പാറ്റ

AjoyKumar

ഞങ്ങളുടെ കിച്ചൻ കാബിനറ്റിൽ താമസിക്കുന്ന പാറ്റ മിസ്റ്റർ പാറ്റാദി കേശൻ,പുറകിലെ മുറ്റത്ത്‌ താമസിച്ചിരുന്ന പെരുച്ചാഴി മണ്ണുമാന്തി എലികേശി പെരുമാൾ ,തവളയായ സുന്ദര തവളേഷ് എന്നിവരെ കഥാപാത്രങ്ങൾ ആക്കി ഞാൻ കുറച്ചു കഥകൾ എഴുതിയിട്ടുണ്ട്,അതിൽ , മൂന്ന് പോസ്റ്റുകൾ ഇതിലുണ്ട്.നീളം കൂടുതലാണെങ്കിലും വായിക്കാതെ പോകരുത്.ഇഷ്ടപ്പെടും

പാറ്റാദിയെ ആദ്യം കണ്ട ദിവസം
******************************************************

ഇപ്പൊ കാലത്തേ ,ചായ കുടിച്ച കപ്പ് അടുക്കളയിൽ വെക്കാൻ നോക്കിയപ്പോൾ രണ്ടു പാറ്റകൾ സിങ്കിൽ കിടക്കുന്നു,പാവം അല്ലെ എന്ന് വിചാരിച്ച് ഞാൻ പഴയ ന്യൂസ്‌ പേപ്പറും,ഉപയോഗിക്കാത്ത ഒരു തവിയുടെ പിടിയും എല്ലാം ഉപയോഗിച്ച് രണ്ടിനെയും കയറ്റി വിടാൻ ആവുന്നത്ര ശ്രമിച്ചു,ങേ ഹേ,രണ്ടെണ്ണവും കൂടെ പിടി തരാതെ അതെല്ലാം തട്ടി മാറ്റി മരണക്കിണറിൽ ബൈക്ക് ഓടുന്നത് പോലെ കിടന്നു കറങ്ങുന്നു,

ഒടുവിൽ ഞാൻ തളർന്ന് ശ്രമം ഉപേക്ഷിച്ചു ,അവിടെ കിടന്നു ചാവ് നാശങ്ങളെ എന്നും പറഞ്ഞു പോകാൻ നേരം ഒരു പാറ്റ മറ്റേ പാറ്റയോടു പറയുന്നു,

നീ വിഷമിക്കണ്ടെടീ, നമുക്ക് രക്ഷപ്പെടാൻ ദൈവം ഒരു വഴി കാണിച്ചു തരാതിരിക്കില്ല എന്ന്,അപ്പൊ ഇതൊന്നും ആ വഴി ആണെന്ന് ആ മന്ദബുദ്ധി പാറ്റകൾക്ക് മനസിലായിട്ടില്ല എന്ന് സാരം

അപ്പൊ ഞാൻ ആലോചിച്ചു,ഇത് തന്നെ ആണ് എല്ലാവരുടെയും ജീവിതത്തിലും സംഭവിക്കുന്നത്‌,എല്ലാവർക്കും ജീവിതത്തിൽ ഉയരാൻ, രക്ഷപ്പെടാൻ ദൈവം,ഒന്നോ രണ്ടോ തവണ അവസരം തരും,അത് തിരിച്ചറിയുന്നവർ ബുദ്ധിമാന്മാർ,അതും തട്ടി മാറ്റി,ഇത് പോലെ കിടന്നു ഓടിയിട്ട്,ദൈവം വരും, ദൈവം തരും,എന്നും പറഞ്ഞു മേപ്പോട്ടും നോക്കി ഇരിക്കുന്നവർ,ഈ മന്ദബുദ്ധി പാറ്റകളെ പോലെ തന്നെ,അവിടെ കിടന്നു ചാവും....

പാറ്റാദിയെ പരിചയപ്പെടുന്നു
********************************************

ഇന്ന് കാലത്ത് ചായ എടുക്കാൻ അടുക്കളയിൽ കയറിയപ്പോൾ ഞാൻ അറിയാതെ സിങ്കിലെക്കു ഒന്ന് പാളി നോക്കി,ഇന്നലത്തെ പോലെ പാറ്റകൾ ഉണ്ടോ എന്ന്,നിരാശ ആയിരുന്നു ഫലം,സിങ്ക് ശൂന്യം .പാത്രവും കഴുകി ഞാൻ തിരിഞ്ഞപ്പോൾ ആരോ വിളിക്കുന്നു,

ഹെലോ , മിഷ്ടർ അജോയ് കുമാർ,

ഇതാരപ്പാ, അടുക്കളക്കകത്ത് എന്നെ പേര് പറഞ്ഞു വിളിക്കാൻ ?

അപ്പോഴാണ് കണ്ടത് പകുതി തുറന്ന ഒരു കിച്ചൻ കാബിനറ്റിനകത്ത് നിന്ന് എന്നെ കൈ കാണിച്ചു വിളിക്കുന്നു ഒരു പാറ്റ, ഞാൻ പറഞ്ഞു ഹലോ,

എന്നെ മനസിലായോ,പാറ്റ ചോദിച്ചു,

ഇല്ല,

അത് കൊള്ളാം ,ഞാൻ അല്ലെ ഇന്നലെ സിങ്കിൽ കിടന്നു മരണ ഓട്ടം ഓടിയ പാറ്റ,

ഓ, ഓക്കേ, ഒക്കെ അപ്പൊ കൂടെ ഉണ്ടായിരുന്നത്? ഞാൻ ചോദിച്ചു,

അത് ഭാര്യ ...

ഞാൻ കൊക്രോച്ച ഭാഷാ സംഹിത പഠിച്ചിട്ടുണ്ട് എന്ന് മനസിലായി പോലും,അതിന്റെ കോപ്പി കുറെ എടുത്ത് പാറ്റകളെ നിഷ്ക്കരുണം തല്ലിക്കൊല്ലുന്ന സുഹൃത്തുക്കൾക്കും ബന്ധുക്കൾക്കും കൊടുക്കാമോ എന്നാണ് ചോദ്യം,ഞാൻ പറഞ്ഞു ആ കോപ്പി നശിച്ചു പോയി, ഞാൻ വേണമെങ്കിൽ അറിയാവുന്ന കാര്യങ്ങൾ പറഞ്ഞു കൊടുക്കാം എന്ന്,ശെരി,പാറ്റക്ക് സന്തോഷമായി ,

പിന്നെ പാറ്റ സ്വയം പരിചയപ്പെടുത്തി,പേര് പാറ്റാദികേശൻ , ഭാര്യയുടെ പേര് പറ്റീഷ്യ ,മക്കൾ രണ്ടു പേർ, പാറ്റെഷ്, പാറ്റാനന്ദ്, രണ്ടു പേരും നല്ല നിലയിലായി , ഒരാൾ അടുക്കളയിലും, മറ്റേ ആൾ സ്റ്റോർ മുറിയിലും പെണ്ണും കെട്ടി സെറ്റിൽ ആയിക്കഴിഞ്ഞു, അച്ഛനും അമ്മയും ഇനി ജോലിക്കൊന്നും പോണ്ട എന്നാണു പിള്ളേർ പറയുന്നത്, മനുഷ്യരെ പോലെ അല്ല, വയസായാൽ മക്കൾ മാതാപിതാക്കളെ,പണ്ട് അവരെ നോക്കിയത് പോലെ കൊഞ്ചിച്ചാണ് നോക്കുന്നതത്രേ,അത് പറഞ്ഞിട്ട് പാറ്റാദികെശൻ എന്നെ പുച്ഛത്തിൽ ഒന്ന് നോക്കി.

ഞാൻ പറഞ്ഞു, പോട്ടെ,പിന്നെക്കാണാം,എനിക്ക് ചായ കുടിക്കണം, ,നടക്കാൻ പോണം,

അപ്പോൾ പാറ്റാദി പറഞ്ഞു,അതേയ്,പോകാൻ വരട്ടെ ,നിങ്ങൾ ഇപ്പൊ വന്ന് സിങ്കിൽ എത്തി നോക്കിയത് എന്തിനാണ്? അത് പറഞ്ഞിട്ട് പോയാൽ മതി

ഞാൻ പറഞ്ഞു ചുമ്മാ ഒരു തമാശക്ക്,,

അപ്പൊ പാറ്റാദിക്ക് ദേഷ്യം വന്നു... പോവുവേ അവിടുന്ന് ,കള്ളം പറയാതെ ,

പാറ്റാദീ...ഞാൻ വിളിച്ചു,

പാറ്റാദി അല്ല കൂറ്റാദി...താൻ നോക്കിയത് ഞാനോ വേറെ ഏതെങ്കിലും പാറ്റകളോ ഇവിടെ കിടന്നു കയ്യും കാലും ഇട്ടു അടിക്കുന്നുണ്ടോ എന്നാണ്, എന്നിട്ട് തനിക്കു അതിനെ രക്ഷപ്പെടുത്തണം, എന്നിട്ട് ഓടിപോയി പോസ്റ്റ്‌ എഴുതണം,വലിയ കരുണ ഉള്ളവൻ ആണെന്ന്,

ഹേ അങ്ങനെ അല്ല,പാറ്റാദി എന്നെ വല്ലാതെ തെറ്റിദ്ധരിച്ചു,ഞാൻ ചില നല്ല കാര്യങ്ങൾ പകർന്നു കൊടുക്കാൻ,....എനിക്ക് വാക്കുകൾ നഷ്ട്ടപ്പെട്ടു.

കൊടുത്തോ, അത് ആരാന്റെ ജീവനിൽ കളിച്ചു കൊണ്ടാവരുത്,ഇന്ന് വരുമ്പോൾ ഒരു പാറ്റ ഇതിനകത്ത് കാണണേ എന്ന് താൻ പ്രാർധിചില്ലെ കൂവേ? എന്നാലല്ലേ തനിക്കു എഴുതാൻ പറ്റു കാലത്തേ ചായ ഇട്ടു, പാറ്റയെ രക്ഷിച്ചു, മന്ദബുദ്ധി പാറ്റ,അതാണ് എനിക്ക് സഹിക്കാൻ പറ്റാത്തത്, മന്ദബുദ്ധി പോലും ..

ദൈവമേ ഇതെല്ലം പാറ്റാദി എങ്ങനെ അറിഞ്ഞു,

എടൊ എനിക്കും ഉണ്ടെടോ എഫ് ബീ അക്കൌണ്ട് ,എല്ലാ കൂട്ടുകാരും കൂടി എന്നെ കളിയാക്കി കൊന്നു ,അറിയാമോ. മന്ദബുദ്ധി പാറ്റകൾ മരണക്കിണറിലെ ബൈക്ക് പോലെ ഓടി പോലും. എപ്പോഴാടെ ഞാൻ അങ്ങനെ ഓടിയത്? പാറ്റാദി കയ്യും ചുരുട്ടി മുന്നോട്ടു വന്നു,

അപ്പോൾ വേറെ ഒരു പാറ്റ എവിടെ നിന്നോ ചാടി വീണു,സാറെ എന്റെ പേര് പാറ്റെഷ്, ഇദ്ദേഹത്തിന്റെ മൂത്ത മോൻ ആണ്, സാർ വേഗം പൊക്കൊ,ഇവിടെ ഇരുന്ന ഗ്ലാസിൽ നിന്നും ബാക്കി ഇരുന്ന രണ്ടു തുള്ളി വോഡ്ക കുടിച്ച് അച്ഛൻ കാലത്തേ ഫിറ്റ്‌ ആണ്, ഇനി വയലന്റ് ആവും, വേഗം പൊക്കൊ,

ഞാൻ ചായ വേണ്ടാന്ന് വെച്ച് ഇറങ്ങി ഒറ്റ ഓട്ടം,ഇനി പാറ്റയുടെ കയ്യിൽ നിന്ന് ചവിട്ടു കിട്ടിയ ആദ്യത്തെ ആൾ എന്ന പേരുദോഷം വേണ്ട....ഹോ പോസ്റ്റ്‌ എഴുതുമ്പോൾ വരുന്ന ഓരോ പ്രശ്നങ്ങളേ

പാറ്റാദിയും എലികേശി മണ്ണുമാന്തി പെരുമാൾ മൂന്നാമനും
****************************************************************************************

മെനിഞ്ഞാന്നു രാത്രി ഏതോ ചാനൽ ഡിബേറ്റ് കണ്ടു കൊണ്ടിരുന്നു നേരം പോയതറിഞ്ഞില്ല,സമയം പതിനൊന്നായപ്പോൾ എനിക്ക് ഉറക്കം വന്നു,ഞാൻ ടീ വി ഓഫ് ചെയ്യാൻ വേണ്ടി എണീറ്റ്‌ പോയപ്പോൾ ഒരു ചെറിയ ശബ്ദം,

ഹെലോ സാറെ ,എന്താണ് ഉറക്കം ഒന്നുമില്ലേ?

ഞാൻ ചുറ്റും നോക്കി,ജനലിൽ നോക്കി,ആരുമില്ല,

ഹെലോ ..ഇവിടെ... ഇവിടെ... എന്ന് ശബ്ദം താഴെ നിന്നും,അപ്പോൾ കണ്ടു അടച്ചിട്ട കതകിനു അടിയിൽ കൂടി തലയും രണ്ടു കൊമ്പും മാത്രം അകത്തിട്ടു ഒളിഞ്ഞു നോക്കുന്നു,ആര് ? നമ്മുടെ പാറ്റാദി,

ഹാ ഇതാര്? ഞാൻ കുശലം ചോദിച്ചു,

ഓഹോ, അപ്പോഴേക്കും എന്നെ മറന്നു അല്ലെ,ഇതാണ് മനുഷ്യരുടെ കാര്യം,ഞാൻ പാറ്റാദികേശൻ,

അപ്പോഴാണ് ഞാൻ ഓർത്തത്‌ പാറ്റകൾ കുശലം പറയാറില്ല,

പാറ്റാദി പറഞ്ഞു, ഞാൻ പേടിച്ചാണ് അകത്തേക്ക് നോക്കിയത്,ഈ സമയത്ത് ലൈറ്റ് കണ്ടപ്പോൾ നിങ്ങടെ ആ ഇളയ സന്തതി ആയിരിക്കും എന്നാണ് വിചാരിച്ചത്, അവൻ ആണെങ്കിൽ ഇപ്പൊ ബുക്ക് എടുത്തെറിഞ്ഞ്‌ എന്റെ തല തെറിപ്പിച്ചേനെ , പരട്ട ചെറുക്കൻ,

പാറ്റാദി അകത്തോട്ടു വരൂ ,ഞാൻ പറഞ്ഞു, അവരൊക്കെ ഉറങ്ങാൻ പോയി

അത് വേണ്ട നിങ്ങൾ പുറത്തോട്ടു വന്നാൽ മതി ,ഒരാളെ കൂടെ പരിചയപ്പെടുത്താം,കുറെ ദിവസമായി വിചാരിക്കുന്നു,പാറ്റാദി തലയും കൊമ്പും പിൻവലിച്ചു,

അതാരാപ്പാ പരിചയപ്പെടാൻ വന്നത്,ഞാൻ വാതിൽ തുറന്നു പുറത്തേക്കിറങ്ങി ,

ഹലോ അണ്ണാ വണക്കം, ഒരു ശബ്ദം,ഇരുട്ടത്ത്‌ പാറ്റാദിയുടെ അടുത്തായി ഒരു രൂപം,ഒരു കൂറ്റൻ പെരുച്ചാഴി,

ഞാൻ ഒന്ന് മുകളിലേക്ക് ചാടി,എന്റമ്മോ,

പാറ്റാദി പറഞ്ഞു ,പേടിക്കണ്ട,ഒന്നും ചെയ്യില്ല,നല്ല സ്വഭാവം ഉള്ള പെരുച്ചാഴി ആണ് .

അപ്പോൾ പാറയിൽ ചിരട്ട ഇട്ടു ഉരക്കുന്ന ശബ്ദത്തിൽ ആ പെരുച്ചാഴി പറഞ്ഞു,

എന്റെ പേര് എലികേശി മണ്ണുമാന്തി പെരുമാൾ മൂന്നാമൻ,

ഞാൻ കണ്ണ് തള്ളി, എന്തൊരു പേര് , അങ്ങനെ ആണ് എലികൾക്ക് പേരിടുന്നത് പോലും,

എന്നെ കണ്ടതായി ഓർമ ഉണ്ടോ?എലികേശി ചോദിച്ചു,

ഞാൻ പറഞ്ഞു ഇല്ല,ഞാൻ പെരുച്ചാഴികളെ കണ്ടാൽ അപ്പൊ സ്ഥലം വിടും.

അതെന്തിന് ഞങ്ങൾ പിടിച്ചു വിഴുങ്ങുമോ? എലികേശി ക്ഷുഭിതനായി. ഡോ മനുഷ്യാ.

ഞാൻ ഞെട്ടി,പാറ്റാദീ ,ഞാൻ വിളിച്ചു,ഇങ്ങനെ ആണെങ്കിൽ ഞാൻ പോണു,

അതെന്ത് താൻ മനുഷ്യൻ അല്ലെ? അങ്ങനെ വിളിച്ചപ്പോൾ ദേഷ്യം വരുന്നത് എന്തിന്? എലികേശി ചോദിച്ചു,

ന്യായമായ ചോദ്യം ,പാറ്റാദിയുടെ സപ്പോർട്ട്,

പുലിവാൽ ആയല്ലോ ഇത്, നേരം പാതിരാ ആവാറായി, ആൾക്കാർ ആരെങ്കിലും കണ്ടാൽ എനിക്ക് വട്ടാണെന്നല്ലേ കരുതു,

മിസ്റ്റർ അജോയ്,ഞാൻ ആരാണെന്നറിയാമോ,എലികേശി ശബ്ദം ഉയർത്തി,നിങ്ങൾ കാരണം,വീടും,വീട്ടുകാരും എല്ലാം നഷ്ട്ടപ്പെട്ട ഒരു പാവം പെരുച്ചാഴി രാജകുമാരൻ,

എലികേശി മീശ വിറപ്പിച്ചു,പിന്നെ രണ്ടു തുള്ളി കണ്ണുനീർ പൊഴിച്ചു,

ഞാൻ ചോദിച്ചു, ഞാൻ കാരണമോ,ഞാൻ അറിയപ്പെടുന്ന ഒരു ജന്തുസ്നേഹി ആണ്,

കുന്തുസ്നേഹി ...മിണ്ടിപ്പോകരുത്‌, എല്ലാം വെറും അഭിനയം,ഈ വീടിനു പുറകിൽ ഉള്ള ആ കുറച്ചു സ്ഥലത്തെ മണ്ണിൽ ആണ് ഞാൻ കുടുംബസമേതം പാർത്തിരുന്നത്, എത്രയോ കാലം,പൂർവികരുടെ മണ്ണായിരുന്നു അത്.....പൂർവികരുടെ.....

എലികേശി അവിടെ ഉള്ള ഒരു ചെടിയിൽ പിടിച്ച് ഒരു മിനിറ്റ് വിദൂരതയിലേക്ക് നോക്കി നിന്നു

പിന്നെ തിരിഞ്ഞ് ഇങ്ങനെ തുടർന്നു,താനും തന്റെ കുടുംബവും വന്ന ശേഷം....എടേ പാറ്റാദി നീ കൂടെ കേൾക്കാൻ ആണ് ഞാൻ ഇത് പറയുന്നത്,

എങ്ങോട്ടോ വായും നോക്കി നിന്ന പാറ്റാദിയുടെ തലക്കിട്ടു ഒന്ന് കൊടുത്തു എലികേശി,

എന്താ ..എന്താ.. പാറ്റാദി ചോദിച്ചു

ഡേയ് എന്റെ പൂർവികർ എത്രയോ കാലമായി അധ്വാനിച്ച മണ്ണാണ് ഈ വീടിനു പുറകിൽ ഉണ്ടായിരുന്നത് ,അറിഞ്ഞൂടെ,

അറിയാം.. അറിയാം ,പാറ്റാദി തലയാട്ടി,

വല്ല വിധവും ഞങ്ങൾ അധ്വാനിച്ച് രാവ് പകലാക്കി ഒരു ലോറി ലോഡ് മണ്ണ് പുറത്തു കൊണ്ട് വന്നാൽ ഉടനെ ഇയാളും ഭാര്യയും ജോലിക്കാരിയും കൂടെ കാലത്ത് അത് മുഴുവൻ ആ കുഴിക്കകത്തു തന്നെ ഇട്ടു മൂടി കളയുമായിരുന്നു ,അല്ലെ കൂവേ.ഓർമയില്ലേ?

ഞാൻ ഒന്നും മിണ്ടാതെ നിലത്തു നോക്കി നിന്നു,

പാറ്റാദീ തനിക്കറിയില്ലെടോ എന്റെ വേദന,തനിക്കറിയില്ല ,ഒരു ദിവസം എവിടെയോ വെളിയിൽ തെണ്ടാൻ പോയ ഞാൻ തിരികെ വരുമ്പോൾ കണ്ട കാഴ്ച,എന്താണെന്നറിയാമോ?

എന്താണ് ?പാറ്റാദി ചോദിച്ചു,

ആ മൊത്തം മണ്ണും അടിയിലെ എന്റെ വീടും എല്ലാം മങ്ക്രീറ്റ്‌ ഇട്ടു വെച്ചിരിക്കുന്നു,

മങ്ക്രീറ്റ്‌ അല്ല എലികേശി ,കോണ്‍ക്രീറ്റ് ആണ് ,ഞാൻ തിരുത്തി,

പോകുവേ, അതാണ് തനിക്ക് ഇപ്പൊ പ്രധാനം ,എന്ത് കുന്തമെങ്കിലും ആവട്ടെ,അത് ഇട്ടു വെച്ചിരിക്കുന്നു,ചങ്കു പിടഞ്ഞു പോയെടോ ,പിടഞ്ഞു പോയി, ,ഭാര്യയും ആറു മക്കളും ആണ് അടിയിൽ ഓം ശാന്തി ഓശാന ആയത്,അറിയമോടോ .....എലികേശി അലറി ,

അച്ചച്ചച്ചോ,അതെന്ന്, ഞാൻ അറിഞ്ഞതെ ഇല്ലല്ലോ?പാറ്റാദി മൂക്കിൽ കൈ വെച്ച് എരിതീയിൽ എണ്ണ ഒഴിച്ചു.

ഞാൻ ചുറ്റും നോക്കി,വല്ല പൂച്ചയും ഒന്ന് വന്നെങ്കിൽ,രക്ഷപ്പെടാമായിരുന്നു,

ഇങ്ങോട്ട് നോക്കെടോ, ഗദ്ഗദത്തോടെ എലികേശി തുടർന്നു, അന്ന് ഞാൻ ഒരു ഭ്രാന്തനെ പോലെ ആ മങ്ക്രീറ്റ്‌ തറയിൽ തലയിട്ടടിച്ചു,ഭാര്യയെയും മക്കളെയും ഓർത്തു കരഞ്ഞു,

അത് പിന്നെ ...എലികേശി,ഡ്രെയിനെജിൽ ഒക്കെ മണ്ണ് നിറഞ്ഞപ്പോ ഞങ്ങൾ,

നിങ്ങൾ? എടൊ നിങ്ങൾ ഉടനെ അങ്ങ് അതെല്ലാം മങ്ക്രീറ്റ്‌ ഇട്ടു മൂടുമോ? എടൊ ഇങ്ങനെ ആണെങ്കിൽ ഈ ലോകത്ത് ചെടികൾ എങ്ങനെ വളരും,മഴവെള്ളം എവിടെ ഇറങ്ങും, എലികൾ,മണ്ണിര,വണ്ടുകൾ,എല്ലാം എവിടെ ജീവിക്കും? പറയെടോ?

ദൈവമേ ഈ എലികേശി ആള് കൊള്ളാമല്ലോ.എലികളിലെ സുഗത കുമാരിയോ?

അപ്പോൾ എലികേശി പറഞ്ഞു,എടൊ എന്റേത് നല്ല മനസാടോ,എലിപ്പുര അമ്മച്ചി എന്നെ അനുഗ്രഹിച്ചു,അറിയാമോ? താൻ ഇവിടെ ഈ മങ്ക്രീറ്റ്‌ ഇട്ടപ്പോൾ എന്റെ ഭാര്യയും മക്കളും എല്ലാം കൂടെ വെപ്രാളപ്പെട്ടു ഓടി വലിയ ഒരു ഓടയിൽ പോയി വീണു,അത് വഴി കരമനയാറ്റിലും,നല്ല മഴ കാരണം ഒഴുകി ഒഴുകി നെയ്യാറ്റിൻ കരയിൽ എത്തി,ഇപ്പൊ അവിടെ ആണ് താമസം,എങ്ങനെ തിരികെ വരണം എന്നറിയില്ല, ഈ ജന്മം തമ്മിൽ കാണാൻ പറ്റുമോ എന്നും എന്നറിയില്ല,സാരമില്ല,എവിടെ ആയാലും വല്ല എലിക്കെണിയിലും ചെന്ന് പെടാതെ ജീവിക്കുന്നു എന്നറിഞ്ഞാൽ മതി,

എലികേശി മൂക്ക് തുമിച്ച് തോളിൽ തൂക്കിയ സഞ്ചിയിൽ തുടച്ചു, ഏതായാലും ഞാൻ ഈ അനീതിക്കെതിരെ പ്രവർത്തിക്കാൻ തീരുമാനിച്ചു,ഇപ്പോൾ തന്നെ പണ്ട്രണ്ടു മണിക്ക് മീറ്റിംഗ് ആണ്,നഷ്ട്ടപ്പെടുന്ന നമ്മുടെ മണ്ണും,പുനരധിവാസവും എന്ന വിഷയത്തിൽ പെരുച്ചാഴികളുടെ മീറ്റിംഗ്,തന്നോട് ഇത്രയും പറയണം എന്നുണ്ടായിരുന്നു,പറഞ്ഞു ,തീർന്നു,

പിന്നെ ഒരു കാര്യം കൂടി ,ഈ കള്ളന്മാരെയും രാഷ്ട്രീയക്കാരെയും എല്ലാം നിങ്ങൾ ഈ പെരുച്ചാഴി, തൊരപ്പൻ എന്നൊന്നും ദയവു ചെയ്തു വിളിക്കരുത്,ഞങ്ങൾ തുരക്കുന്നതു ജീവിക്കാൻ വേണ്ടി ആണ്,ഞങ്ങളെ ഇങ്ങനെ നാണം കെടുത്തരുത്,അത് നിങ്ങൾ ഒന്ന് എഴുതണം,

ഞാൻ പറഞ്ഞു ഞാൻ എഴുതിയിട്ട് കാര്യമൊന്നുമില്ല,അതൊക്കെ വല്ല എം ടീ വാസുദേവൻ‌ നായർ സാർ ഒക്കെ എഴുതിയാലേ പറ്റു,

അതൊന്നും എനിക്കറിഞ്ഞൂടാ,താൻ ഒന്ന് എഴുത്, നമുക്ക് നോക്കാം,അപ്പൊ പിന്നെ കാണാം,കേട്ടോ അജോയ്ബൂർഷ്വാ,കപട ജന്തുസ്നേഹീ ,തനിക്കു ഒരു കടി കൂടി തരണം എന്ന് വിചാരിച്ചിരുന്നതാണ്,പിന്നെ പോട്ടെ,ഇത്തവണ വെറുതെ വിടുന്നു,പോട്ടെ പാറ്റാദി,

എലികേശി ഒരു ഓട്ടത്തിന് അപ്രത്യക്ഷനായി

ഞാൻ ദീർഘനിശ്വാസം വിട്ടു ,നല്ല ചതി ആയിപ്പോയി പാറ്റാദി, ഈ എലികെശിയെ ഇവിടെ വിളിച്ചോണ്ട് വന്നത്,അതിന്റെ വായിൽ ഇരിക്കുന്നതെല്ലം കേട്ടു,

അപ്പോൾ പാറ്റാദി പറഞ്ഞു,അത് വിട് സാറെ ,അകത്തു വല്ലതും ഇരിപ്പുണ്ടാ,വല്ലാത്ത ക്ഷീണം,

ഹോ മണി പന്ത്രണ്ടായി,ഞാൻ അകത്തു കയറി കഴുകാൻ വെച്ചിരുന്ന ഗ്ലാസിൽ നിന്നും ബക്കാർഡി നാലഞ്ചു തുള്ളി പാറ്റാദിക്ക് ഒഴിച്ചു കൊടുത്തു,ഒറ്റ വലിക്കു പാറ്റാദി അത് തീർത്ത് ചിറി തുടച്ചു,ഉടനെ മാറിയല്ലോ സ്വഭാവം,

ഡോ മനുഷ്യ,പാറ്റാദി പറഞ്ഞു,തനിക്കു അത് നിസാഴം ,അവന്റെ വീഴ് പോയി,ബാഴ്യ പോയി, മക്കൾ പോയി,അത് അവൻ പഴഞ്ഞപ്പൊ തനിക്കു കേക്കാൻ വയ്യ,ചെയ്യാം,കേക്കാൻ വയ്യ,ഹേ ഭഗവാൻ,സബ് തെഴീ മായാ, പാറ്റാദി ഉറക്കെ പറഞ്ഞു,

പാറ്റാദി ,പ്ലീസ് സീൻ ഉണ്ടാക്കരുത്,

ഒണ്ടാക്കും,ഞാൻ സീൻ ഒണ്ടാക്കും,ഏഴോ,താൻ എന്ത് മനുഷ്യനാഡോ? ആ ജോലിക്കാരി മായ,ലവൾ എന്നും കാലത്ത് ആ ഹിറ്റ്‌ എടുത്തു കീച്ചോ കീച്ചോ എന്ന് ഞങ്ങടെ മോന്തക്ക് അടിച്ചു തള്ളുമ്പോൾ ,താൻ ഒന്നും മിണ്ടാതെ ഇരുന്നു പേപ്പർ വായിക്കും,

ഡീ നിഴുത്തെടീ നിന്റെ ഹിറ്റടി എന്ന് പഴഞ്ഞൂടെടോ? അപ്പൊ തനിക്കും പാറ്റകൾ ചാവണം,എലികൾ ചാവണം,എല്ലാ ജന്തുക്കളും ചാവണം,പക്ഷെ കോഴി വേണം,ആട് വേണം,മാട് വേണം,എന്തിന്? തനിക്കു വിഴുങ്ങാൻ, അങ്ങനെ തനിക്കും കുടുംബത്തിനും ഷുഖമായി ജീവിക്കണം,അല്ലെ,ഏഴോ ,അജൊഴ്, പഴ ,പഴയെദൊ, ഉത്തഴം പഴ,

പാറ്റാദി ആടിയാടി നിലത്തിരുന്നു, പിന്നെ ടപ്പ്‌ എന്ന് പറഞ്ഞു ബോധം കേട്ടു പുറകിലേക്ക് മറഞ്ഞു വീണു,ഫുൾ ഫിറ്റ്‌, ഞാൻ പതുക്കെ പാറ്റാദിയെ കൊമ്പിൽ തൂക്കി എടുത്തു അകത്തു മേശപ്പുറത്തു ഒരു ന്യൂസ്‌ പേപ്പർ വിരിച്ച് അവിടെ കിടത്തി,ലൈറ്റ് ഓഫ് ചെയ്തു ഫാനും ഓണ്‍ ചെയ്ത ശേഷം ഉറങ്ങാനായി മുകളിലേക്ക് പോയി