ചില്ലിട്ടപ്പോൾ

അച്ഛന്റെ പൂമാലയിട്ട കാർക്കശ്യം
അമ്മയുടെ മുലപ്പാൽപ്പുഞ്ചിരി
മുത്തച്ഛന്റെ ഗമയുള്ള വാത്സല്യം
പല്ലില്ലാത്തോണ്ണിന്റെ മുത്തശ്ശിയുമ്മ
വല്യമ്മാവന്റെ കോപിക്കുന്ന മുട്ടൻവടി
തറവാടിന്റെ ശ്രീത്വം ആവാഹിച്ചൊരു
നെൽക്കതിര്
അയാൾ
എല്ലാമോർക്കാനായി
സുതാര്യമാക്കി.

താഴിട്ട്,
പൊന്നു കിലുങ്ങുന്ന കുടുക്കയും
ഗാന്ധിത്തലകളുടെ കെട്ടുകളും
പ്രണയമൊപ്പിട്ട ഈടുകെട്ടും
ജീവിതം തീറെഴുതിയവളുടെ സ്വപ്നങ്ങളും
സേഫ് വോൾട്ടുകളിൽ
എന്നും
ഓർമ്മ മാത്രമാകാതിരിക്കാനായി
സുരക്ഷിതമാക്കി.

BY: Geetha Munnoorkkod