കരാട്ടേയും പാച്ചുവും

ബ്രൂസിലിരാജുവാണ് നാട്ടിലെ ബ്ലാക്ക് ബെൽറ്റ് കിട്ടിയ കരാട്ടേക്കാരന്‍...കഴുത്തുവട്ടം കിടക്കുന്ന തടിച്ച കറുത്തചരടില്‍ പുലിപ്പല്ലു കാണുംവിധം ഷര്‍ട്ടിന്‍റെ ബട്ടണൂരിമാറ്റി ബുള്ളറ്റില്‍ പോകുന്നത് കണ്ടിട്ടുണ്ടെന്നല്ലാതെ വല്ല്യ പരിചയമൊന്നുമില്ല
ഒരുദിവസം ബ്രൂസിലിരാജുവിന്‍റെ വീട് തെരക്കിയറിഞ്ഞു പാച്ചു അവിടെച്ചെന്ന്‍ വിവരം പറഞ്ഞു...

"കരാട്ടെ പഠിക്കണം"

അതിനെന്താ ശനിയാഴ്ച രാവിലെയിങ്ങു പോരാന്‍ പറഞ്ഞതും മസ്സിലൊക്കെ പിടിച്ചു കയറ്റിയാണ് പാച്ചു വീട്ടിലേക്കു പോയത്

ഉപ്പുകണ്ടം ബ്രദേഴ്സ് സിനിമ കണ്ടിറങ്ങിയപ്പോള്‍ മുതല്‍ കടന്നുകൂടിയ പാച്ചുവിന്‍റെ ആഗ്രഹമായിരുന്നു അഭ്യാസിയാകണമെന്ന്,

പടംതുടങ്ങി കുറച്ചുകഴിയുമ്പോള്‍ നീട്ടിവളര്‍ത്തിയ മുടിയുംകൊണ്ട് തലവെട്ടിത്തിരിച്ച് ബാബു ആന്‍റണി വന്നൊരു തകര്‍പ്പുണ്ട്...യാ...ഹൂ... ഹോ.... ഹൈ.... oഷ്.....

അന്ന് തിയേറ്ററില്‍നിന്നുമിറങ്ങിയ പാച്ചു മനസ്സിലുറപ്പിച്ച തീരുമാനമായിരുന്നു ഇത്

ശനിയാഴ്ച്ചതന്നെ ബ്രൂസിലിരാജുവിന്‍റെ വീട്ടുമുറ്റത്ത് കുറച്ചഭ്യാസികളുടെയൊപ്പം പാച്ചു കരാട്ടേയുടെ ബാലപാഠം തുടങ്ങി....ഒന്നുരണ്ടാഴ്ചത്തെ പഠിത്തം കഴിഞ്ഞപ്പോളേക്ക് പോകുന്ന പോക്കിലോക്കെ റോഡുസൈഡില്‍ കാണുന്ന കമ്മ്യൂണിസ്റ്റ്‌ പച്ചയുടെ മണ്ടകള്‍ കാലുവീശിയരിഞ്ഞുവീഴ്ത്തിയും ഓടിച്ചെന്നു കെളന്നുപൊങ്ങി തെങ്ങേല്‍ചവുട്ടി കവച്ചു ചാടിയുമൊക്കെ ഒരു കരാട്ടെക്കാരനായി പാച്ചു മാറിക്കൊണ്ടേയിരിക്കുകയാണ്,

വൈകിട്ട് ക്രിക്കറ്റ് കളിക്കാന്‍ വരുന്ന കൂട്ടുകാരുടെയൊക്കെ മുന്‍പില്‍ "അപ്പര്‍പഞ്ച്, മിഡില്‍പഞ്ച്, ലോവര്‍പഞ്ച്, ബ്ലോക്ക്‌ , ഇഡാമർ ഹയ്യാ ഹുവാ" എന്നൊക്കെ ബഹളമുണ്ടാക്കി സ്റ്റെപ്പുകള്‍ ഇറക്കുമ്പോള്‍ കൂട്ടുകാര്‍ക്കൊക്കെ പാച്ചുവിനോടു പേടിയും ബഹുമാനവുമായിത്തുടങ്ങി !!

ഒരുദിവസം അന്നത്തെ കെള കഴിഞ്ഞു പാച്ചു ബ്രൂസിലിയാശാനുമുന്പില്‍ "ഉസ്" വണങ്ങി പോകാന്‍ തുടങ്ങുമ്പോള്‍ ചങ്ങലപൊട്ടിപ്പോയ ഒരു നെഞ്ചക്ക് നീട്ടിക്കൊണ്ടു പറഞ്ഞു "നീയിതാ വെല്‍ഡിംഗ് വര്‍ഷാപ്പില്‍ കൊടുത്തൊന്നു വിളക്കിച്ച് നാളെയിങ്ങു കൊണ്ടുവരണം....".

ആശാന്‍റെ മുറിഞ്ഞുപോയ നെഞ്ചക്കുംകൊണ്ട് വരുന്നവഴിതന്നെ വര്‍ഷാപ്പില്‍ കേറി വിളക്കിച്ചു ചേര്‍ത്ത്‌ വീട്ടിലേക്കു പോകുമ്പോള്‍ പാച്ചു കണക്കുകൂട്ടി ഇതൊന്നു പഠിച്ചിട്ടുതന്നെ കാര്യം, ബാബുആന്‍റണിതന്നെ ചില സിനിമയില്‍ നെഞ്ചക്ക് കറക്കുന്നത് കണ്ടിട്ടുണ്ടങ്കിലും ഒരെണ്ണം കയ്യില്‍കിട്ടുന്നതിപ്പളാ, ഇതുവച്ച് കൂട്ടുകാരെയൊന്നു ഞെട്ടിക്കാന്‍ പറ്റിയ അവസരമാണ് ...

വീട്ടിലാരുമില്ലാത്ത തക്കംനോക്കി ദേഹമാസകലം എണ്ണവാരിത്തേച്ച് ഒരു കളരിയാശാന്‍റെ ലുക്കില്‍ പാച്ചു നെഞ്ചക്കുംകൊണ്ട് മുറ്റത്തേക്കിറങ്ങി, മരുന്നിനുപോലും റോഡില്‍ക്കൂടിയാരും പോകുന്നില്ലന്ന സങ്കടത്തില്‍ നില്‍ക്കുമ്പോള്‍ സഞ്ചിയും കക്ഷത്തില്‍വെച്ച് റേഷന്‍കടയിലേക്കു വെച്ചുപിടിക്കുന്നു കൂട്ടുകാരന്‍ സുരേഷ്...

ഡാ... സുരേഷേ.......

സുരേഷ് തിരിഞ്ഞുനോക്കി... മുറ്റത്ത്‌ പാച്ചു സ്റ്റീല്‍ബോഡിയില്‍ എണ്ണതേച്ചു വെങ്കുണിച്ച ചിരിയുമായി നിൽക്കുന്നു ...

ഇങ്ങോട്ടുവന്നേ......

റേഷന്‍കടയടക്കുവെടാ...പിന്നെവരാം, എന്തുവാ കയ്യില് ?

അത് കാണിക്കാനാ...ഇങ്ങോ വാടാ...

ലൈനേലെറിഞ്ഞു കരണ്ടു കളയുന്നതാന്നോടാന്നും ചോദിച്ച് സുരേഷു ചാടി മുറ്റത്തേക്കു വന്നതും പുച്ചത്തോടെ പാച്ചുവൊരു ചോദ്യം "

നീ സിനിമേലൊന്നുവിത് കണ്ടിട്ടില്ലേ ?

സുരേഷു പെട്ടന്ന് വാ പൊളന്നുകൊണ്ട് കണ്ടിട്ടുള്ള പടങ്ങളിലൂടെ ഊളിയിടുമ്പോള്‍ പാച്ചു ചാടിക്കേറിപ്പറഞ്ഞു

ഇതാണ് നെഞ്ചക്ക്..... കരാട്ടേയിലുള്ളതാ, ദാണ്ടീയറ്റം ചെന്ന് എതിരാളിയുടെ തലയ്ക്കടിക്കും എന്നിട്ട് നമ്മടെ കക്ഷത്തിലോട്ടു വന്നു കേറും...ഈ ചങ്ങലേടെ നടുക്കുപിടിച്ചോണ്ട് കൈ കറക്കിയാലുണ്ടല്ലോ ഒരു പത്തു പേരുണ്ടേലും അടിച്ചെല്ലാത്തിന്റെം തലപൊട്ടിക്കാം.....എനിക്കിന്ന് ബ്രൂസിലിയാശാന്‍ തന്നതാ

പാച്ചു കൂട്ടുകാരനായതിലുള്ള അഹങ്കാരവും അഭിമാനവും മുഖത്തു വരുത്തിക്കൊണ്ട് അണ്ണാക്കു തുറന്നു നിൽക്കുകയാണ് സുരേഷ് !!

"കറക്കുന്നയെങ്ങനാടാ ...ഒന്ന് കാണിച്ചേ" ?

സുരേഷിന്റെയാവശ്യം കേട്ട് പാച്ചു ചുറ്റുവട്ടവൊന്നു പാളിനോക്കി.... സകലദൈവങ്ങളേം മനസ്സില്‍ വിളിച്ചുകൊണ്ട് നെഞ്ചക്കിന്‍റെ ഒരറ്റം മുറുക്കെപ്പിടിച്ച് മറ്റേയറ്റം സര്‍വ്വശക്തിയുമെടുത്താഞ്ഞു വീശി....

ചീറിവന്ന നെഞ്ചക്കിനെ സ്വീകരിക്കാന്‍ പൊക്കിപ്പിടിച്ചു തയ്യാറാക്കിവെച്ച കക്ഷത്തിനവസരം കൊടുക്കാതെ താടിയെല്ലേറ്റെടുത്തു ഭംഗിയാക്കി ....

നിലംതല്ലി വീണ പാച്ചു..... ജീവനുംകൊണ്ടോടിയ സുരേഷ്.......

പാച്ചുവിന്‍റെ കാര്യമെന്തായിക്കാണുവോന്നും ചിന്തിച്ച് നഖോംകടിച്ച് റേഷന്‍കടയില്‍ സുരേഷു ക്യൂനില്‍ക്കുമ്പോള്‍ സ്വപ്നസഞ്ചാരി ഓട്ടോ പാഞ്ഞു വരുന്നുണ്ട്......

സുരേഷ് പിന്നേം തിരിഞ്ഞുനോക്കി...പാച്ചുവിന്‍റെ മുഖം തോര്‍ത്തില്‍ പൊതിഞ്ഞുവെച്ചേക്കുന്നു, ഓട്ടോയുടെ അറ്റത്തിരുന്ന വടക്കേലെ രായപ്പന്‍കൊച്ചാട്ടന്‍റെ കഴുത്തേല്‍ക്കൂടെ നെഞ്ചക്ക് ഞാന്നുകിടപ്പുണ്ട്, കടിച്ച പാമ്പിനെ ഡോക്ടറെ കാണിക്കാന്‍കൊണ്ടുപോകുന്ന ജിജ്ഞാസ ആ മുഖത്തൂന്നു വായിച്ചെടുക്കാം.....

ശരവേഗത്തില്‍ പാഞ്ഞുപോകുന്ന ഓട്ടോയുടെ പിന്നില്‍ എഴുതിയിരിക്കുന്ന "ഈ പാവം പൊയ്ക്കോട്ടേ" എന്ന വരികള്‍ പാച്ചു പറയുന്നതുപോലെതോന്നി :-P :-P

--------------------------------------------------------------------
സന്തോഷ് നൂറനാട്