ദൈവത്തിനു ഒരു മൂഡോഫ്

രാവിലെ ഞാൻ ആവുന്നത്ര പ്രാർത്ഥിച്ചിട്ടും ദൈവം കേട്ടില്ലല്ലോ. തോമസ്‌ സാർ ഇന്നു ക്ലാസ്സിൽ വരല്ലേ എന്ന് എത്ര പ്രാര്ഥിച്ചതാ. രാവിലെ സ്റ്റാഫ്‌ റൂമിന്റെ മുൻപിലൂടെ വന്നപ്പോൾ ഞാൻ കണ്ടതാ, ദേ സാർ സ്റ്റാഫ്‌ റൂമിൽ ഇരിക്കുന്നു. ദൈവമേ ഹോംവർക് ചെയ്തിട്ടില്ല. ഇന്നു സാർ തുട പൊളിക്കും.
ബെൽ അടിക്കാൻ ഇനിയും സമയം ഉണ്ട് ഇപ്പൊ ചെയ്താലോ. ഇനി സാർ അതെങ്ങാനും കണ്ടോണ്ടു വന്നാൽ അതു മതി ഒരടി കൂടുതൽ കിട്ടാൻ .

അല്ലെങ്കിലും ഈയിടെയായി ഞാൻ പ്രാര്ഥിക്കുന്നതൊന്നും ദൈവം കേൾക്കുന്നില്ല. ദൈവത്തിനെന്തോ മൂഡ്‌ ഓഫ്‌ ആണെന്ന് തോന്നുന്നു. അല്ലെങ്കിൽ പിന്നെ ഇത്ര ചെറിയ കാര്യം പോലും ചെയ്തു തരാത്ത ദൈവം എന്ത് ദൈവമാണ്. സാറിനെ വണ്ടി ഇടിക്കാൻ ഒന്നും അല്ലല്ലോ ഒരു ചെറിയ പനി പിടിച്ചാൽ മതി എന്നല്ലേ പ്രാർഥിച്ചത്. പക്ഷെ അതു പോലും ദൈവം കേട്ടില്ല.

കഴിഞ്ഞ ദിവസം ഡ്രിൽ പീരിയഡിൽ ഞാൻ നീതു P. K കാൺകെ ഗോൾ അടിക്കാൻ പറ്റണം എന്ന് പ്രാർത്ഥിച്ചിട്ടു ദൈവം മൈൻഡ് പോലും ചെയ്തില്ല. നീതു P. K നോക്കിയുമില്ല എനിക്ക് ഗോൾ കിട്ടിയുമില്ല. അപ്പഴേ എനിക്ക് തോന്നി ദൈവത്തിന്റെ മൂഡ്‌ ശരിയല്ല എന്ന്. എന്നാലും എന്തായിരിക്കും ദൈവം ഇത്ര മൂഡ്‌ ഓഫ്‌ ആയതു . ഒറ്റക്ക് അല്ലെ ഉള്ളൂ. ചിലപ്പോ അതായിരിക്കും .

ഗുഡ് മോർർർർർണീീംഗ് സാർ . എല്ലാരും കൂടെ ഈണത്തിൽ പറയുന്നത് കേട്ടാണ് ഞാൻ ആകാശത്തിലെ ചിന്ത നിർത്തി ഭൂമിയിൽ എത്തിയത്. സാർ നടക്കുന്നതിനു അര അടി മുൻപേ കക്ഷത്തിൽ ഇരിക്കുന്ന ഹാജർ ബുക്കിന്റെ നടുപ്പേജിൽ ഇരുന്നു ഒരു ചൂരൽ സഞ്ചരിക്കുന്നുണ്ടാവും. തുട ഇപ്പഴേ നീറി തുടങ്ങി

അറ്റെൻഡൻഡെൻസ് എടുത്തു തീർന്നപ്പോൾ മുതൽ എന്റെ ചങ്കിടിപ്പ് എനിക്ക് തന്നെ കേൾക്കാവുന്നത്ര നിശബ്ദത. സാർ നീളൻ അറ്റെൻഡൻസ് രെജിസ്റ്ററിൽ എന്തൊക്കെയോ കുത്തിക്കുറിക്കുന്നു. ദൈവമേ ഇപ്പൊ ഹോം വർക്ക്‌ ചോദിക്കുമല്ലോ.

സാർ ടെക്സ്റ്റ്‌ ബുക്ക്‌ എടുത്തു എണീറ്റു. Algebra എന്ന് ബോർഡിൽ വലിപ്പത്തിൽ എഴുതിയിട്ട് ഞങ്ങളെ നോക്കി പറഞ്ഞു " ഇന്നു മുതൽ നമ്മൾ അക്കങ്ങളോടൊപ്പം അക്ഷരങ്ങളും ചേര്ക്കാൻ പഠിക്കും. " ഹോം വർക്കിന്റെ കാര്യം സാർ മറന്നു.

ഹോ ആ ഒരു നിമിഷം അനുഭവിച്ച സമാധാനം പറഞ്ഞറിയിക്കാൻ പറ്റില്ല. എല്ലാവരും ക്ലാസ്സിൽ ശ്രെദ്ദിക്കുന്നു ഞാൻ സമയത്തിലും. സാർ ഹോം വര്ക്കിന്റെ കാര്യം ഓർക്കുന്നതിനു മുൻപേ ഈ പീരീഡ്‌ ഒന്ന് തീർന്നാൽ മതിയായിരുന്നു. സത്യം പറഞാൽ പ്യൂൺ ദിവാകരൻ ചേട്ടൻ പ്രിൻസിപ്പലിന് ചായ വാങ്ങാൻ പോയിട്ട് വരാനെങ്ങാനും വൈകുമോ എന്ന് എനിക്ക് പേടി ഉണ്ടായിരുന്നു.ദിവാകരൻ ചേട്ടൻ വൈകിയാൽ ബെൽ അടിക്കാൻ വൈകിയാലോ.

അങ്ങനെ ഓരോന്ന് ആലോചിച്ചു ഇരിക്കുന്നതിനിടയിൽ സാർ പറഞ്ഞു ഇന്നത്തേക്ക് ഇത്രയും മതി. ആർക്കെങ്കിലും എന്തേലും സംശയം ഉണ്ടേൽ ചോദിച്ചോളൂ.ങേ സാർ എന്തായിരുന്നു പഠിപ്പിച്ചത്. ഞാൻ ഇത്രയും നേരം സ്വപ്നലോകത്തായിരുന്നോ. പ്രതീക്ഷിച്ചതു പോലെ തന്നെ ഫസ്റ്റ് ബെഞ്ചിൽ ഫസ്റ്റ് ഇരിക്കുന്ന അരുൺ മോഹൻ എണീറ്റു . ആള് ക്ലാസ് ലീഡർ ആണ്. ഇവന് ഈ സംശയം തീരില്ലേ. എല്ലാ ടീച്ചേഴ്സിനോടും ചോദിക്കുന്നത് കേള്ക്കാം. എനിക്കൊന്നും ഇതുവരെ ഒരു സംശയവും തോന്നിയിട്ടില്ലല്ലോ എനിക്ക് ആകെ ഉള്ള സംശയം ഇവന് മാത്രം എങ്ങനാ എല്ലാത്തിനും A+ കിട്ടുന്നത് എന്നാണു.

എന്താണ് അരുൺ ചോദിച്ചോളൂ...

അതല്ല സാർ ഇന്നലത്തെ ഹോം വർക്ക്‌... ബുക്ക്‌ നീട്ടിക്കൊണ്ടു അരുൺ പറഞ്ഞു.

ഇപ്പൊ എന്റെ കയ്യിൽ ഒരു ബോംബ് ഉണ്ടായിരുന്നെങ്കിൽ സത്യമായിട്ടും ഞാൻ അത് അവന്റെ തലയിൽ വച്ചു പൊട്ടിച്ചേനെ. പീരീഡ്‌ തീരാൻ 5 മിനിറ്റ് കൂടിയേ ഉണ്ടായിരുന്നുള്ളു. സാർ മറന്നിരുന്നതായിരുന്നു അപ്പഴാ അവന്റെ ഒരു ഹോം വർക്ക് ..

ഹോം വർക്ക് എല്ലാരും ചെയ്യതല്ലോ അല്ലേ.. എന്നെ നോക്കിക്കൊണ്ടു സാർ ചോദിച്ചു.. ശെടാ എന്നാലും ഞാൻ ചെയ്തില്ലെന്ന് ഇത്ര കൃത്യമായി സാറിന് എങ്ങനെ മനസ്സിലായി. അതോ എന്നെ നോക്കിയെന്നു എനിക്ക് തോന്നിയതാണോ.. ? ഞാൻ അറിയാതെ എണിറ്റു നിന്ന് പോയി... ദൈവമേ തനിയെ തല്ലു കൊള്ളണമല്ലോ..

ഹാഹ് എനിക്കറിയാം ആരെങ്കിലുമൊക്കെ കാണുമെന്നു.. വേറെ ആരാ ഉള്ളത്..

ഹാവൂ.. എന്റെ മുൻപിലെ ബെഞ്ചിൽ മൂന്ന് പേര് എണിറ്റു.. ഹോ തല്ലു കൊള്ളാൻ ആണെങ്കിലും കൂടെ ആളുണ്ടെങ്കിൽ അതൊരു സമാധാനമാ...

സാർ ആദ്യത്തെ ആളെ വിളിച്ചു ... സാറിന്റെ ചൂരൽ തുടയിൽ പാട് വീഴ്ത്തി .. വേദന അവന്റെ മുഖത്തറിയാം.ദൈവമേ രണ്ടു പേരും കൂടെ കഴിഞ്ഞാൽ എന്റെ ഊഴമാണ് .. ഗോൾ അടിക്കുന്നത് നീതു P K കാണണം എന്ന് പ്രാത്ഥിച്ചിട്ടു ഞാൻ അടി കൊള്ളുന്നതാണല്ലോ ദൈവമേ അവൾ കാണാൻ പോകുന്നത്.. വല്ലത്ത ചതി ആണ് കേട്ടോ..

രണ്ടാമത്തെയും മൂന്നാമത്തെയും ആള് പോയി അവർക്കുള്ളത് വാങ്ങി വന്നു.. ഞാൻ ബെഞ്ചിൽ നിന്നിടത്തു നിന്ന് ഇറങ്ങാൻ തുടങ്ങിയപ്പോ വാതിൽക്കൽ ഒരു ശബ്ദം..

സാറെ .. പ്യൂൺ ദിവാകരൻ ചേട്ടനാണ് .. സാർ ദിവാകരൻ ചേട്ടനോട് എന്തോ സംസാരിച്ചിട്ട് അറ്റന്റൻസ് രജിസ്റ്റർ എടുത്തു നോക്കി .. എന്തോ പറഞ്ഞു .. രണ്ടു പേരും രജിസ്റ്ററും ആയി പോയി .. പ്രിൻസിപ്പൽ വിളിച്ചതായിരിക്കണം...

സാർ ഇല്ലാത്ത ക്ലാസ്സിൽ ഞാൻ നിൽക്കണോ ഇരിക്കണോ എന്ന കൺഫ്യൂഷനിൽ നിന്നു.. എല്ലാരും എന്നെ നോക്കി .ഹോ ഇതിലും ഭേദം തല്ലു കൊള്ളുന്നതായിരുന്നു. നീതു P K യും നോക്കുന്നുണ്ടാവണം .. അങ്ങോട്ട് നോക്കാൻ എനിക്ക് ധൈര്യം വന്നില്ല. ഇരുന്നാലോ.. സാർ ഇപ്പൊ തിരിച്ചു വരുമോ എന്തോ.വടി മേശപ്പുറത്തു തന്നെ ഇരിപ്പുണ്ട് അതുകൊണ്ടു സാർ വരാതിരിക്കില്ല .

മൂന്ന് മിനിറ്റ് തീരാൻ മൂന്ന് മണിക്കൂർ എടുത്തെന്നു തോന്നുന്നു.ഭാഗ്യം പീരീഡ് തീർന്ന ബെൽ അടിച്ചു . ഞാൻ ഇരുന്നു .. ദൈവമേ സാർ ഇനി വരല്ലേ .. ഇത്തവണ ദൈവത്തിന്റെ മൂഡ് ശെരിയായിരുന്നാൽ മതിയായിരുന്നു..

അടുത്ത പീരീഡ് തുടങ്ങി. ഹിന്ദി ടീച്ചർ വന്നു. ഭാഗ്യം തല്ക്കാലം രക്ഷപെട്ടു..

ഇനി നാളെ സാർ വരുമ്പോൾ ഇന്ന് ഞാൻ രക്ഷപെട്ട കാര്യം അരുൺ മോഹൻ പറയാതിരുന്നാൽ മതിയാരുന്നു . ദൈവമേ അവൻ ഓർക്കല്ലേ ഇനി നാളെ ദൈവത്തിന്റെ മൂഡ് എന്തായിരിക്കുമോ എന്തോ..

സാജു കെ മാത്യു