... ചേരദംശനം....

... ചേരദംശനം....
ഞാൻ ഈയിടെ രണ്ട് പാമ്പുകളെ കണ്ടു...
ഒന്ന് ഉഗ്രവിഷമുള്ള ഒരു മൂർഖൻ..പത്തി വിരിച്ചുനിന്നപ്പോൾ നെറ്റിയിൽ മനോഹരമായ ചന്ദ്രക്കല..
എന്റെ പട്ടി കുരച്ചു ബഹളം വയ്ക്കവേ മൂർഖൻ കുറച്ചു നേരം പത്തി വിരിച്ചു നിന്നു. പിന്നെ പത്തി താഴ്ത്തി വളരെ സാവധാനത്തിൽ ശാന്തനായി എന്റെയും പട്ടിയുടെയും അരികിലൂടെ പുറത്തേയ്ക്ക് ഇഴഞ്ഞു..
ഉഗ്രവിഷമുള്ളതുകൊണ്ട് തന്നെ ഞാൻ പട്ടിയെ മുറുകെ പിടിച്ചിട്ടുണ്ടായിരുന്നു. 
രണ്ടാമത്തെ പാമ്പ് ഒരു പെൺ ചേരയായിരുന്നു. നേരെത്തെ പറഞ്ഞ മൂർഖനുമായി ഇഴഞ്ഞു നടക്കുക എന്നത് ചേരയുടെ ഒരു വിനോദമായിരുന്നു. മറ്റുള്ളവരുടെ സ്വകാര്യതകളിൽ ഒരു പരിധി വിട്ട് ഇടപെടാത്തവനായതു കൊണ്ട് അവർ ഒരുമിച്ചു ഇഴയുന്നതിൽ എനിക്കു യാതൊരു പരാതിയും ഇല്ലായിരുന്നു..
നാട്ടിലെ പശുവിനോടും, പട്ടിയോടും ആടിനോടും അവരുടെ സൗഹ്യദത്തെ പറ്റി വീമ്പിളക്കുന്നതു അതിനാൽ ഞാൻ കണ്ടില്ലെന്ന് നടിച്ചു
ഇക്കാലത്തിനിടയിൽ ഞാൻ ഒത്തിരി പാമ്പുകളെ കണ്ടിട്ടുണ്ട്. എത്രയോ രാജവെമ്പാലകൾ , എത്രയോ വെള്ളിക്കെട്ടൻമാർ.. എത്രയോ രക്ത അണലികൾ... അതിൽ പലതും ഞാനീ കണ്ട മൂർഖനേക്കാൾ വിഷമുള്ള പാമ്പുകളായിരുന്നു. അതു കൂടാതെ പാമ്പുകളെ റാഞ്ചി പറക്കുന്ന ഒത്തിരി പരുന്തുകളേയും എനിക്കറിയാമായിരുന്നു..
കഴിഞ്ഞ ദിവസം നാട്ടുവഴിയിലൂടെ നടക്കുമ്പോൾ വല്ലാത്ത ദുർഗന്ധത്താൽ ഞാൻ മൂക്കുപൊത്തി. സഹികെട്ടപ്പൊൾ എതിരെ വന്നവരോടു കാരണം തിരക്കി.
കാട്ടിൽ ഏതോ കൊച്ചു തെരുവുപട്ടി ചത്തു കിടപ്പുണ്ട് . അവർ പറഞ്ഞു.
പട്ടി ചത്തതിൽ എനിക്ക് ദുഃഖമൊന്നും തോന്നിയില്ല. വഴിക്കരുകിലെ പൊന്തക്കാട്ടിൽ നിന്നും അപ്പോൾ ഞാനൊരു ചിരി കേട്ടു.. നോക്കുമ്പോൾ ചേരയാണ്..
മൂർഖൻ നിൽക്കുന്ന പോലെ നിൽക്കാൻ ശ്രമിക്കുന്നുണ്ട്. എനിക്ക് ചിരി വന്നു. പത്തിയില്ല.. ചന്ദ്രക്കലയില്ല.
എന്തേ ചിരിച്ചത്..?
ഞാനും മൂർഖൻ ചേട്ടനും കൂടിയാ ആ പട്ടിയെ കൊന്നത് ..ചേര പറഞ്ഞു.
ഞാൻ ചോദിച്ചു. അതെങ്ങനെ?
ഞാനും മൂർഖൻ ചേട്ടനും ഒരുമിച്ചാ ആ പട്ടിയെ ദംശിച്ചത്..
ഞാൻ ഇപ്പോൾ ഒരു സംശയത്തിന്റെ മുൾമുനയിലാണ്.
പ്രിയപ്പെട്ടവരെ ... നിങ്ങളോ ?

.... പ്രേം.....