S S L C പരീക്ഷ

ഇന്നലെ S S L C പരീക്ഷയുടെ റിസൾട്ട് വന്നപ്പോൾ പ്രിയതമന്റെ വക ഒരു ചോദ്യം.

ഡീ.... നീ ഓർക്കുന്നുണ്ടോ ....നിന്റെ റിസൾട്ട് വന്ന ദിവസം.
എന്റെ പൊന്നോ അങ്ങനെ മറക്കാൻ പറ്റുമോ.

ട്യൂഷൻ ക്ലാസ്സിലെ രാജേഷ് ചേട്ടന്റെയും, പ്രദീപ് ചേട്ടന്റെയും, ഹരിച്ചേട്ടന്റെയും, അനിൽചേട്ടന്റെയും, മോഹൻസാറിന്റെയും ഒക്കെ തല്ലിന്റെ ശക്തിയിൽ എങ്ങനെ ഒക്കെയോ പരീക്ഷ എഴുതി ദേവിക്ക് വഴിപാടും നേർന്ന് നോമ്പു നോറ്റിരുന്ന ദിവസങ്ങൾ.

സ്ഫടികത്തിലെ തിലകൻ സാർ അവതരിപ്പിച്ച കഥാപാത്രത്തെ പോലെ കണക്കിന്റെ തലതൊട്ടപ്പനായ രാജേഷ് ചേട്ടനെ ഇന്നും കാണുമ്പോൾ നെഞ്ചിൽ ഒരു ആന്തലാ....കണക്കിന് എന്നെ ജയിപ്പിച്ചെടുത്തത്തിന്റെ മുഴുവൻ ക്രെഡിറ്റും രാജേഷ് ചേട്ടന് അർഹതപെട്ടതാണ്.

എന്റെ സംസാരം കേട്ടാൽ നിങ്ങൾക്ക് തോന്നും ബാക്കി വിഷയങ്ങൾ ഒക്കെ അരച്ചു കലക്കി കുടിച്ചിരിക്കുവായിരുന്നോ എന്ന്. അതേ കുറിച്ചൊന്നും പറയാതിരിക്കുന്നതാ ഭേദം. അങ്ങനെ എങ്ങനെ ഒക്കെയോ പരീക്ഷ എന്ന കടമ്പ കഴിഞ്ഞു കിട്ടി.

റിസൾട്ട് വരുന്നതിന്റെ അന്ന് രാവിലെ പേപ്പർ വരുന്നതൊന്നും കാത്തു നിൽക്കാതെ അച്ഛൻ നാട്ടിലുള്ള കമ്പ്യൂട്ടർ സെന്റർ ലക്ഷ്യം വെച്ച് വെളുപ്പിനെ എന്റെ നമ്പറും വാങ്ങി പോയി.

അച്ഛാ പേപ്പറിൽ വരും അപ്പോൾ നോക്കാം എന്ന് ഞാൻ പറഞ്ഞെങ്കിലും

അച്ഛന് ഒരു ആവേശം പോലെ. സർവ്വ ദൈവങ്ങളിലും വിളിച്ചു പ്രാർത്ഥിച്ചു അച്ഛനെ നോക്കി വാതിൽക്കൽ തന്നെ നിലയുറപ്പിച്ചു.ദൂരെ നിന്ന് തന്നെ അച്ഛന്റെ വരവ് കണ്ടപ്പോൾ എനിക്ക് വല്ലാത്ത ഒരു വിമ്മിട്ടം. വയറു വേദനയോ തലചുറ്റലോ അങ്ങനെ എന്തൊക്കെയോ. അച്ഛൻ വീടടുക്കാറായതും ഞാൻ ഓടി അടുക്കളേൽ പോയി പതുങ്ങി. ഉടനെ അമ്മേടെ വക ഒരു ഡയലോഗും ,

പഠിക്കാൻ പറയുമ്പോൾ മാസികയും നോക്കിയിരുന്നാൽ ഇങ്ങനെ കിടന്നു തെക്കോട്ടും വടക്കോട്ടും ഓടേണ്ടി വരും എന്ന്.ഇവിടെ പതുങ്ങി നിൽക്കണ്ട പോയി വാങ്ങിച്ചോ കിട്ടാനുള്ളത് എന്നു....

അമ്മയുടെ ഞാൻ പത്തിൽ മൊട്ടയിട്ടെന്നുള്ള പോലെ ഉള്ള വർത്തമാനം കേട്ടപ്പോൾ സഹിച്ചില്ല.

അപ്പോഴേക്കും അച്ഛൻ വീട്ടിൽ എത്തിയിരുന്നു. മുറ്റത്ത് നിന്ന് ഉച്ചത്തിൽ എന്നെ വിളിച്ചതും പതുങ്ങി പതുങ്ങി ചെന്ന് കിട്ടാനുള്ളത് ഒന്നു പോലും വിടാതെ കൈയോടെ വാങ്ങാന്ന് വെച്ചു ചെന്ന് നിന്നതും, തല കുനിച്ചു നിന്ന എന്റെ വായിലേക്ക് ഒരു ലഡു വെച്ചു തന്നിട്ട് കെട്ടിപ്പിടിച്ചു.

നടക്കുന്നതൊക്കെ സ്വപ്നം എന്ന് ഓർത്തു അച്ഛന്റെ മുഖത്തോട്ട് നോക്കുമ്പോൾ അച്ഛൻ പറഞ്ഞു ,നീ ജയിച്ചു എന്ന്....അനനുഭവിച്ച സന്തോഷം ഹോ....പറഞ്ഞറിയിക്കാൻ പറ്റില്ല.

പിന്നീട് പ്രീഡിഗ്രിക്ക് ചേർന്നതും ഇഷ്ടമില്ലാത്ത വിഷയം(4th group) അച്ഛന്റെയും അമ്മയുടെയും നിർബന്ധത്തോടെ എടുത്തു തലേൽ വെച്ചതും റിസൾട്ട് വന്നപ്പോൾ എന്റെ അല്ല എന്ന് പറഞ്ഞു കൊണ്ട് മാർക്ക് ലിസ്റ്റ് തിരിച്ചു കൊടുത്തതും ഒക്കെ ഇന്നോർക്കുമ്പോൾ രസകരം.

ഡിഗ്രിക്ക് എന്റെ ഇഷ്ടവിഷയം ആയ ഹിസ്റ്ററി എടുത്ത് കുത്തിയിരുന്ന് പഠിച്ചിട്ട് 1st ക്ലാസ്സ് കിട്ടിയ മാർക്ക് ലിസ്റ്റും വാങ്ങി തുള്ളിച്ചാടി രസിച്ച ദിനങ്ങൾ.

ഇന്നിപ്പോൾ അന്നത്തെ ജീവിതത്തിലേക്ക് തിരിഞ്ഞു നോക്കുമ്പോൾ ചിരിയാണ് വരുന്നത്.തല്ലുകൊണ്ടു കുത്തിയിരുന്ന് പഠിച്ച സൈൻ തീറ്റയും കോസ് തീറ്റയും ബയോളജിയും കെമിസ്ട്രിയും ഫിസിക്‌സും ഒക്കെ അടുക്കളയിൽ സമ്പാറിലോ മത്തിക്കറിയിലോ ഒന്നും ചേർക്കാൻ പറ്റാതെ കൊഞ്ഞനം കുത്തുന്നു.

മഞ്ജു അഭിനേഷ് 6/5/2017, 12 :45 Pm