ഉഷ്ണരാഗം

ഉഷ്ണരാഗം
=============
ഇന്നലെ പെയ്ത മഴയിലെന്നിലെ-
മാനസവാടി കുളിർക്കെ നനഞ്ഞു.
ഇതുവരെ വിണ്ടുകീറിയ മൺതടമായിരുന്നവിടെ. 
പൂവോടെ സൂര്യതാപത്തിൽ തളർന്നുകരിഞ്ഞ -
ചെടികളുണ്ടായിരുന്നിവിടെ ശവംപോലെ.
ഒരിറ്റുവെള്ളം കിട്ടാതെ മരിച്ചുവീണ -
കുഞ്ഞുജീവികൾ കൺമിഴിച്ചു വേറേയും.

എന്റെ മണ്ണും മനസ്സും ഒരുപോലായി.
രണ്ടും അഗ്നിപൊഴിക്കാൻ തയാറായി
 മഴയേ നീ വന്നു കെടുത്താതിരുന്നെങ്കിൽ -
എന്താകുമായിരുന്നു എന്റെ മണ്ണും മനസ്സും.
ഒന്നു നീ പെയ്തൊഴിഞ്ഞു മറഞ്ഞതെവിടെ.

ഒരുവർഷം പെയ്താൽ മതിയാകില്ലിവിടെ
പെയ്യണം മാരി നിരന്തരമിവിടെ.
വളരട്ടെ മണ്ണിലെ ചെടിയും ജീവനും
തളരാതിരിക്കട്ടെ എന്റെ മനസ്സും.
അതുവരെ പാടാം ഞാൻ ഉഷ്ണരാഗം.

=======
രതീഷ് സുഭദ്രം