പെൺപുലി..

പെൺപുലി..
--------------------------------------------------------
ചേച്ചീ... അവർ വന്നു...
കുഞ്ഞൂസ് ഓടിവന്നു അടുക്കളയിൽ നിക്കുവാരുന്ന ലിറ്റിയോടും, അമ്മ സൂസനോടും പറഞ്ഞു..
ലിറ്റി ഓടിവന്നു ജനൽകർട്ടൻ മാറ്റി റോഡിലേക്ക് നോക്കി..
താഴെ റോഡിൽ വണ്ടിയിൽ നിന്നിറങ്ങിയ രണ്ടുപേരെ ജോസഫ്‌ അങ്കിൾ കൂട്ടികൊണ്ട് വരുന്നു..

ഇതിലാരാ ചേച്ചിയേ കെട്ടാൻ പോകുന്നേ.. ?

പോടാ.. വന്നു കാണുന്നതിനു മുൻപേ കെട്ടുന്ന കാര്യം നീ തീരുമാനിച്ചോ.. ?
കുഞ്ഞൂസിന്റെ ചെവിക്കിട്ട് ഒന്ന് കിഴുക്കിയിട്ട് ലിറ്റി പറഞ്ഞു..

അവൾ വരുന്ന രണ്ടുപേരെയും നോക്കി.. ഇതിലേതായാലും വേണ്ട എന്നവൾ അപ്പോൾ തന്നെ തീരുമാനിച്ചു..

അവൾ അടുക്കളയിലോട്ട് ചെന്ന് ചായ എടുത്തുകൊണ്ടിരുന്ന സൂസനോട്‌ പറഞ്ഞു..
ചായ അമ്മ കൊണ്ട് കൊടുത്താൽ മതി..

എന്നാടീ.. ഇഷ്ടപ്പെട്ടില്ലേ.. ?

ഓ.. കണ്ടിട്ട് ഒരു സുഖമില്ല..എനിക്കെങ്ങും വേണ്ടാ ഈ ചെറുക്കനേ.. !

നിനക്ക് ഇഷ്ട്ടപെട്ടില്ലേൽ വേണ്ടന്നേ.. നീ അവരു വരുമ്പോൾ ചായ കൊണ്ട് കൊടുക്ക്‌.. അവർ അത് കുടിച്ചിട്ട് പൊക്കോളും..

ചായ മാത്രം കൊടുത്താൽ മതി.. ബിസ്ക്കറ്റ് കൊടുക്കണ്ട.. !

ശ്ശെ.. ഈ പെണ്ണിന്റെ ഒരു കാര്യം.. മിണ്ടാതെ കൊണ്ട് കൊടുത്തോണം ..

അമ്മ ബിസ്ക്കറ്റ് എടുക്ക്.. മധുരം ഞാനിടാം..
അപ്പോളേക്കും ജോസഫ്‌ അങ്കിൾ വിളിച്ചു കഴിഞ്ഞു..

ലിറ്റിമോളെ ചായ എടുത്തോണ്ട് വാ..

സൂസനേ നോക്കി ഒന്ന് കിറി കോട്ടിയിട്ട് ചുണ്ടിൽ ഒരു പുഞ്ചിരി വരുത്തി ലിറ്റി ചായയുമായി ഹാളിലേക്ക് ചെന്നു..

അവൾ അങ്കിളിനെ ചോദ്യഭാവത്തിൽ നോക്കി..

അതാ ചെറുക്കൻ.. കാലിന്മേൽ കാല് കയറ്റി വെച്ചേക്കുന്ന ആളെ നോക്കി അങ്കിൾ പറഞ്ഞു..
അവന്റെ മുഖത്തേക്ക് നോക്കി ഒന്ന് ചിരിച്ചിട്ട് ചായ എടുത്തു കൊടുത്തു.. അടി മുടി അവൾ ഒന്ന് നോക്കി...
നമ്മുക്ക് പറ്റിയ ആളേ അല്ല.. അവൾക്കു ഉറപ്പായി.. കൂട്ടുകാരനും, അങ്കിളിനും ചായ കൊടുത്തിട്ട് അവൾ അടുക്കളയിലേക്കു രണ്ടടി നടന്നപ്പോഴേക്കും പുറകിൽ നിന്നും കേട്ടു ചെറുക്കന്റെ ശബ്ദം...

ചായക്ക് മധുരമിടാൻ മറന്നെന്നു തോന്നുന്നു...

മോളേ ലിറ്റി... അങ്കിൾ വിളിച്ചപ്പോളേക്കും അവൾ അടുക്കളയിൽ എത്തി..

സൂസൻ അവളെ കണ്ണുരുട്ടി പേടിപ്പിച്ചിട്ട് പോയി മധുരം ഇട്ടു കൊടുത്തു..

ലിറ്റിയോട് അങ്കിളിന്റെ മോളാ പറഞ്ഞത്.. ചെറുക്കന് മധുരം ഇല്ലാതെ ചായ കൊടുക്കണം എന്ന്.. ഒന്നും മിണ്ടാതെ ചായ കുടിച്ചാൽ വല്യ കുഴപ്പമില്ല.. അത്യാവശ്യം ക്ഷമ ഒക്കെയുള്ള ഒരു ഡീസന്റ് ആളായിരിക്കും.. മധുരം ഇല്ലാന്ന് പറഞ്ഞാൽ ഒരു കാരണവശാലും ആ ചെറുക്കാനുമായുള്ള കല്യാണത്തിന് സമ്മതിച്ചേക്കരുതെന്നു... അപ്പോൾ അതും ഉറപ്പായി..

അകത്ത്‌ അങ്കിളും വന്നവരും കൂടി ഏതോ കെട്ടിടം പണിയുന്ന കാര്യത്തെപ്പറ്റി ഭയങ്കര സംസാരമാണ്..
ഇവര് പെണ്ണ് കാണാനല്ലേ വന്നത്.. ?
ലിറ്റി അമ്മയോട് ചോദിച്ചു.. സൂസൻ ഒന്ന് ചിരിച്ചതല്ലാതെ മറുപടി ഒന്നും പറഞ്ഞില്ല..

ഒരു ഫോൺ വന്നു ചെറുക്കന്..
ഞങ്ങൾ ഒരു അര മണിക്കൂറിനുള്ളിൽ എത്താം..
എന്നാ ഞങ്ങൾ ഇറങ്ങട്ടെ..വീട്ടുകാരെ അടുത്തദിവസം തന്നെ പറഞ്ഞു വിടാം.. ബാക്കി കാര്യങ്ങൾ നിങ്ങൾ എല്ലാം കൂടി തീരുമാനിക്ക്.. തിരക്കല്ലേ അങ്കിളേ.. കെട്ടാൻ നേരം ഏതായാലും ഞാൻ പള്ളിയിൽ ഉണ്ടാകും..

ഹ.. ഹ..അപ്പോഴേലും ഒന്ന് വന്നാൽ മതി.. കുലുങ്ങിചിരിച്ചുകൊണ്ട് അങ്കിൾ പറയുന്നത്‌ കേട്ട് ലിറ്റി അടുക്കളയിൽ നിന്ന് സൂസനോട് ചോദിച്ചു..
ആരോട് ചോദിച്ചിട്ടാ അങ്കിൾ എല്ലാത്തിനും സമ്മതം കൊടുത്തേ...അമ്മ ഒന്നുംകൂടി കല്യാണം കഴിക്കാൻ റെഡി ആയിക്കോ..എനിക്ക് ഈ തിരക്കുള്ള മനുഷ്യരെ ഒന്നും വേണ്ടാ.. ഇച്ചിരി നേരം എന്റെ അടുത്തിരിക്കാൻ പറ്റാത്ത ചെറുക്കനേ കെട്ടിയിട്ട് എന്തിനാ.. കാണാനും കൊള്ളില്ലാ.. സ്വയം അങ്ങ് തീരുമാനിച്ചു.. എന്നാ പെണ്ണിനോട് ചോദിച്ചോ.. ? എന്നേ ഇഷ്ടപ്പെട്ടോന്ന്‌ ഒരു വാക്ക്.. !..അതുപോലും ചോദിക്കാത്ത ഒരു മണുകുണാമ്പൻ... ഹും...

നീ തന്നെ അങ്കിളിനോട് പറ.. !

ഞാൻ പറയും..ജീവിതം എന്റേതല്ലേ..അങ്കിൾ എന്തൊക്കെയോ ലാഭം മുന്നിൽ കണ്ടുകൊണ്ടുള്ള കളിയാ..അതിന് എന്നെക്കിട്ടില്ല...

അപ്പോഴേക്കും ജോസഫ്‌ അവരെ പറഞ്ഞു വിട്ടിട്ട് വീട്ടിലേക്കു വന്നു..

സൂസമ്മോ...

ആ.. ചേട്ടായീ..

എടീ.. നമ്മൾക്ക് സ്വപ്നം പോലും കാണാൻ പറ്റാത്ത ബന്ധമാ ഇത്.. പൂത്ത കാശൊണ്ട് ചെറുക്കന്റെ കയ്യിൽ.. ഇച്ചിരി പൊങ്ങച്ചം കൂടുതലുണ്ടന്നേ ഉള്ളൂ..
എന്നാ വീട്ടുകാരോട് എല്ലാം കൂടി വരാൻ പറയുന്നേ... ?

അവൾക്കു ചെറുക്കനെ ഇഷ്ട്ടമായില്ലാന്നാ പറയുന്നേ.. !

ലിറ്റിയേ..
അങ്കിൾ വിളിച്ചതുകേട്ട് ലിറ്റി ഹാളിലേക്ക് വന്നു..

എന്നതാടീ അവനൊരു കുറവ്... അവന് വേണേൽ നല്ല കൊമ്പത്തൂന്ന് പെണ്ണ് കിട്ടും.. നാലുനേരം നിനക്കിഷ്ടമുള്ളതു കഴിച്ചു കിടക്കാം..വല്ലവന്റെയും കൂടെ ഇറക്കിവിടാൻ നിന്റെ അപ്പൻ ഒന്നും ഉണ്ടാക്കി വച്ചിട്ടല്ല പോയത്‌.. അതോർമ്മ വേണം... ഇതിപ്പോ കല്യാണച്ചിലവിനുള്ളത്‌ വല്ലോ കടവും മേടിച്ചിട്ടാണെങ്കിലും ഇറക്കിവിടാന്ന്‌ വെച്ചപ്പോൾ... അഹങ്കാരം പറയുന്നോ.. ?

അമ്മാവൻ ഞങ്ങളോടുള്ള സ്നേഹം കൊണ്ടൊന്നുമല്ല ഈ ചെയ്യുന്നതെന്ന് എനിക്കറിയാം.. ആ ചെറുക്കന്റെ പുതിയ ബിൽഡിങ്ങിന്റെ കൺസ്ട്രക്ഷൻ കോൺട്രാക്ട് അമ്മാവന് കിട്ടണം.. അതിനല്ലേ ഈ ത്യാഗം...

ജോസഫിനു ഒരു നിമിഷം ഉത്തരം മുട്ടി.. ഇതെങ്ങനെ ഇവളറിഞ്ഞു.. പെട്ടന്ന് തന്നെ ജോസഫ്‌ ശബ്ദം വീണ്ടെടുത്തു..

അതയെടീ.. ജോസഫ്‌ ലാഭം നോക്കിയേ എല്ലാം ചെയ്യാറുള്ളൂ.. അതുകൊണ്ടാ ഞാൻ ഈ നിലയിലായതും...

അത് ഞങ്ങൾക്ക് പണ്ടേ അറിയാം.. അമ്മേനേയും ലാഭം നോക്കി കൊടുത്തതല്ലേ പണ്ട്.. ഞങ്ങൾ എങ്ങനെയാ അനാഥരായതെന്നും എനിക്കറിയാം ...

സൂസൻ ഒരക്ഷരം മിണ്ടിയില്ല... തനിക്ക് ഇപ്പോഴും ചേട്ടായിയോടു മുഖത്തു നോക്കി സംസാരിക്കാൻ പേടിയാ... അവളെങ്കിലും പറയാനുള്ളത് പറയട്ടേ...

ജോസഫ്‌ സൂസന്റെ നേരെ തിരിഞ്ഞു പറഞ്ഞു...
നീ മക്കളോട് ഓരോന്ന് പറഞ്ഞു കൊടുത്ത് വെച്ചേക്കുവാ അല്ലേ..

പെട്ടന്ന് ലിറ്റി പറഞ്ഞു..
അമ്മയേ ഒന്നും പറയണ്ട... അമ്മ ഞങ്ങളോട് ഇതുവരെ ഒന്നും പറഞ്ഞിട്ടില്ല.. ഞാനായിട്ട് മനസ്സിലാക്കിയതാ പറഞ്ഞത്..

അപ്പോൾ നിങ്ങൾക്ക് ഈ കല്യാണത്തിന് സമ്മതമല്ല അല്ലേ..

അങ്കിളേ കുറേ കാശ് ഉണ്ടായതുകൊണ്ട് മാത്രം ജീവിതമാകില്ല..മറ്റുള്ളവരോട് കരുണയും, സ്നേഹവും വേണം..
അങ്കിളിനു സ്വന്തം ഭാര്യയോടും, മക്കളോടുമെങ്കിലും യഥാർത്ഥമായി സ്നേഹം ഉണ്ടോ.. ?കുറേ ഇറച്ചിയും, മീനും മേടിച്ചു വീട്ടിൽ കൊടുത്താൽ അവിടുള്ളവർക്കു സന്തോഷമാകുമെന്നാണോ അങ്കിൾ കരുതിയേക്കുന്നേ.. "!!
ഒരു നേരം എങ്കിലും കുടുംബത്തോടൊപ്പം ഇരുന്നു ഭക്ഷണം കഴിച്ചിട്ടുണ്ടോ അങ്കിൾ.. ?
ഒരു ഉരുള ചോറ് മക്കളുടെ വായിൽ വെച്ച് കൊടുത്തിട്ടുണ്ടോ.. ?
അവരെ ഒന്ന് സ്നേഹത്തോടെ തലോടിയിട്ടുണ്ടോ.. ?
അവരുടെ മനസ്സ് കാണാൻ അങ്കിളിനേക്കൊണ്ട് പറ്റിയിട്ടുണ്ടോ.. ?
ഇതൊക്കെയാണങ്കിളേ സ്നേഹം..
അത്രയും പറഞ്ഞപ്പോഴേക്കും അവളുടെ കണ്ണുകൾ നിറഞ്ഞു തുളുമ്പി ചാടി..
കരഞ്ഞുകൊണ്ട് അവൾ തുടർന്നു..

അങ്കിൾ കൊണ്ടുവന്ന ചെറുക്കൻ പണത്തെ സ്നേഹിക്കുന്ന ഒരാളാ..ചെറിയ, ചെറിയ കാര്യങ്ങളാണ്‌ ഒരു കുടുംബത്തിലെ വലിയ സന്തോഷങ്ങൾ..
അത് തരാൻ അയാൾക്ക് കഴിയില്ല..
എനിക്ക് അയാളെ ഒട്ട് സ്നേഹിക്കാനും കഴിയില്ല. ..
എനിക്ക് എന്നേ മനസ്സിലാക്കുന്ന.. എനിക്ക് മനസിലാക്കാൻ പറ്റുന്ന ഒരു സാധാരണക്കാരനേ മതി...

ലിറ്റി പറഞ്ഞതെല്ലാം കേട്ട് തലക്കടിയേറ്റ പോലെ നിക്കുവാരുന്നു ജോസഫ്‌.. ഒരക്ഷരം അയാൾക്ക് തിരിച്ചു പറയാൻ കിട്ടിയില്ല.. ഒന്നും മിണ്ടാതെ ജോസഫ്‌ അവിടുന്നിറങ്ങി നടന്നു...

സൂസൻ പുറകെ ചെന്ന് ഒന്ന് വിളിച്ചു...
ചേട്ടായീ...
ജോസഫ്‌ തിരിഞ്ഞുനോക്കിയില്ല.. വണ്ടിയിൽ കയറി ഓടിച്ചു പോയി..

തിരിച്ചു വീട്ടിലേക്കു കയറിയ സൂസനും കരയുവാരുന്നു.. ലിറ്റി അമ്മയെ കെട്ടിപിടിച്ചു.. സൂസൻ മകളെ ചേർത്തുപിടിച്ചു അവളുടെ മുടിയിഴകളിൽ കൂടെ ഒന്ന് തഴുകിയപ്പോൾ... ലിറ്റി അമ്മയുടെ കണ്ണുനീർ തുടച്ചു ഒരു മുത്തം ആ കവിളിൽ കൊടുത്തപ്പോൾ... സ്നേഹത്തിന്റെ ഒരു മാതൃകക്ക് സാക്ഷിയായ കുഞ്ഞൂസ് അവരെ രണ്ടുപേരെയും കെട്ടിപിടിച്ചു..
-----------------------------------------------------------
അന്ന് രാത്രി അമ്മയെ കെട്ടിപ്പിടിച്ചു കിടക്കുമ്പോൾ ലിറ്റി അമ്മയോട് ചോദിച്ചു..
അമ്മക്ക് വിഷമമായോ ഞാൻ അമ്മാവനോട് അങ്ങനെയൊക്കെ സംസാരിച്ചതിന്... ?

ഇല്ലടീ കൊച്ചേ... അമ്മക്ക് അഭിമാനമേ ഉള്ളൂ..ഈ കാലത്ത് പെങ്കൊച്ചുങ്ങളായാൽ ഇങ്ങനെ വേണം..അമ്മക്ക് അന്ന് കഴിയാതെ പോയത്‌ ഇന്ന് നീ പറഞ്ഞതിൽ സന്തോഷമേ ഉള്ളൂ...

അമ്മ എന്തിനാ അച്ഛനുമായുള്ള കല്യാണത്തിന് സമ്മതിച്ചത്.. ?

ഇപ്പൊ അതൊക്കെ പറഞ്ഞിട്ട് എന്താ കാര്യം കൊച്ചേ.. ?

അമ്മക്ക് ഇപ്പോഴും സങ്കടമുണ്ടല്ലേ.. ?

പോടീ... അമ്മ അതെല്ലാം മറന്നു...
നിനക്ക് ആരെയെങ്കിലും ഇഷ്ടമുണ്ടോ..?

ഉണ്ടാരുന്നേൽ ഞാൻ എപ്പോഴേ കൂട്ടിക്കൊണ്ടു വന്നേനേ.. !
ഈ പഞ്ചായത്തിൽ ഒരാളെയേ ഞാൻ കണ്ടുള്ളൂ.. എനിക്ക് പറ്റിയ ഒരാളായിട്ട്..

അതാരാ... ?

ഓ.. അതിനി പറഞ്ഞിട്ട് കാര്യമില്ല..

അതെന്നാ.. ആരാടീ അത്.. ?

പുള്ളിക്ക് ഭാര്യയും രണ്ട് പിള്ളേരും ഉണ്ട്.. നമ്മുടെ ചെമ്പകവീട്ടിലെ ജോസുചേട്ടൻ..

ഈ പെണ്ണിന്റെയൊരു നാക്ക്.. നിന്നെ ഞാൻ എന്നാ ചെയ്യണ്ടേ..
ലിറ്റിക്കിട്ട് ഒരു കിഴുക്ക് കൊടുത്തുകൊണ്ട് സൂസൻ പറഞ്ഞു...

അമ്മയും, മകളും ഒരുമിച്ചു ചിരിച്ചു...

സൂസൻ മകളുടെ തോളിൽ താളം പിടിച്ചു കിടക്കുമ്പോൾ അവളുടെ മനസ്സിൽ ജേക്കബ് അവളെ പെണ്ണുകാണാൻ വന്ന ദിവസം കടന്നുവന്നു..

രാവിലെ പള്ളിയിൽ പോയിട്ട് വന്നപ്പോളാണ് ചേട്ടായി പറഞ്ഞത് ഒരാൾ ഇന്ന് നിന്നെ കാണാൻ വരുന്നുണ്ടന്നു.. അച്ഛൻ നേരത്തെ മരിച്ചതിനാൽ ചേട്ടായി ആയിരുന്നു കാര്യങ്ങൾ എല്ലാം തീരുമാനിച്ചിരുന്നത്.. അമ്മയ്ക്കും പേടിയായിരുന്നു ചേട്ടായിയോട് എതിർത്ത് വല്ലതും പറയാൻ..

അന്ന് പത്തുമണി ആയപ്പോൾ ഒരാൾ വന്നു.. കണ്ടപ്പോഴേ മനസ്സിലായി പ്രായമധികമുണ്ടന്നു.. അമ്മയോട് പറഞ്ഞപ്പോൾ അമ്മ ഒന്നും മിണ്ടരുതെന്നു കണ്ണടച്ച് കാണിച്ചു..പിന്നെ ഒന്നും, ആരോടും മിണ്ടിയില്ല..

ഒരു ഇരുനിറമെങ്കിലും ഉള്ള ..
പുക വലിക്കാത്ത, കള്ളുകുടിക്കാത്ത .. പാന്റിടുന്ന.. ബൈക്ക് ഓടിക്കാൻ അറിയുന്ന ഒരാൾ.. ഇത്രയൊക്കെയേ ഉള്ളാരുന്നു എന്റെ സങ്കല്പങ്ങൾ..
പക്ഷേ ഒന്നുപോലും കിട്ടിയില്ല..

ആദ്യരാത്രിയിൽ ജേക്കബ് അടുത്തു വന്നത് മൂക്കറ്റം കുടിച്ചിട്ടായിരുന്നു..
ഒരു പെണ്ണിന്റെ പ്രതീക്ഷകളെല്ലാം തകർത്തു ഒരു പീഡനമായിരുന്നു.. പിടിച്ചു ചുംബിച്ചപ്പോൾ സിഗരിറ്റിന്റെയും, മദ്യത്തിന്റെയും മനംമടിപ്പിക്കുന്ന മണമേറ്റപ്പോൾ പിടിച്ചു നിൽക്കാനായില്ല...
ഓടി പുറത്തുപോയി ശർദ്ദിച്ചപ്പോൾ അദ്ദേഹത്തിന്റെ അമ്മ നെഞ്ചത്തടിച്ചു പറഞ്ഞത്... പെണ്ണ് വയറ്റിലിട്ടോണ്ടാണല്ലോ ദൈവമേ വന്നേക്കുന്നേ എന്നായിരുന്നു...
പ്രതികരണശേഷി ഇല്ലാതേ പോയതിനാൽ എല്ലാം സഹിച്ചു..രണ്ട് മക്കളെയും തന്ന് കുടിച്ചു, കുടിച്ചു കരൾ ഇല്ലാണ്ടായി അദ്ദേഹമങ്ങു പോയി.. സ്വത്തുക്കളെല്ലാം സ്വന്തമാക്കാൻ ചേട്ടായീ കുടിപ്പിച്ചു കൊന്നു എന്നുള്ളതാണ് സത്യം..അദ്ദേഹത്തിന്റെ കമ്പനിയിൽ മാനേജരായിരുന്ന ചേട്ടായിക്ക് അറിയാമായിരുന്നു ജേക്കബ് ഒരു കരൾ രോഗിയാണെന്നുള്ളത്‌.. അതറിഞ്ഞു കൊണ്ടാണ് സ്വന്തം പെങ്ങളെ കെട്ടിച്ചു കൊടുത്തത്.. ജേക്കബ് മരിച്ചതിനു ശേഷം ഔദാര്യം പോലെ വല്ലപ്പോഴും കുറേ വീട്ടുസാധനങ്ങൾ വാങ്ങി തരും ..പലപ്പോഴും പട്ടിണി ആയിരുന്നു..എല്ലാം അറിയാവുന്ന ചേട്ടായിയുടെ ഭാര്യയാണ് പലപ്പോഴും ആ പട്ടിണിയിൽ നിന്നും രക്ഷിച്ചത്..ചേട്ടായീ അറിയാതെ പൈസയും, സാധനങ്ങളും ഒക്കെ കൊണ്ട് തരുമ്പോൾ നാത്തൂൻ പറയും...ചേട്ടായീ ചെയ്ത തെറ്റിന്.. ഓരോ പ്രാവശ്യവും നിന്റെ കണ്ണ് നിറയുമ്പോൾ അതിൽ എന്റെ മക്കളെങ്കിലും വെന്തു വെണ്ണീറാകാതിരിക്കാനാ ഞാനിത് ചെയ്യുന്നത് എന്ന്..
എല്ലാം അറിയാമായിരുന്നു...മനസ്സിലടക്കി ഉരുകി തീരുവായിരുന്നു ഇന്നുവരെ..

ഒഴുകിയിറങ്ങിയ കണ്ണുനീർ സൂസൻ തുടച്ചു കളഞ്ഞപ്പോൾ അവൾ ഉറപ്പിച്ചിരുന്നു.. . എന്റെ മോൾക്ക്‌ ഇഷ്ട്ടമല്ലാത്തതൊന്നും ചെയ്യാൻ ഇനി സമ്മതിക്കില്ലെന്ന്..
ലിറ്റി ആയിരുന്നു സൂസന്റെ ധൈര്യം..
ലിറ്റിയേ പോലുള്ള പെൺകുട്ടികളാണ് എന്നേ പോലുള്ള അമ്മമാർക്ക് വേണ്ടത്..
പ്രതികരണശേഷി ഉള്ള പെൺകുട്ടികൾ.. രക്തബന്ധത്തിനുപോലും വിലയില്ലാത്ത.. ഇന്നത്തെ ലോകത്തിൽ ജീവിക്കാൻ ലിറ്റിയേ പോലൊരു മകളെ കിട്ടിയതിന്റെ ആശ്വാസത്തിൽ സൂസൻ ഉറങ്ങാനായി കണ്ണുകളടച്ചു..അപ്പോൾ അവിടമാകെ മുല്ലപ്പൂവിന്റെ ഗന്ധം നിറഞ്ഞു..അതിശയത്താൽ ചുറ്റും നോക്കിയപ്പോൾ ആ ഇരുട്ടിലും സൂസൻ കണ്ടു.. മുറിയിലേ മാതാവിന്റെ പുഞ്ചിരിക്കുന്ന രൂപം..ഒരു കുളിർ കാറ്റ് സൂസനേ തഴുകി കടന്നുപോയി...

.By.. .....ബിൻസ് തോമസ്‌....