കണാരേട്ടന്റെ മെയ്ദിനം

കണാരേട്ടന്റെ മെയ്ദിനം::
======================

"അങ്ങോട്ട് മാറി നില്ല് ..ചേട്ടാ ..തോരണം കെട്ടുന്ന കാണാൻ മേലേ "

പഞ്ചായത്ത് ആപ്പിസിന് മുൻപിൽ മെയ്ദിനം പ്രമാണിച്ച് തോരണം കെട്ടിക്കൊണ്ടിരുന്ന തൊഴിലാളികളിൽ ഒരാൾ കണാരേട്ടനോട് അട്ടഹസിച്ചു .

കണാരേട്ടൻ വേച്ച് വേച്ച് ഒരു വശത്തേക്ക് ഒതുങ്ങി നിന്നു .

"മോനെ..ചന്ദ്രൻ എവിടെ .. ഞാൻ ചന്ദ്രനെ കാണാൻ വന്നതാ "
കണാരേട്ടൻ ആ തൊഴിലാളിയോട് ചോദിച്ചു .

" ഏത് ചന്ദ്രൻ ? "

"പഞ്ചായത്ത് പ്രസിഡന്റ് "

"ങ്ങാ ..അങ്ങനെ നേരെ പറ കെളവാ ..ചന്ദ്രൻ എന്നൊക്കെ കുറുക്കെ കേറിയങ്ങ് വിളിക്കാൻ തന്റെ മടീലിരുത്തിയാണോ പേരിട്ടത് .. ങാ ചന്ദ്രൻ സാർ പാർട്ടി ആപ്പീസിൽ കാണും ..കാണണേൽ അങ്ങോട്ട് ചെല്ല് "

കണാരേട്ടൻ പതിയെ അങ്ങോട്ട് നടന്നു .

•••• •••• •••••

" ഡാ ..ഗംഗാരാ ..ജംഗ്ഷനിലെല്ലാം ബാനറും തോരണോം നന്നായിട്ട് കെട്ടണം .നമ്മുടെ പാർട്ടി ഭരിക്കുന്ന പഞ്ചായത്താ ..ഒന്നിനും കുറവ് വേണ്ട.കാശ് വല്ലോം വേണേൽ നമ്മുടെ "പവിത്ര" ബാർ മുതലാളിയോട് വാങ്ങിക്കോ "

ചന്ദ്രൻ ,ഗംഗാധരനോട് പറഞ്ഞു .

" സാറിനെക്കാണാൻ ഒരാൾ വന്നിട്ടുണ്ട് .പഞ്ചായത്ത് ഇന്ന് ഒഴിവാണെന്ന് പറഞ്ഞിട്ട് കേൾക്കുന്നില്ല .സാറിനെ കണ്ടിട്ടേ പോന്നോള്ളുന്ന പറേണെ " ഗംഗാധരൻ തലേ ചൊറിഞ്ഞോണ്ട് അറിയിച്ചു .

" ആരാടാ ..? ഓരോ ശല്യങ്ങള് വലിഞ്ഞുകേറി വരും .!!" ങ്ങാ കേറ്റിവിട് "

"ആരാ ..മനസിലായില്ലല്ലോ "

അകത്തേക്ക് കേറിവന്ന കണാരേട്ടനെ നോക്കി നെറ്റി ചുളിച്ചോണ്ട് ചന്ദ്രൻ ചോദിച്ചു .

"എന്നെ ചന്ദ്രന് മനസിലായില്ലേ ..നമ്മളോരുമിച്ചല്ലേ കുടികിടപ്പ് സമരവും,വാളയാർ സമരവുമൊക്കെ നടത്തിയത് .നമ്മളോരുമിച്ചല്ലേ വിയ്യൂർ ജയിലിൽ കിടന്നത് ?"

"ആ..ഞാനൊന്നുമോർക്കുന്നില്ല ..എന്തിനാ ഇപ്പോ ഇങ്ങോട്ട് വന്നത് ?"

" പഞ്ചായത്ത് ,പാവപ്പെട്ടവർക്ക് കിണർ കുഴിക്കാൻ പൈസ കൊടുക്കുന്നൂന്ന് കേട്ടു .ഞാൻ പലവട്ടം ആപ്പീസിൽ ചെന്നിട്ടും നടന്നില്ല .ചന്ദ്രനെ കാണാനാ പറയുന്നത് "

"തനിയ്ക്ക് പാർട്ടി മെമ്പർഷിപ് ഉണ്ടോ ,അടുത്തിടെ വല്ല സമരത്തിൽ പങ്കെടുത്തോ ?
ഇലെക്ഷൻ ഫണ്ടിലേക്ക് കാശ് വല്ലോം കൊടുത്താരുന്നോ "

"ചന്ദ്രാ ..എനിക്ക് വയസായില്ലേ ..ഇനിയെന്ത് പാർട്ടി ? എന്റെ കൈയിലെവിടുന്നാ കാശ് ..ആകുന്ന കാലത്ത് പാർട്ടിക്ക് വേണ്ടി തല്ലുകൊണ്ടവനല്ലേ ഞാൻ ?"

" താൻ പഴമ്പുരാണം പറയാതെ സ്ഥലംവിടാൻ നോക്ക് .ആനുകൂല്യങ്ങളൊക്ക നാടിന് വേണ്ടി പ്രവർത്തിക്കുന്നവർക്കുള്ളതാ ...അല്ലാതെ ആശയം പുഴുങ്ങിത്തിന്നാൻ പറ്റൂല "

"ചന്ദ്രാ .."

"വിട്ടോ ..വണ്ടിവിട്ടോ ..
ഗംഗാരാ ..."

കണാരേട്ടൻ കുനിഞ്ഞ ശിരസോടെ അവിടുന്നിറങ്ങി ,പതുക്കെ നടന്നു ,വെയിലിലുടെ .

••••••• •••••• •••••••

ചന്ദ്രൻ പാർട്ടി ആപ്പീസിൽ നിന്ന് ഇറങ്ങി ,തന്റെ ആഡംബരക്കാരിലേക്ക് കയറി .

ഫോൺ ബെല്ലടിച്ചു .വാർഡ് മെമ്പർ ലീലാമണി .

"ചന്ദ്രേട്ടാ ..എവിടാ .ഇങ്ങോട്ടൊന്നും ഇപ്പോ വരത്തേയില്ലല്ലോ ..
കിണറിനുള്ള കാശ് തരാമെന്ന് പറഞ്ഞല്ലോ .എന്തായി ? എനിക്ക് നേരത്തെതന്നെ കിണറുണ്ടെന്നുള്ളത് സത്യാ ..എന്നാലും ഈ കാശ് കിട്ടിയിരുന്നെങ്കിൽ "
ലീലാമണി കൊഞ്ചിക്കുഴഞ്ഞു .

"വൈകിട്ട് കാണാടീ ..നിനക്ക് കിണറ് തന്നില്ലേൽ പിന്നാർക്കാ "
ചന്ദ്രേട്ടൻ പ്രായം മറന്ന് കുലുങ്ങിചിരിച്ചു .ചിരിയോടൊപ്പം കുടവയറും കുലുങ്ങി .

••••• ••••••••• •••••••

കണാരേട്ടൻ നടന്ന് വീട്ടിലെത്തി .

"ദേവിയേ ..അല്പം വെള്ളം ഇങ്ങോട്ടെടുക്ക് .വല്ലാത്ത ദാഹം "

ദേവിയേടത്തി വെള്ളവുമായി വന്നു .

"പോയകാര്യം എന്തായി "

"നമ്മള് സമരത്തിൽ പങ്കെടുത്തിട്ടുണ്ടോന്ന് ചോദിച്ചു .ഇല്ലേൽ കിണറ് തരില്ലാന്ന് പോലും "

കണാരേട്ടൻ വിളറിച്ചിരിച്ചു .

അടിവയറ്റിൽ ലാത്തികൊണ്ടുള്ള കുത്തും ചോരച്ചാലും കുഞ്ഞുമുഖവും ദേവിയേടത്തിയുടെ മനസിലൂടെ ഓടിമറഞ്ഞു .

••••••••• •••••••••••• •••••••

വൈകിട്ട് :
വിയർപ്പിൽ കുളിച്ചിരിക്കുന്നു ചന്ദ്രേട്ടൻ .
അടുത്തുകിടക്കുന്ന ലീലാമണിയെ ചുണ്ടുകോട്ടിയൊന്ന് നോക്കി ചന്ദ്രൻ.

ഇടിഞ്ഞുതൂങ്ങിയ അർദ്ധനഗ്നമായ ശരീരം .

"ഈ ചന്ദ്രേട്ടന്റെ ഒരു നോട്ടം .. "

ലീലാമണി കിലുങ്ങിചിരിച്ചപ്പോൾ,ചന്ദ്രേട്ടൻ തുറന്നുകിടന്ന വാതിലിലൂടെ, അപ്പുറത്തെ മുറിയിൽ കിടന്നുറങ്ങുന്ന, ലീലാമണിയുടെ 16 വയസുള്ള മകളുടെ,ശ്വാസഗതിക്കൊപ്പം ഉയർന്നുതാഴുന്ന നിമ്നോന്നതങ്ങളുടെ അളവെടുക്കുകയായിരുന്നു ,കണ്ണുകൾകൊണ്ട് .

"പൊതുപ്രവർത്തനത്തിലേക്ക് യുവാക്കളും കടന്നുവരേണ്ട സമയം കഴിഞ്ഞിരിക്കുന്നു "

ചന്ദ്രേട്ടൻ ലീലാമണിയോട് പറഞ്ഞു .

ബിനു കല്ലറക്കൽ .