അവൾ ഭാര്യയാണ്

"സത്യത്തിൽ അവന്റെ കൈകൾക്കിടയിൽ കിടന്ന് നീ തോൽക്കുകയായിരുന്നില്ലേ??"

കറിയിൽ ഉപ്പിത്തിരി കൂടിപോയപ്പോൾ"നിന്റെ വീട്ടീന്ന് കൊണ്ടുന്നതാണോ ഡി...."എന്നാണ് ചോദിച്ചത്.കറിയിൽ ഉപ്പ് കുറഞ്ഞെന്നു പറഞ്ഞ് തട്ടികയറിയപ്പോൾ"ആവശ്യത്തിന് ഇട്ടോളി,ഉപ്പിന്റെ പാത്രം ഇതാ ന്ന്" മറുപടിയായി പറഞ്ഞപ്പോൾ"നിന്റെ സൗകര്യത്തിന് തിന്നണം,തൂറണം ന്നാണോ"എന്ന് പറഞ്ഞ് കസേര വിട്ടെഴുന്നേറ്റു... പിന്നെ,പുലർച്ചയ്ക്ക് എഴുന്നേറ്റ് വെച്ചുവിളമ്പിയ മുട്ടക്കറി പിന്നാമ്പുറത്തേക്ക് തൂത്തു...
തൂത്തുകളയാൻ എന്തെളുപ്പമാണ്...!!വെച്ചുണ്ടാക്കിയവൾക്കെ അതിന്റെ വില അറിയൂ...
ഉപ്പും മുളകും പച്ചക്കറിയും മാർക്കറ്റിൽ നിന്ന് വാങ്ങി വീട്ടിൽ എത്തിച്ചാൽ കൂട്ടാനാകും,കറിയാകും എന്നാണ് രതീഷിന്റെ ഭാവം...കഷ്ടം!!!അവൾ സ്വയം സഹതപിച്ചു...

ചിലപ്പോൾ ചായയുടെ കടുപ്പം കൂടിയത്, മറ്റു ചിലപ്പോൾ കറിക്ക് കട്ടി കുറഞ്ഞത്...!!!തീന്മേശയിലെ പാത്രങ്ങൾ വീണുടഞ്ഞുകൊണ്ടിരുന്നു...

അന്നൊരു വെള്ളിയാഴ്ച്ച ആയിരുന്നു.ഉച്ചയൂണിനൊപ്പം കുടിക്കാൻ കൊടുത്ത ജീരകവെള്ളത്തിന് ചൂട്കൂടിയെന്ന് പറഞ്ഞ്,ലതികയുടെ ദേഹത്തേക്കാണ് രതീഷ് ആ വെള്ളം ഒഴിച്ചത്...ചെരിഞ്ഞുനിന്നത് കൊണ്ട് കൈചുമലിലാണ് പൊള്ളലേറ്റത്‌...

"അങ്ങാടീ തോറ്റതിന് അമ്മയോട്"തിരിഞ്ഞ്‌ നടക്കുമ്പോൾ ലതിക പറഞ്ഞത് അയാൾ കേട്ടിട്ടുണ്ടാകണം.അവളുടെ ചന്തിക്ക് കാൽമടക്കി ഒരൊറ്റ ചവിട്ട്..!!"പ്ഫ നായിന്റെ മോളെ എന്റെ നേരെ നിന്റെ നാവ് പൊന്തിയോ.."എന്നൊരു ആട്ടും..!!

അടുക്കളയിൽ കയറി ചായ ഇടാം,എന്നുകരുതി ഗ്യാസ് ഓണ് ചെയ്ത് പാത്രവും വെള്ളവും വെച്ച് രതീഷ് ചുണ്ടിലെ സിഗരറ്റിൽ തീ കൊളുത്തി...കാപ്പിലേക്ക് ചായ പാരുമ്പോൾ കൈപൊള്ളി.അപ്പൊ തന്നെ പാത്രത്തിന്റെ പിടിവിട്ടു.
നിലത്തുവീണുടഞ്ഞ കപ്പും,ചായകാച്ചിയ സ്റ്റീൽപാത്രവും രതീഷിനെ നോക്കി പുച്ഛിച്ചു....
സിഗററ്റ് പുകതുപ്പിക്കൊണ്ട് രതീഷ് ചമ്മൽ മറച്ചു...മല്ലിയും മുളകുപൊടിയും,മഞ്ഞൾപൊടിയും സാമ്പർപൊടിയും തിരിച്ചറിയാതെ വന്നപ്പോൾ ഭക്ഷണം പുറത്ത്‌നിന്ന് വരുത്താമെന്ന് തീരുമാനിച്ചു...
ഒരാഴ്ച പഴക്കമുള്ള മീന്കറിയിൽ പൊറോട്ടകഷ്ണം മുക്കുമ്പോൾ രതീഷിന്റെ നാവിലെ സ്വാദ്മുകുളങ്ങൾ നിലവിളിച്ചു.വായിലേക്ക് പൊറോട്ട കുത്തിചീകിയപ്പോൾ അതൊരു ഞെരക്കമായ്‌ അവസാനിച്ചു.

ലതിക കിടപ്പിലായിട്ട് ഒരാഴ്ച്ച പിന്നിടുന്നു.അവളെ ശുശ്രൂഷിക്കാൻ ഒരു ഹോംനഴ്സിനെ നിർത്തിയത്കൊണ്ട് രതീഷിന് ലതികയുടെ അസുഖം ഒരു സുഖമായിട്ടാണ് തോന്നിയത്...

അടുത്തമുറിയിൽ നിന്ന് അടക്കിച്ചിരികളും ഞെരങ്ങൽ ശബ്ദങ്ങളും കേൾക്കുമ്പോൾ ആദ്യമൊക്കെ കട്ടിലിൽ മരവിച്ചുകിടക്കുന്ന ലതികയുടെ കണ്ണുകൾ വെറുതെ നിറയുമായിരുന്നു...

ഹോട്ടൽഭക്ഷണവും കളിയും രതീഷിന് മടുത്തുതുടങ്ങിയിരിക്കുന്നു...മാറാലപിടിച്ച ചുവരും പൊടിപിടിച്ചതറയും രതീഷിനെ നോക്കി പല്ലിറുമ്മി...വീട്ടജോലിക്കായി ഒരു പുതിയപെണ്ണിനെ കൊണ്ടുവരണം...അത്കൊണ്ട് ആ നഴ്‌സിനെ ഇനി വേണ്ട!!!

ചൂടുള്ള നോട്ടുകൾ വെച്ചുനീട്ടിയപ്പോൾ ആ മാലാഖയുടെ കണ്ണ് നിറഞ്ഞിരുന്നു...
പാവം പെണ്ണ്!!രതീഷ് നോട്ട്നീട്ടിയപ്പോൾ മാത്രമാണ് തന്റെ ശരീരത്തെയാണ് അയാൾ പ്രണയിച്ചതെന്ന് അവൾക്ക് മനസിലായതെന്ന് തോന്നുന്നു...

തടിച്ചിരുണ്ട പുതിയ വീട്ടുജോലിക്കാരി രതീഷിനെ കൊതിപ്പിച്ചകടന്നുകളയുന്നതും ലതിക അറിയുന്നുണ്ടായിരുന്നു...
അവസാനം,"മേഡം കേൾക്കും...."എന്ന് കുണുങ്ങിപറഞ്ഞുകൊണ്ട് അവളും രതീഷിന്റെ കൈവലയത്തിൽ പുളഞ്ഞു....
"ഞാനൊരു രസംകൊല്ലിയാണെന്ന്"തിരിച്ചറിയുന്ന നിമിഷങ്ങളായിരുന്നു അത്...

കെടാൻ പോകുന്ന വിളക്ക് ആളികത്തുന്നപോലെ ആ പെണ്ണും രതീഷിനൊപ്പം പകലെന്നോ രാത്രിയെന്നോ വ്യത്യാസമില്ലാതെ കെട്ടിപ്പിണഞ്ഞതും,ശീർഷാസനവും കമലാസനവും കടന്നതും അറിഞ്ഞിട്ടും അറിയാത്ത ഭാവത്തിൽ ലതിക കിടന്നു....അവൾക്ക് ആ പെണ്ണിനോട് സഹതാപം തോന്നി....ഇന്നല്ലെങ്കിൽ നാളെ നീയും പടിയിറക്കപ്പെടുമല്ലോ എന്ന സങ്കടവും മനസിൽ തിരയടിച്ചു...
ഒന്നുമല്ലെങ്കിലും അവരുടെ പ്രമേത്തിന്റെ മൗനസാക്ഷിയല്ലേ ഞാൻ...!!ലതിക ചുണ്ടുകൾ കോട്ടി...
മുളക്കാതെ പോയ രതീഷിന്റെ വിത്തുകളെ കുറിച്ചോർത്ത് അവൾക്കിപ്പോയാണ് അൽപ്പമെങ്കിലും ആശ്വാസം തോന്നിയത്...

തടിച്ചിരുണ്ട വീട്ടുജോലിക്കാരി രതീഷിന്റെ ഭാര്യ ചമയുന്നത് കണ്ടപ്പോൾ ലതികയ്ക്ക് ചിരിക്കാനാണ് തോന്നിയത്...
ആ പെണ്ണ് ഇടക്ക് വാതിൽക്കൽ വന്നുനിന്ന് തന്നെ നോക്കി ക്രൂരമായി ചിരിക്കാറുള്ളത് ലതിക ശ്രദ്ധിക്കാതിരുന്നില്ല...
എല്ലാം ഞാൻ നേടി എന്ന് പറയാതെ പറയുകയായിരുന്നില്ലേ അവൾ??
പാവം പെണ്ണ്!!! കിടപ്പറയിൽ രതീഷിന്റെ കൈവലയത്തിനുള്ളിൽ അമരുമ്പോൾ താൻ തന്നെയാണ് തോൽക്കുന്നതെന്ന് അവൾക്ക് മനസിലായില്ലല്ലോ....
അവന്റെ താലിച്ചരടിൽ എന്നോ തൂങ്ങിച്ചത്ത എന്നെ കണ്ടിട്ടും അവൾക്കവനെ മനസിലായില്ലല്ലോ....

എക്സ്പെയറിഡേറ്റ് കഴിഞ്ഞപ്പോൾ അവളെയും പടിയിറക്കാൻ രതീഷ് തീരുമാനിച്ചു...
പോകുന്നതിന് മുമ്പ് അവൾ ലതികയുടെ മുറിയിലെത്തി പൊട്ടിക്കരഞ്ഞു...
"പെണ്ണേ കരയാൻ മാത്രമല്ല കണ്ണ്...അതിലൂടെ ലോകത്തെ നോക്ക്"ലതിക അവളുടെ കൈകളിൽ കൈ വെച്ചു....

ചുണ്ടുകൾ ചുംബിക്കാനാണെന്നും,മുലകൾ അവന്റെ കുഞ്ഞിന് പാലൂട്ടാനുമാണെന്ന് പറഞ്ഞുപഠിപ്പിച്ച മറ്റൊരു പെണ്ണിനെ രതീഷ് അപ്പോഴേക്കും കിടപ്പറയിലെത്തിച്ചു കഴിഞ്ഞിരുന്നു...
ലതിക എല്ലാത്തിനും സാക്ഷിയായ് ആ കട്ടിലിൽ മലർന്ന് കിടക്കുന്നുണ്ട്...
അതെ...അവൾ ഭാര്യയാണ്...!!!
#ആദി