ജീവിതം

ഓട്ടത്തോടോട്ടം നെട്ടോട്ടം
ഓരോ കുതിപ്പിലും
അവരോർത്തു
നാളെ മുതൽ ഞങ്ങൾ ജീവിക്കും

കൂടുതൽ വേഗത്തിൽ
ഏറ്റവും ശക്തിയിൽ
ഓട്ടം തുടർന്നു

പക്ഷെ വഴികൾ നീളെ നീളെ
വളഞ്ഞു പുളഞ്ഞ്
അന്തമില്ലാതെ പിന്നെയും

കുന്നുകളും മേടുകളും താണ്ടി
ഇടവഴികളും പുൽമേടുകളും താണ്ടി
അവരോടിക്കൊണ്ടേ ഇരുന്നു
ഓടുന്ന തിരക്കിൽ അവർ
ചുറ്റുമുള്ളതോന്നും കണ്ടില്ല

പുലരി കണ്ടില്ല
പൂക്കളെ കണ്ടില്ല
മണ്ണിനെ കണ്ടില്ല
മനുഷ്യനെ കണ്ടില്ല
ഇന്നലെകളിൽ നിന്നും
ഒന്നും പഠിച്ചില്ല
ഇന്നിനെ അറിഞ്ഞില്ല

ഒടുക്കം ഒരിക്കലവർ
ഓടിത്തളർന്നു
കിതച്ചുകൊണ്ടവർ
തിരിഞ്ഞു നോക്കി
ഞെട്ടലോടെ അറിഞ്ഞു
താണ്ടിയ ദൂരമൊന്നും
ദൂരമായിരുന്നില്ല !!

സമയവും അവർക്കൊപ്പം
നിന്ന് കിതച്ചു

അവസാന നിമിഷത്തിൽ
അവർ തിരിച്ചറിഞ്ഞു
ജീവിതമെന്നാൽ ഇന്നലെയോ
നാളെയോ അല്ല
അത് ഇപ്പോഴാണ്
'ഇപ്പോൾ' മാത്രം !

വന്ദന 🖌