എന്റെ വീട്

കാടിനെക്കൊന്നവരെ - യെൻ
കനവിനെക്കൊന്നവരെ....
കാട്ടരുവിക്കുളിരിൽ കുളിച്ചും
കൈക്കുമ്പിളിൽ കോരിക്കുടിച്ചും,
കായ്കനി തിന്നു വയറ് നിറച്ചും,
കാത്തുസൂക്ഷിച്ച മരക്കുടിലിനെ
കാണാമറയത്തൊളിപ്പിച്ചുവോ...???

മരവുരിയൂരിയെറിഞ്ഞവരേയെൻ
മണ്ണിന്റെ മാറു പിളർന്നവരേ..

നരനും നരിയുമൊരുമിച്ചുറങ്ങിയും
നടവഴിയിരുളിലറയ്ക്കാതെ നടന്നും
നാമസങ്കീർത്തനം പോലുണർത്തുമാ-
നാലു ദിക്കിലെക്കിളിക്കോലാഹലങ്ങളും
നാവേറ്റു പിടിച്ചു ചിരിച്ചും,
നക്ഷത്ര രാജ്യം മറച്ചയീക്കുടിലിനെ
നാണിപ്പിച്ചു മരുഭൂമിയാക്കിയോ..??

ഗോപകുമാർ കൈമൾ