കാത്തുനിൽപ്പ്

ആരേയാണ് കാത്തു നിൽക്കുന്നത്.. നല്ല ക്ഷീണമുണ്ട്, വിശപ്പുണ്ട്, ദാഹമുണ്ട്, ശരീരം മുഴുവൻ രക്തക്കറകൾ.. അഞ്ചു ദിവസമായി ഡ്യൂട്ടിയിലായിരുന്നു ഇപ്പോഴാണ് തിരിച്ചു വന്നത്.. വന്നപ്പോൾ തൊട്ട് ഇയാളാണ് എന്നേ നിയന്ത്രിക്കുന്നത്.. കൂടെ ഒരു വയസ്സായ മനുഷ്യനുമുണ്ട് ..അയാളും ആകെ ക്ഷീണിച്ച പോലെയാണ്... അയാൾക്കും കാണും വിശപ്പും ദാഹവും... ഗതികെട്ടപ്പോൾ ഞാൻ അയാളോട് പറഞ്ഞു എനിക്ക് വയ്യ ഇങ്ങനെ കാത്തു നിൽക്കാൻ..വിശക്കുന്നുണ്ട് ദാഹിക്കുന്നുണ്ട്.. മറുപടിയായി അയാൾ അയാളുടെ കൊമ്പൻ മീശ പിരിച്ചു, ആ തീക്ഷ്ണമായ കണ്ണുകൊണ്ട് എന്നേ ഒന്ന് നോക്കി.. ആ നോട്ടത്തിനു എന്റെ വിശപ്പിനെയും ദാഹത്തിനെയും ദഹിപ്പിക്കാനുള്ള ശക്തി ഉണ്ടായിരുന്നു..

കുറേ നേരത്തെ കാത്തിരിപ്പിന് ശേഷം ഒരു ചെറുപ്പക്കാരൻ വന്നു.. അയാൾ ഫോണിൽ ആരോടോ സംസാരിച്ചിട്ടാണ് വരുന്നത്..

"ഞാൻ ഇവിടെ നിന്നു പുറപ്പെട്ടു.. പറഞ്ഞ പോലെ അവിടെ എല്ലാം ശരിയാക്കിയിട്ടില്ലേ... എന്നേ വിളിക്കാൻ കുറച്ചു നേരമായി ആള് എത്തിയിട്ട്... ഞാൻ യാത്ര പറഞ്ഞിറങ്ങാൻ കുറച്ചു വൈകി.. നമുക്ക് വേണ്ടി കാത്തിരുന്നില്ലെങ്കിൽ പിന്നെ അവർ ആർക്ക് വേണ്ടിയാണ് കാത്തിരിക്കുക.. "

"ഒറ്റയ്ക്കല്ല... കൂടെ രണ്ടു പേരുണ്ട്... ഒരാൾ പട്ടാളക്കാരൻ ആണ് എന്ന് തോന്നുന്നു ശരീരത്തിൽ നിറയേ രക്തക്കറകൾ ഉണ്ട് ..കൂടാതെ യൂണിഫോമിലാണ്.. ഒരാൾ ഒരു മുഷിഞ്ഞ വസ്ത്രം ആണ് ധരിച്ചിരിക്കുന്നത് ..കണ്ടിട്ട് ഒരു കർഷകനാണെന്നു തോന്നുന്നു.. എന്നാൽ ശരി ബാക്കി വിശേഷം എല്ലാം അവിടെ എത്തിയിട്ട് പറയാം.. "അയാൾ ഫോൺ വച്ചു...

ഇയാൾക്ക് വേണ്ടിയാണോ നമ്മളീകാത്തു നിന്നത്... ഇയാൾക്ക് നേരേ എന്തുകൊണ്ടോ ഞങ്ങളെ കൊണ്ട് പോകാൻ വന്ന ആൾ മീശ പിരിച്ചില്ല, തുറിച്ചു നോക്കിയില്ല.. ഇയാൾ ആരാകും എനിക്ക് മനസ്സിലായില്ല... ഞാൻ കൂടെ ഉള്ള ചേട്ടനോട് കാര്യം തിരക്കി.. അപ്പോഴാണ് അറിഞ്ഞത് ഒരു പ്രമുഖ പാർട്ടിയിലെ അംഗമാണെന്ന്‌...

നടന്നു നടന്നു ഒടുവിൽ ഞങ്ങൾ ഒരു കവാടത്തിന്റെ മുന്നിലെത്തി.. അവിടെ കാവലായി കുന്തവും പേറി രണ്ടുപേരുണ്ട്.. അവിടെ എത്തിയതും രാഷ്ട്രീയ പ്രമുഖനെ ആനയിക്കാൻ ആളുകൾ വട്ടം കൂടിയിരുന്നു.. മേളവും ആഘോഷങ്ങളുമായി അയാളെ സ്വർഗ്ഗത്തിലേക്ക് ആനയിച്ചു.. ഞങ്ങളും ആ കൂട്ടത്തിൽ അകത്തേക്ക് കടക്കാൻ ശ്രേമിച്ചു എന്നാൽ കാവൽക്കാർ ഞങ്ങളെ തടഞ്ഞു.. കാര്യം തിരക്കിയപ്പോൾ പറഞ്ഞു അകത്തു കടക്കാൻ VIP പാസ്സ് ഉണ്ടെന്ന്.. അല്ലെങ്കിൽ റക്കമെൻഡേഷൻ വേണം എന്ന്, അതുമല്ലെങ്കിൽ ദൈവത്തിന്റെ കോട്ടയിൽ കയറാമെന്ന്.. സ്പോർട്സ് കോട്ടയിൽ സ്കൂളിലും കോളേജിലും കയറാം എന്നു കേട്ടിട്ടുണ്ട് ദൈവത്തിന്റെ കോട്ടയെന്താണ്... !!

കവൽക്കാരനോട് കാര്യം തിരക്കി... പറഞ്ഞുതരാൻ അയാൾക്ക് സമയമില്ലത്രേ.. കവാടത്തിനു മുന്നിൽ സ്ഥാപിച്ച കമ്പ്യൂട്ടർ ചൂണ്ടിക്കാണിച്ചു പറഞ്ഞു.....അത് വെറുതെ വച്ചിരിക്കുന്നതല്ല...

റെയിൽവേ സ്റ്റേഷനിൽ ഒക്കെ സ്ഥാപിച്ചിരിക്കുന്ന പോലെ ഉള്ള ചില കമ്പ്യൂട്ടറുകൾ അപ്പോഴാണ് എന്റെ ശ്രദ്ധയിൽ പെട്ടത്... അതിന്റെ ഇൻഫോർമേഷൻ മെന്യുവിൽ നിന്നും ആണ് അത് മനസിലായത്.. ദൈവത്തിന്റെ കോട്ട എന്നാൽ ദൈവത്തിനു വേണ്ടി വാള് എടുത്തവർക്കും, മരിച്ചവർക്കും, കൊന്നവർക്കും, ദൈവത്തിന്റെ പബ്ലിസിറ്റിക്കായി മുഖപുസ്തകത്തിലും വാട്സ് ആപ്പിലും പോസ്റ്റുകൾ ഷെയർ ചെയ്തവർക്കും വേണ്ടിയുള്ളതാണെന്ന്....തന്റെ മതം വലുതാണെന്ന് പറഞ്ഞവർക്ക് ആ മതത്തിന്റെ കോട്ടയിൽ സ്വർഗ്ഗത്തിൽ കയറാം, വീട്ടിലുള്ളവരെ മറന്നാലും പ്രാരാബ്ദ്ധങ്ങൾ മറന്നാലും പ്രശ്നമില്ല ദൈവത്തെ സ്തുതിച്ചവരെല്ലാം ആണത്രേ ഇതിൽ പെടുന്നത്...

ഓരോരുത്തർക്കും ഓരോ പ്രൊഫൈൽ ഉണ്ട്.. അതിൽ നമ്മളുടെ ഡീറ്റൈൽസും ഉണ്ട്.. എന്റെ സർച്ച് ചെയ്തപ്പോൾ ഞാൻ ആണേൽ ദൈവത്തിനെ പുകഴ്ത്തിയിട്ടില്ല, മതത്തിന്റെ പേരിൽ വഴക്ക് ഇട്ടിട്ടില്ല, ജീവൻ എടുത്തിട്ടില്ല ജീവൻ കൊടുത്തിട്ടില്ല.. എന്തിന് ഫേസ് ബുക്കിലോ വാട്സ് ആപ്പിലോ ഒരു പോസ്റ്റ് ഷെയർ ചെയ്തിട്ടു പോലും ഇല്ല... വല്ലപ്പോഴും അമ്മയുടെ കൂടെ അമ്പലത്തിൽ പോകും അതും പ്രാർത്ഥനയ്ക്ക് വെറും 15 സെക്കൻഡ് ദൈർഘ്യം മാത്രം.. കൂടെ ഉള്ള കർഷകന്റെ പ്രൊഫൈലും നോക്കി അയാളുടെയും എന്റേത്‌ പോലെ തന്നെയാണ്...

അയാൾ ആണെങ്കിൽ സ്വന്തം കുടുംബത്തിന് വേണ്ടി ജീവൻ കൊടുത്തതാണ്.. കൃഷിനാശം വന്നപ്പോൾ ധനസഹായതിനായി കയറാത്ത ഓഫീസുകൾ ഇല്ല ..പക്ഷേ എല്ലാ വാതിലുകളും അയാൾക്കുമുന്നിൽ കൊട്ടി അടക്കപ്പെട്ടു.. ഇനിയും വൈകിയാൽ വീട്ടിൽ എല്ലാവരും പട്ടിണി കിടന്ന് മരിക്കേണ്ടിവരും എന്ന അവസ്ഥ വന്നപ്പോൾ അയാൾ സ്വന്തം ജീവൻ ഒടുക്കി.. ജീവൻ പോയത് കണ്ടെങ്കിലും അധികാരികളുടെ കണ്ണ് തുറക്കുമെന്നും തന്റേതുപോലെയുള്ള പല കുടുംബങ്ങളും രക്ഷപ്പെടുമെന്നും അയാൾ കരുതി... ഞാൻ ആണേൽ രാജ്യത്തിനു വേണ്ടി ജീവനെടുത്തു... രാജ്യത്തിന് വേണ്ടിത്തന്നെ ജീവൻ കൊടുത്തു..

ശരിയാണ് ഞങ്ങൾ പാർട്ടിക്കും മതത്തിനും വേണ്ടി ഒന്നും ചെയ്തിട്ടില്ല.ഞങ്ങൾക്ക് നരകം മതി.. സ്വർഗ്ഗത്തിൽ പോയാലും മതത്തിനും പാർട്ടിക്കും വേണ്ടി ആയുധമെടുക്കാൻ താല്പര്യമില്ല..

Sajith_Vasudevan(ഉണ്ണി...)