെൻഷിക്കില്ലായിരുന്നു ..

ബസ്സിലിരിക്കുമ്പോ മെൻഷൻ കിട്ടും ...

ഞങ്ങടെ ബസ്സ്റൂട്ട് ആണെങ്കി സൂപ്പറാ ...

നിറയെ കുണ്ടും കുഴിയും ഗർത്തങ്ങളും ആണ് ...ബസ്സ് ഇങ്ങനെ ആടിയാടി കുണ്ടിലൊക്കെ ചാടി ഒരുമാതിരി 'വണ്ടർലാ'യിലെ റൈഡ് പോലെയാ....അതിനിടയിൽ എങ്ങിനെയെങ്കിലും കഥ വായിക്കും ...കമന്റിടാൻ പറ്റൂല ....അപ്പ വരും ഭീഷണി .

" എന്താ കമന്റാത്തെ " ....

എന്റെ കമന്റ് ഇഷ്ട്ടാണത്രെ ...

ഞാൻ മനസ്സിൽ പറയും "ഞാൻ ഇപ്പൊ ഐ .സി .യു വിൽ കെടക്കണ പേഷ്യന്റിന്റെ അവസ്ഥയിലാ ...എല്ലാം കാണുന്നുണ്ട് വായിക്കുന്നുണ്ട് ...ഒരു വാക്ക് മിണ്ടാൻ വയ്യ " ..

പിന്നെ ചില മെൻഷനൊന്നും നമ്മള് കാണൂല ...ചറ പറ നോട്ടി അല്ലേ ..എവിടെയെങ്കിലും കമന്റിയാൽ പിന്നെ അതിനെ ആരൊക്കെ കമന്റിയാലും നമ്മളോട് വന്ന് പറയും ..പണ്ട് ഒരു നോട്ടിഫിക്കേഷന് കൊതിച്ചതിനുള്ള ശിക്ഷ ..ഒന്നു കണ്ണടച്ചു തുറന്നാൽ മിനിമം 50 നോട്ടി വരും .

ചിലർക്ക് ഒരു അസുഖമുണ്ട് ...പോസ്റ്റ് വായിച്ചുകഴിഞ്ഞു നേരെ പ്രൊഫൈലിലൊട്ടൊരു വരവാണ് ..പിന്നെ എന്തോ മറന്നുവെച്ചമാതിരി ഭയങ്കര തിരച്ചിലാണ് ..നമ്മുടെ ആദ്യത്തെ പോസ്റ്റിന്റെ അസ്ഥികൂടത്തെ വരെ പൊക്കിയെടുത്ത് ലൈക്കിട്ടെ പോവൂ ...പിന്നെ അവരെ കാണില്ലട്ടോ ..

അതിനിടയിൽ കാണാം ...പുതിയ അംഗങ്ങളുടെ കലാപരിപാടി ...ഏതേലും ഒരാളുടെ എഴുത്ത് ഇഷ്ടപ്പെട്ടാൽ പിന്നെ അവരുടെ വാളിൽ പോയി ആദിപുരാതനകാലം തൊട്ടുള്ള കഥയൊക്കെ കമന്റി അങ്ങ് മേലെ കൊണ്ടു വരും ...അപ്പോ ആവേശത്തോടെ അതും വായിച്ചു കമന്റും ...

കമന്റിടാൻ ഒരു ബുക്ക് ഇറങ്ങിയിട്ടുണ്ടത്രെ ....

ഓർഡർ കൊടുക്കണം !!!

ചില കമന്റുകൾ ഒരു അംഗീകാരമാണ് ..ഒരിക്കൽ എന്റെ പോസ്റ്റില് ഉണ്ണിമാഷ്‌ടെ ഒരേ കമന്റ് രണ്ട് തവണ ...നെറ്റ്‌ പ്രോബ്ലം ആയിരിക്കും ..എന്തായാലും ഓസ്കർ കിട്ടിയ സന്തോഷം തോന്നി ...( നെറ്റ്‌ സ്ലോ നോടൊക്കെ ഒരു ബഹുമാനോം )

പിന്നെ ചിലരുണ്ട് ....ഒന്നു പരിചയപ്പെട്ട് ഫ്രണ്ട് ആയാൽ പിന്നെ നമ്മളെ തട്ടികൊണ്ടോയി പലപല ഗ്രൂപ്പിലും ചേർക്കും ...നമ്മള് പിന്നെ കയ്യോടെ ചാടിപ്പോരും ...

ഇതിപ്പോ മൊത്തം ഇവിടന്നു വിട്ടു പോവാമെന്നു വെച്ചാൽ അതും പറ്റൂല ...ലഹരിക്കടിമപ്പെട്ട പോലെ ആയി ...പല പ്രശ്നങ്ങളുമുണ്ട് ...പക്ഷേ തലയൂരിപോരാനും തോന്നുന്നില്ല ..

എന്തോ ഒരു മാസ്മരികത,സ്നേഹത്തിന്റെ കാണാനൂലിലാലൊരു ബന്ധനം ...

എന്തോ ...ഇഷ്ടമാണ് നല്ലെഴുത്ത് !!!

#ബിനിഭരതൻ .