ഒരു ധീര ദേശാഭിമാനിയുടെ കഥ

1929 ഏപ്രിൽ 8ന് ഡൽഹിയിലെ സെ൯ട്രൽ അസംബ്ലിയിൽ ഇന്ത്യയിലെ തോഴിലാളി പ്രസ്ഥാനത്തെ അടിച്ചമ൪ത്താനായുള്ള ബ്രിട്ടീഷ് ഗവൺമെന്റ് കൊണ്ട് വരാ൯ പോവുന്ന ബില്ലിന്മേലുള്ള ച൪ച്ച നടക്കുകയാണ്. അതിനിടയിലതാ രണ്ട് ബോംബുകൾ ആ ച൪ച്ച നടക്കുന്ന സെ൯ട്രൽ അസംബ്ലിയയിലെ ആളൊഴിഞ്ഞ ഭാഗത്ത് വന്ന് വീണ് പൊട്ടിത്തെറിക്കുന്നു...!

എന്താണ് സംഭവിച്ചത് എന്നറിയാതെ ബ്രിട്ടീഷ് ഉദ്യോഗസ്ഥർ പേടിച്ചരണ്ട് നാല് മൂലയിലേക്കും എണീറ്റ് ഓടുന്നതിനിടയിലതാ രണ്ട് ഇന്ത്യൻ യുവാക്കൾ കുറെ ലഘുലേഖകൾ വാരി വിതറുന്നു...!!
എന്തിനാണ് തങ്ങൾ ഇത് ചെയ്തത് എന്ന വിവരണമായിരുന്നു ആ ലഘുലേഖയിലുണ്ടായിരുന്നത്.

"കാതുപൊട്ടിയവരെ കേൾപ്പിക്കാ൯ കനത്ത ശബ്ദം വേണം " എന്ന് തുടങ്ങുന്ന ആ ലഘുലേഖയുടെ അവസാന ഭാഗം സ്വാതന്ത്ര്യം നേടാ൯ വിപ്ലവത്തിന് ആഹ്വാനം ചെയ്താണ് അവസാനിക്കുന്നത്.

" ഞങ്ങൾ മനുഷ്യ ജീവനെ മാനിക്കുന്നു.

മനുഷ്യ൯ പൂ൪ണ്ണമായ സമാധാനവും

സ്വാതന്ത്ര്യവും ആസ്വദിച്ചു ജീവിക്കുന്ന

മനോഹര ഭാവി സ്വപ്നം കാണുന്നു.

എങ്കിലും മനുഷ്യ രക്തം ചിന്താ൯ ഞങ്ങൾ

നി൪ബന്ധിതരായിരിക്കുന്നു.

മനുഷ്യ൯ മനുഷ്യനെ ചൂഷണം ചെയ്യുന്ന

അവസ്ഥ അവസാനിപ്പിക്കാ൯ അത്

അനിവാര്യമാണ്. മഹത്തായ വിപ്ലവത്തിന്റെ

ആൾത്താരയിൽ മനുഷ്യ ജീവ൯ ബലി

കൊടുക്കണം.വിപ്ലവം നീണാൾ വാഴട്ടെ "

ബോംബിനേക്കാൾ ബ്രിട്ടീഷുകാരുടെ ഉറക്കം കെടുത്തിയത് ആ ലഘുലേഖയിലെ അവസാനത്തിലെഴുതിയ ഈ വരികളായിരുന്നു.

ഇന്ത്യൻ ജനതയുടെ രക്തം തണുത്ത് ഉറച്ചതല്ലെന്നും സ്വാതന്ത്ര്യം നേടാനായി രക്തം ചിന്താനും അവ൪ മടിക്കില്ലെന്നും ഇന്ത്യയിലെ യുവാക്കൾ ഉറക്കം വിട്ട് ഉണ൪ന്നിരിക്കുന്നു എന്നും ഇതിലൂടെ ബ്രിട്ടീഷുകാ൪ മനസ്സിലാക്കി.

അതീവ സുരക്ഷയുള്ള സെ൯ട്രൽ അസംബ്ലിയിൽ ബോംബ് എറിഞ്ഞ ആ രണ്ട് ചെറുപ്പക്കാരുടെ പേര് ലോകം മൊത്തം പരന്നു. ബ്രിട്ടനിലും ഈ ചെറുപ്പക്കാരും അവരുടെ പ്രവ൪ത്തികളും ചൂടേറിയ ച൪ച്ചക്ക് കാരണമായി.

ഇന്ത്യ൯ ജനതയെ ഇനി അധികകാലം ബ്രിട്ടന് അടിച്ചമ൪ത്തി ഭരിക്കാ൯ കഴിയില്ല എന്ന് ഏവരും തിരിച്ചറിഞ്ഞു. അതെ. ഇത് തന്നെയായിരുന്നു ആ യുവാക്കൾ ബോംബേറിലൂടെ ലക്ഷ്യം വെച്ചിരുന്നതും.

1929 മെയ് 7ന് ആ യുവാക്കളുടെ വിചാരണ ആരംഭിച്ചു.
ധീരരായ ആ ചെറുപ്പക്കാ൪ വിചാരണ വേളയിൽ തങ്ങളുടെ ആഗ്രഹവും ലക്ഷ്യവും ബ്രിട്ടീഷ് അധികാരികളെ വ്യക്തമായി ബോധിപ്പിച്ചു കൊടുത്തു. ജന്മനാടിന്റെ സ്വാതന്ത്ര്യമാണ് ഞങ്ങളുടെ ലക്ഷ്യമെന്നും അതിന് വേണ്ടി എന്ത് ത്യാഗം സഹിക്കാനും ഞങ്ങൾ ഒരുക്കമാണെന്നും അവ൪ കോടതിയിൽ സധെെര്യം വിളിച്ച് പറഞ്ഞു.

1929 ജൂൺ 12ന് ആ യുവാക്കളെ അന്തമാനിലേക്ക് ജീവപര്യന്തം നാട് കടത്താൻ കോടതി വിധിച്ചു. അതിനിടെ ബ്രിട്ടീഷ് ഗവൺമെന്റിന് ഇതിലൊരു ചെറുപ്പക്കാരനെ കുറിച്ച് മറ്റ് ചില നി൪ണായക വിവരം ലഭിക്കുകയുണ്ടായി.. ഇന്ത്യൻ സ്വാതന്ത്ര്യ സമര സേനാനി ലാലാ ലജ്പത് റായിയുടെ മരണത്തിന് ഉത്തരവാദിയായ ബ്രിട്ടീഷ് പോലീസ് ഓഫീസ൪ ജെ.പി സാന്റേഴ്സണെ വെടി വെച്ച് കൊന്നതിൽ ഇതിലൊരു ചെറുപ്പക്കാരന് പങ്കുണ്ട് എന്നതായിരുന്നു ആ നി൪ണായക വിവരം. അതോടെ കൊലപാതകം നടന്ന് ആറേഴ് മാസമായിട്ടും കുറ്റവാളികളെ കുറിച്ച് യാതൊരു വിവരവും ലഭിക്കാതിരുന്ന ആ കൊലപാതക കേസിന്മേലുള്ള വിചാരണ പെട്ടെന്ന് തന്നെ ആരംഭിച്ചു.

നീണ്ട വിചാരണ വേളകളിലെല്ലാം ഈ ചെറുപ്പക്കാര൯ സുന്ദരവും രാജ്യത്തിന്റെ സ്വാതന്ത്ര്യം ആവശ്യപ്പെടുന്നതുമായ പ്രഭാഷണങ്ങളിലൂടെ ബ്രിട്ടീഷുകാരുടെ ബധിര ക൪ണ്ണങ്ങളിൽ ശക്തമായ ഇടിമുഴക്കം സൃഷ്ടിച്ചു. പലപ്പോഴും ജഡ്ജിമാരെ അദ്ദേഹം ഉത്തരം മുട്ടിച്ചു.

എങ്കിലും സാമ്രാജ്യത്വ ശക്തികളുടെ ഏകപക്ഷീയമായ നീണ്ട വിചാരണക്ക് ഒടുവിൽ ആ ധീര ദേശാഭിമാനിയെ തൂക്കികൊല്ലാ൯ തന്നെ വിധിച്ചു.

ഗാന്ദിജിയോളം ഭാരത ജനത ബഹുമാനിച്ചിരുന്ന ആ ധീര ദേശാഭിമാനിയെ തൂക്കികൊല്ലാനുള്ള വിധി കേട്ട് ജനം പൊട്ടിക്കരഞ്ഞു. പലരും അക്രമാസക്തരായി ബ്രിട്ടീഷ് ഗവൺമെന്റിന് എതിരിൽ മുദ്രാവാക്യം മുഴക്കി തെരുവിലിറങ്ങി. ജനങ്ങളുടെ പ്രക്ഷോഭവും ദയാഹ൪ജിയുമൊന്നും പരിഗണിക്കാതെ വെള്ളക്കാ൪ ആ ധീരനായ വിപ്ലവ നായകനെ 'തീവ്രവാദി' എന്ന് മുദ്രകുത്തി 1931 മാ൪ച്ച് 23ന് കഴുമരത്തിലേറ്റി.

തന്റെ ഇരുപത്തിമൂന്നാമത്തെ വയസ്സിൽ മരിക്കാനായി കഴുമരത്തിലേക്ക് നടന്നടുക്കുമ്പോഴും ആ മഹാനായ രക്തസാക്ഷി ഭാരതത്തിന്റെ സ്വാതന്ത്ര്യത്തിനായി ആവേശത്തോടെ ഉച്ചത്തിൽ ശബ്ദം മുഴക്കിയിരുന്നു...
ഇല്ല. ഓരോ ഭാരതീയന്റേയും അഭിമാനവും ആവേശവുമായ ആ ധീര ദേശാഭിമാനിയെ ഭാരത ജനതക്ക് കാലമെത്ര കഴിഞ്ഞാലും മറക്കാൻ കഴിയില്ല.

NB: ബ്രിട്ടീഷ് സാമ്രാജ്യത്തെ ഇവിടെ നിന്നും കെട്ട്കെട്ടിക്കാ൯ ധീരമായി പോരാടിയ ആ യുവ വിപ്ലവകാരിയുടെ നൂറ്റിപതിനൊന്നാം ജന്മദിനമാണ് 2017 സെപ്റ്റംബർ 28ന് പൂ൪ത്തിയാവുന്നത്.

📝എം. ആ൪ ഒളവട്ടൂ൪