......കോഴിയന്നങ്ങൾ....

ഉത്സവ പറമ്പിൽ തിരക്കേറേയായിരുന്നു.... വർണ്ണങ്ങളിൽ, ബഹളങ്ങളിൽ കണ്ണു മഞ്ഞളിച്ചു നടന്നു ...
വടക്കേ തെരുവിലാണ് കോഴി അന്നങ്ങൾ കെട്ടിപൊക്കുന്നത്. അവിടെ അന്നങ്ങൾ കെട്ടി വയ്ക്കുന്ന പുരയുടെ മുമ്പിൽ കുറച്ചു പേർ..
റോഡരുകിൽ ഭീമന്റെ വലിയ രൂപം..
കൊമ്പൻ മീശ... ഊശാൻ താടി.. ചുവന്ന കണ്ണുകൾ...
ഗദയുയർത്തി നിൽക്കുന്ന ഭീമൻ....
ചില അമ്മമാർ ഭീമനെ കാട്ടി കുട്ടികളെ പേടിപ്പിക്കുന്നുമുണ്ട്...
വിസ്മയത്തോടെ, ഭയത്തോടെ നോക്കുന്ന കുരുന്നു കണ്ണുകൾ...
പുന്നച്ചുവടിനു താഴെ കഷ്ടിച്ചു ഏഴോ എട്ടോ വയസ്സുള്ള ഒരാൺകുട്ടി...
കെട്ടിപൊക്കിയ ഭീമനെ നോക്കി നിൽക്കുന്നു... ഇടയ്ക്ക് തല താഴ്ത്തുന്നു..
ആ കണ്ണുകളിൽ കൗതുകമല്ല.. പേടിയാണ്..
എന്തേ.?.. മോനെന്താ ഇവിടെ നിൽക്കുന്നത്?
എന്നെയവൻ ദയനീയമായി നോക്കി.
ഭീമനും... അച്ഛനും ഇഷ്ടാണ്.. .....
ചിരിച്ചു കൊണ്ടു ഞാൻ ചോദിച്ചു..
മോന്റെ അച്ഛന്റെ പേരെന്താണ്? അച്ഛൻ എവിടെ?
അതിനവൻ മറുപടി പറഞ്ഞില്ല. എന്നെ ഒന്നു നോക്കി.. പിന്നെ മരക്കൊമ്പുകൾക്കിടയിലൂടെ അവൻ ആകാശത്തേക്ക് വിരൽ ചൂണ്ടി..
നരച്ച ആകാശത്തിൽ ചിതറി കിടന്ന മേഘങ്ങളിലേക്ക് ഞാനും നോക്കി.
നിരത്തിലെ വർണ്ണങ്ങളിൽ നിന്ന് ഒരു തുമ്പി പഴമയുടെ കഥയുമായി പാറി വന്നു...
ശരിയാണ്... ഭീമനും ആ അച്ഛനും ഇഷ്ടാണ്...

...പ്രേം..