പൊന്നു

പൊന്നു കോളിംഗ്..
എന്നു കാണിച്ച് റിംഗ് ചെയ്ത ഫോണ്‍ നോക്കി അവന്‍ പല്ലിറുമ്മി...

''ഒരു പൊന്നു.. , ശവം.. ആ പേര് കാണുമ്പോള്‍ കലി വരുന്നു..
നമ്പര്‍ ഡിലീറ്റ് ചെയ്യാന്‍ മറന്നു പോയി.''

അവന്‍ അരിശത്തോടെ കോള്‍ കട്ടു ചെയ്തു..

ഫേസ്ബുക്കിലൂടെ പരിചയപ്പെട്ടതായിരുന്നു അവളെ..
ഇങ്ങോട്ട് വന്ന റിക്വസ്റ്റ് ആയിരുന്നു..
മനോഹരമായ കണ്ണുകള്‍ മാത്രമായിരുന്നു പ്രൊഫെെല്‍ ഫോട്ടോ..
നല്ല ആകര്‍ഷണമുള്ള കണ്ണുകള്‍..
ഒരു സുന്ദരിക്കുട്ടി തന്നെയായിരിക്കും എന്നു കരുതി ആക്സപറ്റ് ചെയതു..
അല്പസമയത്തിനകം മെസ്സേജ് വന്നു..

''ആക്സപറ്റ് ചെയ്തതിനു നന്ദി..''

ഒരു സ്മെെലി റിപ്ളെെ ചെയ്തു..

ഉടന്‍ അടുത്ത മെസ്സേജ് വന്നു..

''ഇയാളുടെ കഥകളൊക്കെ വായിക്കാറുണ്ട്.. എല്ലാം നന്നാകുന്നുണ്ട്.. എനിക്ക് ഒത്തിരി ഇഷ്ടമാണ്''..

''സന്തോഷം ''
അവന്‍ റിപ്ളെെ കൊടുത്തു..

പിന്നീടങ്ങോട്ട് ചാറ്റിംഗിന്‍റെ മലവെള്ള പ്പാച്ചിലായിരുന്നു..

''എന്തു ചെയ്യുന്നു.. പഠിക്കുകയാണോ?''

അവളെപ്പറ്റി കൂടുതല്‍ അറിയാന്‍ വേണ്ടി അവന്‍ ചോദിച്ചു..

''പഠിത്തമൊക്കെ കഴിഞ്ഞു.. ഇപ്പോള്‍ വീട്ടില്‍ വെറുതേയിരിക്കുന്നു''..

''കല്യാണം?''

''ഇതുവരെ ആയില്ല..''

അവന്‍റെ മനസ്സില്‍ ഒരു കുളിര്‍കാറ്റു വീശി..

''ഇയാളെപ്പറ്റി എല്ലാം എനിക്കറിയാം.. പ്രൊഫെെല്‍ ഇടക്കിടെ എടുത്ത് നോക്കാറുണ്ട്''..

ദിവസേനയുള്ള ചാറ്റിംഗിലൂടെ അവര്‍ കൂടുതല്‍ അടുത്തു..

അവന്‍റെ മനസ്സില്‍ പ്രണയം മൊട്ടിട്ടു തുടങ്ങി.. പക്ഷേ പറയാന്‍ ഒരു മടി.. കണ്ണുകള്‍ മാത്രമേ ഇതുവരെ കണ്ടിട്ടുള്ളു..

''ഒരു ഫോട്ടോ അയച്ചു തരാന്‍ പറയാം..''
അവന്‍ വിചാരിച്ചു.

അവള്‍ ചുണ്ടുകളുടെ ഫോട്ടോ അയച്ചു കൊടുത്തു..
തേനൂറുന്ന ചുവന്ന ചുണ്ടുകള്‍..

''ഇത്രയും മനോഹരമായ കണ്ണുകളും ചുണ്ടുകളുമുള്ളവള്‍ സുന്ദരി തന്നെയായിരിക്കും.. ഇനിയും വെെകിക്കൂട..''

അവന്‍ തീര്‍ച്ചയാക്കി..

പിറ്റേന്നു തന്നെ അവന്‍ തന്‍റെ പ്രണയം അവളെ അറിയിച്ചു..

കുറച്ച് സമയത്തേക്ക് അവളുടെ പ്രതികരണമൊന്നും ഉണ്ടായില്ല..

''പറഞ്ഞത് അബദ്ധമായോ''?

അവന്‍ വെപ്രാളപ്പെട്ടു..

പെട്ടെന്ന് അവളുടെ മെസ്സേജ് വന്നു..

''എനിക്കും ഒരുപാട് ഇഷ്ടമാണ്... എങ്ങനെ പറയുമെന്ന് വിചാരിച്ചിരിക്കുകയായിരുന്നു..''

അവന്‍ കോരിത്തരിച്ചുപോയി..

അങ്ങനെ പൂത്തുവിടര്‍ന്ന അവരുടെ പ്രണയം പരിമളം പടര്‍ത്തിക്കൊണ്ട് മുന്നോട്ടു പോകാന്‍ തുടങ്ങി.. ഫോണ്‍ നമ്പര്‍ ഒക്കെ കെെമാറി.. ഫോണിലൂടെ അവളുടെ ശബ്ദം കേട്ടപ്പോള്‍ അവനു തോന്നി ..

''ഈ ലോകത്ത് ഏറ്റവും ഭാഗ്യവാന്‍ താന്‍ തന്നെ''..

''ഇനി മുതല്‍ എന്നെ പൊന്നു എന്നു വിളിച്ചാല്‍ മതി''..

ഒരു ദിവസം അവള്‍ പറഞ്ഞു..

അന്നു മുതല്‍ അവള്‍ അവന്‍റെ പൊന്നുവായി..
പിന്നീടുള്ള അവന്‍റെ എഴുത്തുകളൊക്കെ പൊന്നുവിനെ കുറിച്ചായിരുന്നു... പ്രണയത്തെ അവന്‍ വാഴ്ത്തിപ്പാടി..

''നമുക്ക് ഒന്നു കാണണ്ടേ''..

ഒരു ദിവസം അവന്‍ ചോദിച്ചു..

''കാണാം.. എപ്പോഴാണെന്ന് പറഞ്ഞോളൂ''..

അവനു സന്തോഷം കൊണ്ടു തുള്ളിച്ചാടാന്‍ തോന്നി..

അവര്‍ രണ്ടുപേരും കാണാന്‍ തീരുമാനിച്ചു.. മുന്‍കൂട്ടി നിശ്ചയിച്ച പ്രകാരം അവന്‍ പാര്‍ക്കില്‍ അവളെ കാത്തിരുന്നു. പറഞ്ഞ സമയം കഴിഞ്ഞിട്ടും അവളെ കാണാതായപ്പോള്‍ അവന്‍ ഫോണ്‍ എടുത്ത് വിളിച്ചു..

''പൊന്നൂ.. നീ എവിടെയാ..എത്തിയില്ലേ ഇതുവരെ''..

''ഞാനിവിടെ വാകമരച്ചുവട്ടിലുണ്ട്..''

''ശരി.. നീ ഫോണ്‍ കട്ടു ചെയ്യണ്ട.. സംസാരിച്ചോണ്ട് വരാം.. അപ്പോ നിന്നെ പെട്ടെന്ന് തിരിച്ചറിയാമല്ലോ..''

''ശരി''

അവന്‍ ഫോണില്‍ സംസാരിച്ചുകൊണ്ട് വാകമരത്തിനടുത്തെത്തി.. അവിടെ ചുവന്ന ചുരിദാര്‍ ധരിച്ച ഒരു തടിച്ച സ്ത്രീ മൊബെെലും ചെവിയില്‍ വെച്ചു കൊണ്ട് പുറം തിരിഞ്ഞു നില്‍പ്പുണ്ടായിരുന്നു.. നാല്‍പ്പതിനുമേല്‍ പ്രായം തോന്നും..

''ഈശ്വരാ.. പണി കിട്ടിയോ.. ഇതാണോ പൊന്നു.. ഇതിനെയാണോ താന്‍ ഇത്രനാളും പൊന്നു പോലെ സ്നേഹിച്ചത്..''

അവന്‍ ഒന്നു കൂടെ ഉറപ്പു വരുത്താന്‍ വേണ്ടി ചോദിച്ചു..

''എന്തു കളര്‍ ഡ്രസ്സാ ഇട്ടിരിക്കുന്നത്''?

''ഇയാളുടെ ഇഷ്ട നിറം തന്നെ.. ചുവന്ന ചുരിദാര്‍''..

അവന്‍ ഇടിവെട്ടേറ്റതു പോലെ ഒരുനിമിഷം നിന്നു പോയി.. പിന്നെ സമനില വീണ്ടെടുത്ത് വേഗം ഫോണ്‍ കട്ട് ചെയ്ത് തിരിഞ്ഞു നടന്നു ..

പിന്നെയും പിന്നെയും അവന്‍റെ ഫോണിലേക്ക് പൊന്നുവിന്‍റെ കോള്‍ വന്നു കൊണ്ടേയിരുന്നു.. അവന്‍ ഫോണെടുത്ത് ആ നമ്പര്‍ ബ്ളോക്ക് ചെയ്തു.. ഫേസ്ബുക്കില്‍ നിന്നും അവളെ ബ്ളോക്ക് ചെയ്തൂ തടി രക്ഷപ്പെടുത്തി..

അജിന സന്തോഷ്