"വെറും വാക്ക്"

"വെറും വാക്ക്"

"അമ്മു നാമംചൊല്ലി പോയിരുന്നു പഠിക്കൂ....പെണ്ണിന് ഈയിടെ കുറുമ്പ് കൂടിയിരിക്കുന്നു" ഗീതു അടുക്കളയിലിരുന്നുകൊണ്ട് അവളോട് പറഞ്ഞു

"അമ്മേ പൗഡർ എവിടെ... ഇവിടെ കാണാനില്ല്യ.."

"നാമം ചൊല്ലാൻ പോണ നിനക്ക് എന്തിനാ പൗഡർ...ഐശ്വര്യറായ് ആണെന്ന പെണ്ണിന്റെ വിചാരം..."

"കുളിച്ചു കഴിഞ്ഞാ പൗഡർ ഇടണമെന്ന് അമ്മക്കറിഞ്ഞൂടെ"

അപ്പോഴേക്കും ഗീതു അടുക്കളയിൽ നിന്ന് ഓലക്കോടിയുമായി അടിക്കാൻ ചെന്നു..."പോയിരുന്നു നാമം ചൊല്ല് പെണ്ണേ..."

അമ്മു,
രണ്ടാം തരത്തിലാണെങ്കിലും കുഞ്ഞുവായിൽ വലിയവർത്തമാനം പറയുന്ന മിടുക്കികുട്ടി,

വിളക്ക് കൊളുത്തി നാമം ജപിക്കാൻ ഇരുന്നു

"രാമ രാമ രാമാ രാമ രാമ രാമ രാമാ പാഹിമാം
രാമ പാദം ചേരണേ മുകുന്ദരാമ പാഹിമാം... അമ്മേ, സമയം എത്രയായി.?"

"ങേ...നീ അത് ചൊല്ലി എണീക്കുന്നുണ്ടോ... എന്തിനാ ഇപ്പൊ സമയമറിഞ്ഞിട്ട്.."

"ഡോറയുടെ പ്രയാണം തുടങ്ങാറായോന്നറിയാനാ.."

"അച്ഛനിങ്ങു വരട്ടെ നിന്റെ ഡോറയെ ഞാൻ കാണിച്ചു തരാ.."

"അമ്മേ ദേവി....
ഗുരുവായൂരപ്പാ കൃഷ്ണാ...
അസുഖം വരാതെ രക്ഷിക്കണേ...
അച്ഛൻ എന്നും കള്ളുകുടിക്കും
അമ്മയെ അടിക്കും...
ഇന്നെങ്കിലും അച്ഛൻ കള്ളു കുടിക്കാതെ വരണേ...ഭഗവാനെ.."

അമ്മു
ഗീതു അജയൻ
ദാമ്പതികളുടെ ഏകമകൾ
.... ദിവസവും അവളുടെ പ്രാർത്ഥനയാണിത്, ഓർമ്മവച്ചനാൾമുതൽ അച്ഛൻ മദ്യത്തിന് അടിമ, മദ്യം കഴിക്കാതെ വരുന്ന അച്ഛൻ അവളുടെ സ്വപ്നങ്ങളിൽ മാത്രമായിരുന്നു...

നാമംചൊല്ലി എണീറ്റ് നടക്കുമ്പോഴാണ്
ഉടനെ പടിവാതിൽ തുറന്ന് അജയൻ വരുന്നത്‌ ,"ന്റെ അമ്മുവേ....അമ്മുമോളെ.... എവിഡ്രി..."
മദ്യത്തിന്റെ ലഹരിയിൽ അജയന്റെ നാവ് കുഴഞ്ഞുപോകുന്നത് അയ്യാൾ പോലുമാറിയുന്നുണ്ടായിരുന്നില്ല
അമ്മു അയ്യാളെ നോക്കി തിരിഞ്ഞു ഓടി അടുക്കളയിൽ ചെന്ന് ഗീതുവിന്റെ അരക്കെട്ടിൽ കെട്ടിപ്പിടിച്ചു

"അമ്മേ...ദേ അച്ഛൻ....അച്ഛൻ ഇന്നും കള്ള് കുടിച്ചിട്ടുണ്ട്"

മോള് പോയി പഠിച്ചോ 'അമ്മ നോക്കട്ടെ"
ഗീതു ചെന്ന് നോക്കുമ്പോൾ അജയൻ ഉമ്മറത്ത് തൂണുംചാരി ഇരിക്കുന്നുണ്ടായിരുന്നു, ഒരു കുപ്പിയിൽ കുടിച്ചമദ്യത്തിന്റെ ബാക്കി, ഉടുമുണ്ട് അഴിഞ്ഞുവീണിരിക്കുന്നു,മിഴികൾ പാതിയെ തുറക്കാൻ കഴിയുന്നുള്ളൂ

"ഹോ...മനുഷ്യനെ നാണം കെടുത്താൻ ഇങ്ങനെയൊരുജന്മം..
മടുത്തു ഈ ജീവിതം , ഈ കൊച്ചുള്ള കാരണമാണ് ഇന്നും എന്നെ ജീവനോടെ കാണുന്നത്"

അവൾ അജയനെ എടുത്ത്പൊന്തിക്കാൻ ശ്രമിച്ചു
"വിടടി എന്നെ...നീയരാ എന്നെ പിടിക്കാൻ...പോയി നിന്റെ മറ്റവനെ പിടിയടി"

എഴുന്നേൽക്കാൻ ശ്രമിച്ച അയ്യാൾ താഴെവീണു ,ഒരുവിധത്തിൽ ഗീതു അയാളെ അകത്ത് കൊണ്ടിരുത്തി,
ഇരുന്ന ഇടത്തിൽനിന്ന് എഴുന്നേറ്റ്
തന്റെ കൈയ്യിലുള്ള മദ്യകുപ്പിയിൽനിന്ന് മദ്യം ഒരു ഗ്ലാസ്സിലേക്ക് ഒഴിച്ചു കുടിച്ചു.
ആ കാഴ്ച്ച ഭയാനകത്തോടെയാണ് അമ്മു നോക്കിനിന്നത്

"ഏട്ടാ...പായ ഇട്ടിട്ടുണ്ട് വന്ന് കിടന്നോളൂ...."

"മ്.... എന്നെ ഇത്ര നേരത്തെ ഉറക്കികിടത്തിയിട്ട് അവന്റെ കൂടെ പോകാണാനാണോ? ആണോടി മൂദേവി... ചോദിച്ചതിന് ഉത്തരം പറയടി...."

"ദേ, മനുഷ്യ.......ക്ഷമിക്കുന്നതിനും ഒരു പരിധിയുണ്ട്...."

"ആഹ്ഹ..എനിക്ക് നേരെ നിന്ന് കുരക്കാറായോ നായിന്റെ മോളെ"
അജയൻ അവളുടെ മുടികെട്ടിൽ കുത്തിപ്പിടിച്ചു,

"അമ്മേ...." അമ്മു അവളെ ചേർത്ത് പിടിച്ചു,കുതറി തെറിച്ച അവൾ ചുമരിന്റെ മൂലയിൽ ചെന്നുവീണു,
അമ്മുവിനെ മാറോട് ചേർത്ത് തേങ്ങി തേങ്ങി കരഞ്ഞു.
മദ്യത്തിന്റെ ലഹരിയിൽ അയ്യാൾ എപ്പോഴോ ഉറക്കത്തിലേക്ക് ലയിച്ചുവീണു..

"അമ്മേ..."

"എന്താ മോളെ"

"അച്ഛൻ എന്തിനാ കള്ള് കുടിക്കുന്നേ..?."
കുഞ്ഞു മനസിലെ ആ വലിയചോദ്യത്തിനുള്ള ഉത്തരം നൽകാൻ കഴിയാതെ ഗീതു അവളെ മാറോട് ചേർത്തണച്ചു,മിഴികളിൽ നിന്നുള്ള അശ്രുക്കളെ തടയുവാൻ അവളുടെ കൈകൾക്ക് ശേഷിയില്ലാതെയായി..

ഉദയസൂര്യന്റെ വെളിച്ചം അയാളിൽ സുബോധം സൃഷ്ട്ടിച്ചു, പതിയെ എഴുന്നേൽക്കാൻ ശ്രമിച്ചു, പെട്ടന്നാണ് തനിക്ക് ഉടുതുണിയില്ല എന്ന സത്യം മനസിലായത് , മുണ്ട് തപ്പിയെടുത്തുടുത്തു,

"ഗീതു ചായ...."
ചായുമായിവന്ന അവളുടെ മുഖത്തേക്ക് നോക്കാതെ അയ്യാൾ ചായ വാങ്ങി...
"അമ്മു എവിടെ" അയ്യാൾ ചോദിച്ചു

"അപ്പുറത്തുണ്ട്.."

ഇവിടെ വരാൻ പറയ്..."

"മ്...." അവൾ മൂളി

ഉടനെ അമ്മുവന്നു

"അമ്മുമോളെ....വാ , ഇന്നലെ നേരത്തെ ഉറങ്ങിയോ അച്ഛൻ കണ്ടില്ലാലോ"

"ഇല്ല ; ഞാ കണ്ടല്ലോ അച്ഛനെ..."

"ഉവ്വോ.....അച്ഛൻ കപ്പലണ്ടി മുട്ടായി വാങ്ങിയിരുന്നു കിട്ടിയില്ലേ..?

"ഇല്ല..."

"ങേ...അതെവിടെപ്പോയി ,നാരായണൻ ചേട്ടന്റെ കടയിൽ നിന്ന് ഞാൻ വാങ്ങിയതാണല്ലോ..."അയ്യാൾ സ്വയം ചോദിച്ചു

"അച്ഛാ...."

"എന്താടാ..."അജയൻ അമ്മുവിനെ എടുത്ത മടിയിൽ വച്ചു..."

"അച്ഛൻ ഇനി കള്ള് കുടിക്കേണ്ട ...എനിക്ക് പേടിയാ...
ഇന്നലെ അമ്മയെ തല്ലി....ഇനി എന്നേം തല്ലോ....."

അമ്മു... അച്ഛന് അറിയാതെ പറ്റിയതല്ലേ...."

"ഇനി കള്ള്കുടിക്കില്ലാന്ന് എനിക്ക് വാക്ക്താ ...'

"ഇല്ല, ഇനി അച്ഛൻ കുടിക്കില്ല"
അവളുടെ നെറ്റിയിൽ ചുംബിച്ചുകൊണ്ട് അയ്യാൾ പറഞ്ഞു.

അതുകേട്ട അമ്മുവിന്റെ സന്തോഷത്തിന് അതിരില്ലായിരുന്നു

"അമ്മേ...." അമ്മു ഗീതുവിനെ നീട്ടി വിളിച്ചു

"അച്ഛൻ ഇനി കള്ള് കുടിക്കില്ലന്ന്..."

"ഉവ്വോ..."

"ഞാനിന്നലെ കൊറേ പ്രാർത്ഥിച്ചു..'

"അമ്മുമോൾടെ പ്രാർത്ഥന ദൈവം കേട്ട് കാണും.."
ചെറുപുഞ്ചിരിയോടെ ഗീതു അവളുടെ നെറുകയിൽ തലോടി...

പ്രഭാത കൃത്യങ്ങളെല്ലാം കഴിഞ്ഞു അജയൻ ജോലിക്ക് പോയി , പടിവാതിൽ കടന്ന്
അച്ഛൻ കണ്മറഞ്ഞു പോകുന്നത് അമ്മു നോക്കിനിന്നു നല്ലൊരു രാത്രിക്ക് വേണ്ടി..

അന്ന് പതിവിലും നേരത്തെ മേല് കഴുകി അവൾ നാമം ചൊല്ലാൻ ഇരുന്നു, പകുതിയായപ്പോൾ കുറച്ചാളുകൾ ചേർന്ന് ഒരാളെ എടുത്തുകൊണ്ട് വരുന്നകാഴ്ച്ചയാണ് അമ്മു കണ്ടത്.

അമ്മേ .....ദാ അരണ്ടോ വരുന്നു"
ഗീതു അടുക്കളയിൽ നിന്നോടി വന്നാ കാഴ്ച്ച കണ്ട് തരിച്ചു നിന്നു..അജയേട്ടൻ...

"എന്താ.. എന്താ പറ്റിയേ..?."
കൂടെ വന്നവരോട് ചോദിച്ചു

"ആ വഴിയിൽ കിടന്നതാ ഞങ്ങൾ എടുത്തതൊണ്ട് പൊന്നു...
സൂക്ഷിക്കണേ പെങ്ങളെ... ആള് നല്ല ഫിറ്റാ..."
മറുപടി പറയാൻ കഴിയാതെ അവൾ തലകുനിച്ചു നിന്നു...

അമ്മുവും ഗീതുവും ചേർന്ന് അജയനെ ഉമ്മറത്തിണ്ണയിൽ കിടത്തി...

"എവിടെ...എവിടടാ എന്റെ കുപ്പി ,കുപ്പി എവിടെ..."
ബോധമില്ലാതെ അജയൻ ചോദിച്ചു..

"അമ്മേ...അച്ഛനെന്താ ഇങ്ങനെ..."

"അറിയില്ല മോളെ..."

"ഇന്ന് എനിക്ക് വാക്ക് തന്നതാ ഇനി കള്ള് കുടിക്കില്ലന്ന്...പിന്നെ...പിന്നെ..."
അവളുടെ മിഴികൾ നിറഞ്ഞു തുളുമ്പി...

ഗീതു അവളെ ചേർത്ത് പിടിച്ചു "സരല്ല്യാ മോളെ...അച്ഛന് ഒരുകാലത്ത്‌ ബോധ്യപ്പെടും നമ്മൾ എത്രത്തോളം സ്നേഹിച്ചു എന്ന്..."

മദ്യപാനം ആരോഗ്യത്തിന് ഹാനീകാരവും സന്തോഷത്തെ തല്ലിക്കെടുത്തുകയുംചെയ്യുന്നു....

സൂക്ഷിച്ച് നോക്കിയാൽ ഇതുപോലെ മദ്യപാനത്തിനടിമപ്പെട്ട അജയനെയും,
അച്ഛന്റെ സ്നേഹം കൊതിച്ചെത്തുന്ന
മകളെയും, ഭാര്യ എന്ന വേഷം കെട്ടിയാടുന്ന സ്‌ത്രീകളെയും കാണാം നമുക്കുചുറ്റും ....

രചന : വിനു വിനീഷ്