താത്പര്യം ഇല്ല, പ്രണയിക്കാൻ

എനിക്ക് താത്പര്യം ഇല്ല..പ്രണയിക്കാൻ ഒന്നും എനിക്ക് കഴിയില്ല... എന്റെ അമ്മയും അച്ഛനും ചേട്ടനും എന്നേ വളരെ കഷ്ടപ്പെട്ടാണ് പഠിപ്പിക്കുന്നത്.. നീ വേറേ ആരുടെയെങ്കിലും പുറകേ നടന്നോളൂ
..എന്നേ വിട്ടേക്ക്.. നിനക്ക് പ്രണയിക്കാൻ വേറേയും ഒത്തിരി പേരെ കിട്ടും.. എന്റെ വീട്ടുകാരുടെ ഏറ്റവും വലിയ ആഗ്രഹമാണ് എന്നേ ഒരു ഡോക്ടറാക്കണമെന്നത് അതിലും വലുതായി എനിക്ക് ഒന്നും ഇല്ല..."

"അമൃതേ..എനിക്ക് നിന്നേ ഇഷ്ടമായത് ഇതുകൊണ്ടൊക്കെയാണ്....നീ പേടിക്കേണ്ട പിന്നാലെ നടന്നു ബുദ്ധിമുട്ടിക്കില്ല ഇനി ഞാൻ ...വീട്ടിൽ വന്ന് പെണ്ണ് ചോദിച്ചോളാം.."

"മനു ..നിനക്ക് എന്തിനാടാ ആ ദരിദ്രവാസി പെണ്ണ്...നിനക്ക് എന്തുകൊണ്ടും ഇതിലും നല്ല പെണ്ണിനെ കിട്ടുമല്ലോ.!!"

"ഡാ വിഷ്ണു.. നിനക്ക് ഇതുവരെ എന്നെ മനസ്സിലായില്ലേ... നീ എന്തു കരുതി എനിക്ക് അവളോട്‌ ദിവ്യപ്രണയമാണെന്നോ... ഇതൊക്കെ ഒരു നേരംപോക്കല്ലേ .. ഞാൻ അവളുടെ പുറകേ നടക്കാൻ തുടങ്ങിയിട്ട് നാള് കുറേ ആയി.. ഇതുവരെ തിരിഞ്ഞു പോലും നോക്കിയിട്ടില്ല.. എന്നെ മാത്രമല്ല ഈ കോളേജിലെ ആരെയും..പക്ഷെ ഈ മനു ഒന്ന് ആശിച്ചാൽ നേടിയിരിക്കും അത് എന്തായാലും... ഇവളുടെ കാര്യത്തിൽ ഇഷ്ടമാണെന്ന് പറഞ്ഞുനടന്നിട്ട് കാര്യമില്ല.....വിഷ്‌ണു നിനക്ക് അറിയോ ഒരു പെണ്ണിനെ വളക്കാൻ ഉള്ള ഏറ്റവും നല്ല വഴി.. പുറകേ നടക്കലും ഇഷ്ടമാണോന്നു ചോദിക്കലും അല്ല... എനിക്ക് നിന്നേ ഇഷ്ടമാണ്... വീട്ടിൽ വന്ന് പെണ്ണ് ചോദിച്ചോട്ടെ എന്നൊരു ചോദ്യമാണ്.. അതിൽ വീഴാത്ത ഒരു പെണ്ണും ഇല്ല മച്ചാനെ...

നീ ശ്രദ്ധിച്ചോ.. അവൾ ഇന്നേ വരെ എന്നേ തിരിഞ്ഞു നോക്കാത്തവളായിരുന്നു.. ഇന്ന് അവൾ എന്നേ നോക്കി ചിരിച്ചു... സംസാരിച്ചു... ഇനി അവള് പറയും ഇഷ്ടമാണ് എന്നും.. നീ വഴിയേ കണ്ടോ വിഷ്ണു... "

മനു പറഞ്ഞതു പോലെ തന്നെ അമൃതയും മനുവും പ്രണയത്തിലായി.. ജീവിതത്തിൽ അച്ഛനെയും ചേട്ടനെയും അല്ലാതെ മറ്റൊരു ആണിനെ ഇഷ്ടപ്പെടുകയും വിശ്വസിക്കുകയും ചെയ്തത് മനുവിനെയാണ്... എന്നാൽ അത് അധികകാലം നീണ്ടു നിന്നില്ല... മനുവിന്റെ തനി നിറം അമൃത അറിഞ്ഞു... അത് അവൾക്ക് സഹിക്കാവുന്നതിലും അപ്പുറമായിരുന്നു.. സ്വന്തമെന്ന് കരുതിയ മനു തന്നെ പറ്റിക്കുകയായിരുന്നെന്ന് അറിഞ്ഞപ്പോൾ അമൃതയ്ക്ക് സമനില തെറ്റുന്നത് പോലെ തോന്നി.. പഠിപ്പിലോ ബാക്കി കാര്യങ്ങളിലോ ശ്രദ്ധിക്കാൻ കഴിഞ്ഞില്ല..

ജീവിതത്തിൽ തെറ്റുപറ്റിയ തനിക്ക് ഇനി ജീവിക്കാൻ അർഹതയില്ലെന്നു അവൾ തീരുമാനിച്ചു... അന്ന് തന്നെ അവൾ വീട്ടിലേക്ക് തിരിച്ചു അമ്മയേയും അച്ഛനെയും ചേട്ടനെയും ഒന്നു കാണണം.. അവരോടൊന്നു മനസ്സുരുകി മാപ്പ് പറയണം. എന്നിട്ട് ഈ പാഴ് ജന്മം അവസാനിപ്പിക്കണം...

വീട്ടിൽ എത്തിയതും അച്ഛൻ ഉമ്മറത്ത് തന്നേയുണ്ട്.. ചേട്ടൻ അവൾ വരുന്നത് പ്രമാണിച്ചു അടുക്കളയിൽ അവൾക്കിഷ്ടപ്പെട്ടതൊക്കെ ഉണ്ടാക്കാൻ അമ്മയെ സഹായിച്ചുകൊണ്ടിരിക്കുന്നു രാത്രി ഭക്ഷണം കഴിക്കുന്നതിനിടയിൽ ആണ് അവൾ ശ്രദ്ധിച്ചത് ചേട്ടന് ഇടയ്ക്കു ചുമ വരുന്നുണ്ട് ...കഴുത്തിൽ തൈറോയ്ഡിൽ ചെറിയ തടിപ്പുപോലെ എന്തോ അവൾക്കു തോന്നി ..അവൾ വിശദമായി പരിശോധിച്ചു ...കഴുത്തിൽ നീർവീക്കവും ഉണ്ട് ...എത്രയും പെട്ടെന്ന് ചെക്ക് അപ്പുകൾ ചെയ്തേ പറ്റു ...അമൃത ചേട്ടനോട് കാര്യങ്ങൾ പറഞ്ഞു ..പിറ്റേ ദിവസത്തേക്ക് അവളുടെ പ്രൊഫസറെ വിളിച്ചു അപ്പോയിന്മെന്റും എടുത്തു....

അടുത്ത ദിവസം രാവിലെ തന്നെ അവർ ഡോക്ടറെ കാണാൻ പുറപ്പെട്ടു ...അവൾ സംശയിച്ചത് ശരിയായിരുന്നു...കഴുത്തിൽ മുഴ ഉണ്ട് ....അതിനോടാനുബന്ധിച്ച് ചില ലിംഫ്‌ ഗ്രന്ഥികളിൽ നീർവീക്കവും ഉണ്ട് ...ഡോക്ടർ എഫ് എൻ എ സി ടെസ്റ്റിന് എഴുതിക്കൊടുത്തു ..

അമൃതയക്ക് ഇനി ചെയ്യേണ്ടതെന്തെന്നു അറിയാത്ത അവസ്‌ഥയായി..അരുതാത്തതൊന്നും സംഭവിക്കരുതെ എന്നവൾ മനസ്സുരുകി പ്രാർഥിച്ചു.. നന്നായി പഠിച്ചിരുന്ന ചേട്ടനാണ്.. അച്ഛന്റെ അസുഖവും തന്റെ പഠിപ്പും കൂടി താങ്ങാതെ ആയപ്പോൾ ചേട്ടൻ പഠിപ്പുപേക്ഷിച്ചതാണ്.. പിന്നീട് തനിക്ക് വേണ്ടിയാണ് ജീവിച്ചത്.. തന്റെ ഒരു കാര്യത്തിലും ഒരു കുറവും ഉണ്ടായിട്ടില്ല.. ഒത്തിരി ബുദ്ധിമുട്ടുകൾ ഉണ്ടായിരുന്നു അത് സത്യമാണ് പക്ഷെ തന്നേപ്പോലെ ഉള്ള ഒരു പാവപ്പെട്ട വീട്ടിലെ കുട്ടിക്ക് സ്വപ്നം കാണാനാകാത്ത ജീവിതമാണ് തനിക്ക് ചേട്ടൻ തന്നത്...ചിന്തകൾ അവളെ വരിഞ്ഞുമുറുക്കി ...

ആ ചേട്ടനാണ് ഇപ്പോൾ ..ലക്ഷണങ്ങൾ വിരൽചൂണ്ടുന്നത് ജീവനും ജീവിതവും കാർന്നു തിന്നുന്ന ആ രോഗത്തിലേക്കാണ് .. അന്ന് അമൃതയ്ക്ക് ഉറങ്ങാൻ കഴിഞ്ഞില്ല... ടെസ്റ്റ് റിസൾട്ട് വരുന്നത് വരെ ഓരോ നിമിഷവും അവൾ ഉരുകിക്കൊണ്ടിരുന്നു...അമ്മയോടും അച്ഛനോടും ഒന്നും പറഞ്ഞിട്ടില്ല ...ഒരു ചെറിയ ടെസ്റ്റ് ....ചേട്ടനും അതിൽ കൂടുതൽ ഒന്നും അറിയില്ല ...എല്ലാ ബുദ്ധിമുട്ടുകളും ഒറ്റയ്ക്ക് നെഞ്ചിലേറ്റി നടന്ന ചേട്ടൻ അനുഭവിച്ചിരുന്ന ബുദ്ധിമുട്ട് അന്ന് ഒരു രാത്രി കൊണ്ട് അമൃത മനസ്സിലാക്കി...

ടെസ്റ്റ് കഴിഞ്ഞു ..ഡോക്ടർ വിളിപ്പിച്ചു... "പേടിച്ച രീതിയിൽ ഒന്നും ഇല്ല ...അപകടകാരി അല്ലാത്ത മുഴയാണ് വേണമെങ്കിൽ സർജറി ചെയ്യാം അത്രയേ ഉള്ളു ...കൂടെ ഉണ്ടായിരുന്ന നീർവീക്കം പല്ലിൽ കേടുള്ളത് കൊണ്ടായിരുന്നു ..."
ഡോക്ടർ ഇത്രയും പറഞ്ഞു തീർത്തപ്പോഴേക്കും അമൃതയുടെ കണ്ണുകൾ നിറഞ്ഞൊഴുകിയിരുന്നു..

പുറത്തു ഇറങ്ങിയതും അവൾ ചേട്ടനെ കെട്ടിപ്പിടിച്ചു കരഞ്ഞു..
ആ നിമിഷം അവൾ തിരിച്ചറിഞ്ഞു ...ആ കൈകളിൽ അവൾക്ക് കിട്ടുന്ന സംരക്ഷണത്തെക്കാളും വലുതല്ല ഈ ലോകത്ത് മറ്റൊന്നും എന്ന് ...താൻ വിശ്വസിച്ചവൻ.. സ്നേഹിച്ചവൻ ചതിച്ചു എന്നറിഞ്ഞപ്പോൾ ഉണ്ടായിരുന്ന വിഷമം ചേട്ടന് എന്തെങ്കിലും സംഭവിച്ചാലോ എന്നുള്ള പേടിയുടെ മുൻപിൽ ഒന്നും അല്ലായിരുന്നു എന്നവൾ മനസ്സിലാക്കി ...

പഴയതിലും നൂറിരട്ടി മനസ്സിനെ ശക്തിപ്പെടുത്തിക്കൊണ്ട് ...തന്നെ വേണ്ടാത്തവരെ മറന്ന് തനിക്കുവേണ്ടി ജീവിക്കുന്നവരുടെ സ്വപ്‌നം സാക്ഷാത്കരിക്കാനുറച്ച് അവൾ മുന്നോട്ട് നടന്നു..

Sajith_Vasudevan(ഉണ്ണി...)