മണ്ണും ഞാനും

മണ്ണിൽ കുരുത്തിട്ടു
മണ്ണിൽ ലയിക്കുവാൻ

മണ്ണിൻ നിറത്തിനെ
മാറോടുചേർത്തുഞാൻ

മഴയുടെ ചുംബനമേറ്റുവാങ്ങി
മണ്ണിൻ മുരടിച്ച മനസ്സിൽ
നനവുപടർന്നപ്പോൾ

ചേറിൽ കുതിർന്നൊരാ ധാന്യവിളകളെ
ഓരോന്നായ് നട്ടുഞാൻ വരമ്പിലാകെ

വിശന്നവയറിന് അന്നമാണ് മണ്ണ്
ഇന്നെന്റെ ജീവന്റെ അംശമാണ്

നാളെ ഞാൻ മണ്ണിൻ മടിയിലുറങ്ങുമ്പോൾ
താരാട്ടുപാട്ടിന്റെ ഈണവുമായൊരു
ചാറ്റൽമഴ എന്നെ പുൽകിയുണർത്തിയാൽ

പുതിയൊരുനാമ്പുമായി കണ്ണുതുറന്നുഞാൻ
വീണ്ടുമീമണ്ണിൽ സ്നേഹത്തിൻ വേരു തേടും.

Jaya.