നല്ലെഴുത്ത്

The biggest ever archive in Malayalam Literature. 2.5 crores pageviews, 14000+ creations, 2000+authors and adding on....

New Books

Post Top Ad

Your Ad Spot

ഫർണിച്ചർ

Image may contain: 1 person, beard


AjoyKumar
പഴയ വീട്ടിൽ നിന്നും പുതിയ ഫ്ലാറ്റിലേക്ക് മാറി വന്നത് രണ്ടു കാരണങ്ങൾ കൊണ്ടാണ്.
ഒന്ന് ,ശ്യാമയുടെ ബന്ധുക്കൾ ആയിരുന്ന ഇരയിമ്മൻ തമ്പിയും വേലുത്തമ്പി ദളവയും ഒക്കെ വാങ്ങി ഇട്ട നൂറ്റാണ്ടുകൾ പഴക്കമുള്ള ,ആരെങ്കിലും ഇരുന്നാൽ പൊടിഞ്ഞു പോകുന്ന ,ഫർണിച്ചർ ഒഴിവാക്കുക
രണ്ട് അന്നദാതാക്കളായ ഞങ്ങൾക്കിട്ടു പണിയാൻ വേണ്ടി മിക്സിയിലും ഓവനിലും കേറി ഗൂഢാലോചന നടത്തുന്ന പാറ്റാദി കേശൻ എന്ന പാറ്റയെയും സംഘത്തെയും , മച്ചിലിരുന്ന് ,ആഹാരം വിളമ്പിയ പാത്രം തന്നെ ലക്‌ഷ്യം പിടിച്ച് രണ്ടിന് പോകുന്ന ജീമൂതവാഹനൻ എന്ന പല്ലിയുടെ സംഘത്തെയും ഇരുട്ടായാലുടനെ ജെ സീ ബിയും കൊണ്ട് വന്നു പുറകു വശത്തെ മണ്ണ് മുഴുവൻ മാന്തി പാതാളക്കുഴിയാക്കുന്ന മണ്ണുമാന്തി എലികേശി പെരുമാൾ എന്ന പെരുച്ചാഴിയെയും ടീമിനെയും ഒക്കെ ഭയന്ന്
ഇവിടെ വന്ന ശേഷം ആദ്യ ദിവസങ്ങളിൽ സംഗതി ഭദ്രമായിരുന്നു. ഭൂമിയുടെ അവകാശികൾ ആരും ഞങ്ങൾ ഇവിടെ താമസം തുടങ്ങിയതറിഞ്ഞില്ല. മാത്രമല്ല പാലുകാച്ചിന് ഞങ്ങൾ ആരെയും ക്ഷണിച്ചിരുന്നുമില്ലല്ലോ പക്ഷെ ഏകദേശം ഒരാഴ്ച കഴിഞ്ഞപ്പോൾ ഞങ്ങൾ വന്ന സംഗതി എങ്ങനെയോ മണത്തറിഞ്ഞ കുറെ കറുപ്പും ചുവപ്പും നിറമുള്ള കുഞ്ഞുറുമ്പുകൾ ഏതോ ഒരു ചെടിച്ചട്ടിയിൽ കയറി രംഗത്ത് വരുകയും .വന്ന പാടെ സിങ്ക് ,സ്റ്റോർ, എന്നിടങ്ങളിൽ ക്യാംപ് സംഘടിപ്പിച്ച് സംഘടിതമായി ആക്രമണം തുടങ്ങുകയും ചെയ്തു.
അധികം വൈകാതെ ഒരു ചെറുപ്പക്കാരൻ പല്ലി ഏതോ ഫർണിച്ചർ പാക്കിങ്ങിൽ കയറി സ്ഥലത്തെത്തി. ഒട്ടും അമാന്തിക്കാതെ മുകളിലെ മഞ്ജു ചേച്ചിയുടെ ഫ്ലാറ്റിൽ പോയി അതെ ഇനത്തിൽ പെട്ട വേറെ ഒരു പല്ലിയെ വേളി കഴിച്ചു കൊണ്ട് വന്നു താമസവും തുടങ്ങി.ഈ ആഴ്ച മുട്ടയിടും എന്നാണ് കേട്ടത്.ശുഭ പ്രസവം ആയാൽ മതിയായിരുന്നു.
ദൈവം സഹായിച്ച് പാറ്റകളെ മാത്രം ഫ്ലാറ്റിൽ ഇത് വരെ കണ്ടില്ല.പക്ഷെ ഏതു സമയം വേണോ അവറ്റകളും വന്നേക്കും.കാരണം പതിനെട്ടാം നിലയിലെ ബിജോയിയുടെയും നിത്യയുടേയും പെന്റ് ഹൗസിൽ ഒന്നോ രണ്ടോ മീശക്കൊമ്പൻ പാറ്റകളെ കണ്ടവരുണ്ട്.യൂണിയൻ ഉണ്ടാക്കാൻ ആളെ നോക്കി നടപ്പാണത്രെ.
ഇങ്ങനെയൊക്കെ ഇരിക്കെയാണ് ഇന്നലെ കാലത്തേ ഒരു ചക്കക്കുരു എന്റെ കട്ടിലിൽ കിടക്കുന്നതു ഞാൻ കണ്ടത്.ശ്യാമക്ക് ഏറ്റവും ഇഷ്ട്ടം ചക്കപ്പുഴുക്കാണ്. എനിക്കത്ര പഥ്യമില്ല, ആവശ്യമുള്ളവർ കഴിച്ചോട്ടെ. പക്ഷെ കഴിച്ച ശേഷം കുരു ഇങ്ങനെ ഉപേക്ഷിക്കുക എന്ന് പറഞ്ഞാൽ? അതും കട്ടിലിൽ,എനിക്ക് ദേഷ്യം വന്നു.സാധാരണ എന്റെ കുറ്റം കണ്ടു പിടിക്കലാണ് ശ്യാമയുടെ പ്രധാന ജോലി.ഇത്തവണ തിരിച്ചാവട്ടെ
ഞാൻ അലറി,എന്താണിത് ശ്യാമേ ,ഇത്ര വൃത്തിയില്ലാതെ?
എന്താ? ശ്യാമ മൂക്കിന്റെ അറ്റത്തു കണ്ണാടിയും വെച്ച് വന്നു.
നോക്ക്, ഉപേക്ഷിക്കപ്പെട്ട ഒരു ചക്കക്കുരു,കിടപ്പു മുറിയിൽ
ചക്കക്കുരുവോ? അതിനിവിടെ ചക്ക വാങ്ങിച്ചതെ ഇല്ലല്ലോ ? ശ്യാമ സൂക്ഷിച്ചു നോക്കി
നേരെ നോക്കിക്കൂടെ ,കണ്ണാടീം വെക്കൂല, കണ്ണും കണ്ടൂട. അത് കൊതുകാണ് , കൊതുക്, ചക്കക്കുരു പോലും
ദൈവമേ,,,ശരിയാണല്ലോ, ഞാൻ ഞെട്ടി, ചക്കക്കുരു വലുപ്പത്തിൽ ഒരു കൊതുക് എന്നെ തുറിച്ചു നോക്കി ദേഷ്യത്തിൽ ഇരിക്കുന്നു. ഇത്രേം ഫേമസ് ആയ എന്നെ കണ്ടിട്ട് മനസിലായില്ലേടാ ജാഡ തെണ്ടീ എന്ന ഭാവം
ഇതെവിടെ നിന്ന് വന്നു,ജനിതകമാറ്റം സംഭവിച്ച ഓരോ മാരണങ്ങൾ, ഞാൻ ആലോചിച്ചു
അപ്പോഴാണ് ശ്യാമ പറഞ്ഞത്, ഇത്രയും ഉയരത്തിൽ പറക്കാൻ പറ്റാത്തത് കാരണം ഇവിടേയ്ക്ക് വരുന്ന വിരുന്നുകാർ അറിയാതെ അവരുടെ തോളിലിരുന്നു ചെവി കടിച്ചു കൊണ്ട് ലിഫ്റ്റിൽ കേറിയാണ് ഇവറ്റകൾ വരുന്നത് പോലും.ഏതു ഫ്ലാറ്റിൽ പോയി ഈ കുന്തങ്ങൾ ഇറങ്ങും എന്നുള്ളത് അവിടത്തെ താമസക്കാരുടെ ഭാഗ്യം പോലെ ഇരിക്കും
അതിനെ അടിക്കാൻ ഞാൻ ഒരു പേപ്പർ ചുരുട്ടി എടുത്തതെ ഉള്ളു,നിന്നെ പിന്നെ കണ്ടോളാം എന്ന് പറഞ്ഞു ഹെലിക്കോപ്റ്റർ ഒക്കെ ടേക്ക് ഓഫ് ചെയ്യുന്ന ശബ്ദത്തിൽ അത് എണീറ്റ് പറന്നു പോയി.
രാത്രി ഞാൻ ഉറങ്ങാൻ കിടന്നപ്പോൾ ശ്യാമയോട് പറഞ്ഞു ഗുഡ് നൈറ്റ് വെക്കണേ ശ്യാമേ, ചക്കക്കുരു ഇവിടെ എവിടെയോ ഉണ്ട്, ശെരി എന്ന് ശ്യാമയും പറഞ്ഞു, ഒരു ഉറക്കം കഴിഞ്ഞു എന്തോ വേദന തോന്നി ഞാനെണീറ്റു
നോക്കുമ്പോൾ കാണാം ചക്കക്കുരുവും വേറെയൊരു കൊതുകും കൂടി എന്റെ കാലിൽ ഇരുന്ന് പട്ടി കടിക്കുന്നത് പോലെ കടിക്കുന്നു.പിന്നെ ഒരു ഡ്രില്ലർ വെച്ച് തുളക്കുന്നു.അട്ടഹസിക്കുന്നു
ഞാൻ ചോദിച്ചു,മിസ്റ്റർ ചക്കക്കുരു ,എന്ത് കടിയാ ഈ കടിക്കണേ. ഇങ്ങനെ ഒക്കെ ചെയ്യാമോ? നമ്മളൊക്കെ നാളെയും കാണേണ്ടവരല്ലേ? ഗുഡ് നൈറ്റ് ഒന്നും ഇപ്പോൾ പ്രശ്നമില്ലേ ?
അതിനെവിടെ ഗുഡ് നൈറ്റ് ?
ലോണ്ടെ, ഞാൻ ചൂണ്ടിക്കാണിച്ചു ,അവിടെ ഗുഡ് നൈറ്റ് ഉണ്ട് ഓൺ അല്ല എന്ന് മാത്രം
കൊതുക് പോയിട്ട് പാമ്പ് കടിച്ചാലും ആന ചവിട്ടിയാലും അറിയാത്ത പോലെ ഉറങ്ങുന്ന ശ്യാമയെ ഞാൻ ചവിട്ടിയും മുടിയിൽ പിടിച്ചു വലിച്ചും കടിച്ചും മാന്തിയും നുള്ളിയും ഒക്കെ ഉണർത്തി എന്നിട്ടു ചോദിച്ചു,
നീ ഗുഡ് നൈറ്റ് വെച്ചില്ല അല്ലെ
വെച്ചല്ലോ?
ഓൺ അല്ലല്ലോ
വെക്കാനല്ലേ പറഞ്ഞുള്ളു ഓൺ ചെയ്യാൻ പറഞ്ഞോ ?
പരിഹസിച്ചു ചിരിക്കുന്ന ചക്കക്കുരുവിന്റെയും കൂട്ടുകാരന്റെയും മുന്നിൽ ന്യായമായും എനിക്ക് ഒന്നും പറയാനും ചെയ്യാനും ഇല്ലാത്തതു കൊണ്ട് തന്നെ അവറ്റകൾക്കു കടിച്ചു കീറി പരിശോധിക്കാൻ എന്റെ ശരീരം വിട്ടു കൊടുത്തതായുള്ള രേഖയിൽ ഒപ്പിട്ട ശേഷം ബോധം കെട്ടു എന്ന വ്യാജേന ഞാൻ പോത്തു പോലെ കിടന്നുറങ്ങി

1 comment:


  1. കൊള്ളാം. അക്ഷരാർത്ഥത്തിൽ നല്ലെഴുത്ത് തന്നെ.. ​ഗ്രേറ്റ് ബ്രോ..

    ReplyDelete

ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക

Post Top Ad

Your Ad Spot