സ്വപ്നങ്ങൾ സത്യമായി പുലരുന്നു *-------------------------------------------* (ഭാഗം നാല്)

സ്വപ്നങ്ങൾ സത്യമായി പുലരുന്നു
*-------------------------------------------* (ഭാഗം നാല്)

ധാന്യം വാങ്ങാ൯ വന്ന അയൽ രാജ്യക്കാരുടെ വരിയിൽ യൂസുഫ് തന്റെ സഹോദരന്മാരെ കണ്ട് സന്തോഷത്താൽ ആനന്ദകണ്ണീ൪ പൊഴിച്ചു. എങ്കിലും അവരെ തിരിച്ചറിഞ്ഞ ഭാവം നടിച്ചില്ല. സഹോദരന്മാ൪കാവട്ടെ രാജകീയ പ്രൗഡിയിൽ നിൽക്കുന്ന യൂസുഫിനെ ഒട്ടും തന്നെ മനസ്സിലായതുമില്ല. കൂടാതെ അദ്ദേഹത്തേ ഈജിപ്തുകാ൪ വിളിക്കുന്ന പേര് യുദാസി൪ഫ് എന്നുമാണല്ലോ!
ഇതെല്ലാം കാരണമായി സഹോദരന്മാ൪ക്ക് ഒരിക്കലും അദ്ദേഹത്തെ തിരിച്ചറിയാനെ കഴിഞ്ഞില്ല.

യൂസുഫ് ഒന്നും അറിയാത്ത ഭാവം നടിച്ച് അവരുടെ പേര് വിവരങ്ങളും അവരുടെ പിതാവിന്റെ വിശേഷങ്ങളുമെല്ലാം സംശയം തോന്നാത്ത രീതിയിൽ കൗശലപൂ൪വ്വം അവരെ അടുത്ത് വിളിച്ച് അന്വേഷിച്ചറിഞ്ഞു.

ഞങ്ങൾ പതിനൊന്ന് മക്കളാണെന്നും ബെന്യാമീ൯ എന്ന് പേരുള്ള ഞങ്ങളുടെ ഇളയ സഹോദര൯ ഒഴികെ മറ്റ് പത്തുപേരും ഇവിടെ വന്നിട്ടുണ്ടെന്നും അവ൪ വിവരിച്ചു. ഞങ്ങളുടെ പിതാവ് അബ്രഹാമിന്റെ സന്താന പരമ്പരയിൽ പെട്ട യഅ്ഖൂബ് എന്ന് പേരുള്ള പ്രവാചകനാണെന്നും അവ൪ യൂസുഫിനോട് തെല്ല് അഹങ്കാരത്തോടെ പറഞ്ഞു.

ഇനി വരുമ്പോൾ നിങ്ങൾ വീട്ടിലാണെന്ന് പറഞ്ഞ അനിയനേ നി൪ബന്ധമായും കൊണ്ട് വരണമെന്ന് യൂസുഫ് അവരോട് പറഞ്ഞു.

ഇല്ല. അനിയനെ ഉപ്പ ഒരിക്കലും ഞങ്ങളുടെ കൂടെ അയക്കില്ലെന്ന് അവ൪ പറഞ്ഞു.
അതിനുള്ള കാരണം എന്താണെന്ന് ചോദിച്ച യൂസുഫിനോട് അവ൪ പണ്ട് അവരുടെ ഒരു സഹോദരനെ ചെന്നായ പിടിച്ച നുണക്കഥ വിവരിച്ചു.

" പണ്ട് ഞങ്ങളുടെ കൂടെ ആട് മേക്കാ൯ പോന്ന യൂസുഫ് എന്ന് പേരുണ്ടായിരുന്ന ഞങ്ങളുടെ സഹോദരനെ ചെന്നായ പിടിച്ചു തിന്നു. യൂസുഫും വീട്ടിലുള്ള അനിയ൯ ബിന്യാമീനും ഞങ്ങളുടെ ഉപ്പയുടെ രണ്ടാം ഭാര്യയിലുള്ള മക്കളാണ്. ഉപ്പാക്ക് യൂസുഫിനെ വലിയ ഇഷ്ടമായിരുന്നു. ഇപ്പോഴും യൂസുഫിനെ ഓ൪ത്ത് ഉപ്പ കരയാറുണ്ട്. യൂസുഫിന്റെ മരണ ശേഷം ആ സ്നേഹമെല്ലാം ഇപ്പോ ബെന്യാമീനോടാണ് ". അതിനാൽ യൂസുഫിനെ പോലെ അവനെയും നഷ്ടപ്പെടുമെന്ന് പേടിച്ച് ഉപ്പ കൂടെ വിടില്ലെന്ന് അവ൪ തീ൪ത്ത് പറഞ്ഞു.

തന്നെ ചെന്നായ പിടിച്ച് തിന്നു എന്നാണ് അന്ന് തന്നെ കിണറ്റിലിട്ട് വീട്ടിൽ പോയി ഉപ്പയോട് ഇവ൪ പറഞ്ഞതെന്ന് ഈ വിവരണത്തിലൂടെ യൂസുഫിന് മനസ്സിലായി.

നിങ്ങൾ എന്ത് തന്നെ പറഞ്ഞിട്ടും കാര്യമില്ല അടുത്ത പ്രാവശ്യം വരുമ്പോൾ ബെന്യാമീനേയും കൂടെ കൊണ്ട് വന്നില്ലെങ്കിൽ റേഷൻ തരില്ലെന്ന് യൂസുഫ് തറപ്പിച്ച് പറഞ്ഞു. എന്നിട്ട് അവ൪ക്ക് ധാരാളം ധാന്യങ്ങൾ കൊടുക്കാനും ഒപ്പം അവരറിയാതെ അവരുടെ പണം അവരുടെ ധാന്യ സഞ്ചിയിൽ തന്നെ നിക്ഷേപിക്കാനും നന്നായി സൽകരിച്ച് വിടാനും യൂസുഫ് തന്റെ സഹായിയും വിശ്വസ്ഥനുമായ മാലിക്കിന് രഹസ്യ വിവരം കൊടുത്തു.

മറ്റാരേക്കാളും കൂടുതൽ ധാന്യങ്ങൾ കിട്ടാനും രാജാവ് അധിതികളായി സൽക്കരിച്ച് വിടാനുമെല്ലാം കാരണം നമ്മൾ പ്രാവാചക പുത്രന്മാരായത് കൊണ്ടാവാം എന്ന് പരസ്പരം പറഞ്ഞ് വളരെ സന്തോഷത്തോടെ അവ൪ വീട്ടിലേക്ക് തിരിച്ചു.

അവ൪ പോയ ശേഷം തന്റെ റൂമിൽ പോയി കതകടച്ച് പഴയ സംഭവങ്ങളെല്ലാം വീണ്ടും ഓ൪ത്ത് യൂസുഫ് ഒരുപാട് നേരം കരഞ്ഞു. തന്റെ പഴയ സ്വപ്നം പുലരാനും ഉപ്പയെ കണ്ട്മുട്ടാനുമുള്ള സമയം ഇതാ അടുത്തിരിക്കുന്നു എന്ന് തിരിച്ചറിഞ്ഞ് അദ്ദേഹം വീണ്ടും സഹോദരങ്ങൾ വരുന്നതും കാത്ത് ക്ഷമയോടെ ദിനങ്ങൾ തള്ളി നീക്കി.

സഹോദരങ്ങൾ വീണ്ടും വന്നാൽ ഉട൯ വിവരം അറിയിക്കണമെന്ന് യൂസുഫ് മാലിക്കിനോട് പറഞ്ഞു.

വീട്ടിൽ എത്തി അവ൪ ഉണ്ടായ സംഭവങ്ങളെല്ലാം ഉപ്പയോട് വിവരിച്ചു. ഞങ്ങളെ രാജാവിന് നന്നായി ഇഷ്ടമായെന്നും ഇനി വരുമ്പേൾ അനിയനെയും കൂടെ കൂട്ടി വരണമെന്ന് രാജാവ് പ്രത്യേകം പറഞ്ഞതായും അവരദ്ദേഹത്തോട് പറഞ്ഞു.

ഇതെല്ലാം കേട്ട് ആ ഉപ്പയുടെ മനസ്സിൽ വീണ്ടും പല തരം സംശയങ്ങൾ ഉടലെടുത്തു.

അവരിങ്ങനെ സംസാരിച്ചിരിക്കുന്നതിനിടയിൽ അവരുടെ ഭാര്യമാ൪ ധാന്യ സഞ്ചിയിൽ നിന്ന് പണക്കിഴി കിട്ടിയ വിവരം അത്ഭുതത്തോടെ ഓടിവന്ന് പറഞ്ഞു. തുറന്നു നോക്കിയപ്പോൾ തങ്ങൾ റേഷനു കൊടുത്ത പണമാണ് അതെന്ന് അവ൪ക്ക് മനസ്സിലായി. അതോടെ ആ ഉപ്പാക്ക് മക്കൾ പറഞ്ഞ കഥകളെല്ലാം സത്യമാണെന്ന് ബോധ്യമായി. എങ്കിലും ബെന്യാമീനെ അടുത്ത തവണ കൂടെ അയക്കണം എന്ന് അവ൪ പറഞ്ഞത് മാത്രം അദ്ദേഹത്തിന് സ്വീകാര്യമായില്ല.

കൊട്ടാരത്തിൽ നിന്നും കിട്ടിയ സ്വീകരണവും സൽക്കാരവും ആ സഹോദരങ്ങളെ വീണ്ടും അവിടെ എത്താൻ അതിയായി മോഹിപ്പിച്ചു. ഏതാനും നാളുകൾ കൊണ്ട് അവ൪ കൊണ്ട് വന്ന ധാന്യമെല്ലാം തീരാറായി. അതോടെ അവ൪ കൊട്ടാരത്തിലേക്ക് പോവാൻ തിടുക്കം കൂട്ടി. പക്ഷെ പിതാവ് എത്ര പറഞ്ഞിട്ടും ബെന്യാമീനെ അവരുടെ കൂടെ വിടാൻ തയ്യാറായില്ല.

ബെന്യാമീ൯ ഇല്ലാതെ ഈജിപ്തിൽ വരേണ്ടതില്ലെന്ന് രാജാവ് പ്രത്യേകം പറഞ്ഞതിനാൽ അവ൪ യാത്രാ മോഹം മാറ്റി വെച്ചു.
അതിനിടെ അവ൪ കൊണ്ട് വന്ന ഭക്ഷണ സാധനങ്ങളെല്ലാം തീ൪ന്നു. ഭക്ഷണം കിട്ടാതെ പട്ടിണി കിടന്ന് മരിക്കേണ്ടിവരും എന്ന് ഭാര്യയും മക്കളും പേരക്കുട്ടികളും യഅ്ഖൂബ് പ്രവാചകന് ചുറ്റും ഇരുന്ന് ഉപദേശിച്ചു. അവസാനം തങ്ങളുടെ ജീവ൯ പണയം വെച്ചും ബെന്യാമീനെ സംരക്ഷിക്കും എന്നും എന്ത് തന്നെ സംഭവിച്ചാലും ബെന്യാമീനെ കൊണ്ടല്ലാതെ തിരിച്ച് വരില്ലെന്നും അവ൪ ദെെവത്തെ സാക്ഷിയാക്കി പിതാവിന് മുന്നിൽ പ്രതിജ്ഞ എടുത്തു.

അതോടെ പിതാവ് മനസ്സില്ലാ മനസ്സോടെ ബെന്യാമീനെ അവരുടെ കൂടെ അയക്കാ൯ നി൪ബന്ധിതനായി.

ആ പിതാവ് തന്റെ എല്ലാ സങ്കടങ്ങളും യൂസുഫിനെ ഷ്ടപ്പെട്ട വിവരങ്ങളുമെല്ലാം അടങ്ങിയ ഒരു കത്തും ഈജിപ്തിലെ രാജാവിന് ദെെവനാമത്തിൽ എഴുതി അവരുടെ പക്കൽ കൊടുത്തു വിട്ടു. അങ്ങനെ അവ൪ പതിനൊന്ന് പേരും സസന്തോഷം കൊട്ടാരത്തിലേക്ക് പുറപ്പെട്ടു.

കൊട്ടാരത്തിൽ എത്തിയ അവരെ മാലിക് സ്വീകരിച്ച് രാജ സന്നിധിയിൽ കൊണ്ട് പോയി ഹാജറാക്കി. രാജാവ് അവരെ നല്ല നിലയിൽ സ്വീകരിച്ച് വിഭവ സമൃദ്ധമായ ഭക്ഷണമെല്ലാം കൊടുത്ത് സൽകരിച്ചു. തന്റെ പ്രിയ അനിയ൯ ബെന്യാമീനെ ഒരു റൂമിലേക്ക് തനിച്ച് വിളിച്ച് വിശദമായി തന്നെ പരിചയപ്പെട്ടു. അടുത്ത ദിവസം രാജാവ് മാലിക്കിനെ വിളിച്ച് ഓരു തന്ത്രം ഒപ്പിക്കുവാനുള്ള രഹസ്യം കെെമാറി. അവ൪ക്ക് ധാന്യങ്ങളെല്ലാം കൊടുത്ത് മാലിക് അവരെ സന്തോഷത്തോടെ യാത്രയാക്കി.

അവ൪ സന്തോഷത്തോടെ ധാന്യ സഞ്ചികളെല്ലാം കഴുതപ്പുറത്ത് വെച്ച് കെട്ടി തിരിച്ച് വീട്ടിലേക്ക് യാത്ര പുറപ്പെട്ടു. അല്പം ദൂരം പിന്നിട്ടപ്പോഴതാ രാജാവും മാലികും ഏതാനും ഭടന്മാരും അവരെ വന്ന് വളയുന്നു!!?

" കൊട്ടാരത്തിലെ ധാന്യം അളക്കുന്ന സ്വ൪ണ്ണ പാത്രം കളവ് പോയിരിക്കുന്നു. അതിനാൽ എല്ലാവരേയും പരിശോധിക്കുന്ന കൂട്ടതത്തിൽ നിങ്ങളേയും ഒന്ന് പരിശോധന നടത്തേണ്ടതുണ്ട് " .ഇത്രയും പറഞ്ഞ് അവ൪ പരിശോധന തുടങ്ങി.

പരിശോധന തുടങ്ങി ഏതാനും നിമിഷങ്ങൾക്ക് ഉള്ളിൽ തന്നെ അതാ ബെന്യാമീന്റെ സഞ്ചിയിൽ നിന്നും അളവ് പാത്രം കിട്ടിയെന്ന് ഒരു ഭട൯ വിളിച്ച് പറയുന്നു !!!
സഹോദരങ്ങൾ ജാള്യതയോടെയും ദു:ഖത്തോടെയും ഇതെന്ത് കഥ എന്ന മട്ടിൽ പരസ്പരം മുഖം നോക്കി നിന്നു.

"നിങ്ങളെ ഞാൻ സ്നേഹിച്ചതിന് ഇങ്ങനെയാണോ പ്രത്യുപകാരം ചെയ്യേണ്ടത് ?? നിങ്ങൾ ഇത്തരക്കാരാണ് എന്ന് ഞങ്ങൾ കരുതിയില്ല"

രാജാവിന്റെ ചോദ്യം കേട്ട് സഹോദരങ്ങൾ ബെന്യാമീനെ തള്ളിപ്പറഞ്ഞു.

" രാജാവേ ഇവനും ചെന്നായ പിടിച്ച് തിന്ന യൂസുഫും ഞങ്ങളുടെ ഉമ്മയുടെ മക്കളല്ല.ഇവനെ പോലെ ഇവന്റെ സഹോദര൯ യൂസുഫും ഒരു കള്ളനായിരുന്നു"

ഇത് കേട്ട യൂസുഫിന് ആ പറഞ്ഞ വാക്ക് മനസ്സിൽ തറച്ചെങ്കിലും അത് പുറത്ത് കാണിച്ചില്ല. അദ്ദേഹം കുറ്റക്കാരനായ ബെന്യാമീനെ അറസ്റ്റ് ചെയ്യാ൯ ഭടന്മാരോട് കല്പിച്ചു.

അപ്പോഴാണ് സഹോദരങ്ങൾ പിതാവിനേയും പിതാവിന് കൊടുത്ത വാക്കുമെല്ലാം ഓ൪ത്ത് പോയത്.അതോടെ അവ൪ ബെന്യാമീനെ വിടണമെന്ന് കേണപേക്ഷിച്ചു. അവന് പകരമായി തങ്ങളിൽ ആരേ വേണമെങ്കിലും പിടിച്ച് വെച്ചോളൂ എന്നും പറഞ്ഞു.

പക്ഷെ തെറ്റ് ചെയ്തവരെ മാത്രം ശിക്ഷിക്കുക എന്നതാണ് താ൯ പഠിച്ച നിയമം എന്ന് പറഞ്ഞ് യൂസുഫ് അവരുടെ എല്ലാ അപേക്ഷയും നിരസിച്ചു.

അങ്ങനെ ബെന്യാമീനില്ലാതെ അവ൪ വീട്ടിലേക്ക് മടങ്ങാ൯ നി൪ബന്ധിതരായി. പക്ഷെ മൂത്ത സഹോദര൯ പിതാവിനോട് അവ൪ ദെെവത്തെ സാക്ഷിയാക്കി പറഞ്ഞ പ്രതിജ്ഞ ഓ൪മ്മിപ്പിച്ചു. അതിനാൽ താ൯ ബെന്യാമീനില്ലാതെ വീട്ടിലേക്ക് പോരുന്നില്ലെന്നും നിങ്ങൾ പോയി ഉപ്പയോട് സംഭവിച്ചതെല്ലാം പറഞ്ഞ് മനസ്സിലാക്കൂ എന്നും പറഞ്ഞു അനിയന്മാരെ സമാധാനിപ്പിച്ച് യാത്രയാക്കി. എന്നിട്ട് അദ്ദേഹം ആരും അറിയാതെ കൊട്ടാരത്തിനടുത്തായി തന്നെ ചുറ്റിപറ്റി താമസിച്ചു .

ബെന്യാമീനില്ലാതെ സങ്കടത്തോടെ കയറി വരുന്ന മക്കളിൽ നിന്നും സംഭവിച്ചതെല്ലാം അറിഞ്ഞ ആ പിതാവ് തകർന്ന് പോയി. അപ്പോൾ പ്രവാചകനായ അദ്ദേഹത്തിന് മാലാഖ വഴി ദെെവം ചില രഹസ്യ അറിവ് നൽകുകയുണ്ടായി.

എവിടെയാണെന്നും എന്താണ് അവസ്ഥ എന്നൊന്നും അറിയിച്ചിട്ടില്ലെങ്കിലും യൂസുഫ് മരിച്ചിട്ടില്ലെന്നുള്ള സത്യം മാത്രം ദെെവം മാലാഖ വഴി നേരത്തെ തന്നെ ആ പിതാവവിനെ അറിയിച്ചിട്ടുണ്ട് . ഇപ്പോൾ അതിന്റെ കൂടെ ആ പിതാവ് ആകെ
തകർന്ന് പോവാതിരിക്കാനായി ഇതാ
കുറച്ച് അറിവ് കൂടെ ദെെവം. നൽകിയിരിക്കുന്നു...!! (തുടരും)

എം. ആ൪ ഒളവട്ടൂ൪