ചികിത്സ

ഇത്തവണ നാട്ടിൽ വന്നപ്പോളാണ് കേരളത്തിലുള്ള ഒരു പ്രശസ്തമായ ആയുർവേദ ചികിത്സ നടത്തുന്ന ആശുപത്രിയിൽ പോകാൻ പ്ലാൻ ഇട്ടത്. ഞാനും അമ്മയും പോകാമെന്നു തീരുമാനിച്ചു. അങ്ങനെ ട്രെയിനിലും പിന്നെ ബസിലുമൊക്കെ വലിഞ്ഞു കയറി ഞങ്ങൾ സ്ഥലത്തെത്തി.

ഒരു ആശുപത്രിയുടേതായ ഒരു ലക്ഷണവുമില്ലാത്ത സ്ഥലം. പ്രകൃതിരമണീയമായ ചുറ്റുപാട്, അടുത്തുതന്നെ അമ്പലം അങ്ങനെ മനസ്സൊന്നു സ്വസ്ഥമാക്കാൻ പറ്റിയ ഇടം. പല നാടുകളിൽ നിന്നും വന്നവർ ഉണ്ട് അവിടെ, പല ഭാഷകൾ സംസാരിക്കുന്നവർ. ഡോക്ടറിനെ കാണുവാൻ വൈകും എന്നറിഞ്ഞപ്പോൾ ചുറ്റുപാടൊക്കെ ഒന്ന് നിരീക്ഷിക്കാൻ ഞാനും അമ്മയും ഇറങ്ങിപ്പുറപ്പെട്ടു.

അങ്ങനെ അവിടേം ഇവിടേം ഒക്കെ നടന്ന ക്ഷീണത്തിൽ അവിടെ സജ്ജീകരിച്ചിരിക്കുന്ന ചെറിയൊരു പാർക്കിലെ ആല്മരത്തണലിൽ ഞങ്ങളിരുന്നു.പതിയെ വന്നു നമ്മളെ തഴുകിപ്പോകുന്ന ഇളം കാറ്റ്, ഞങ്ങളിരിക്കുന്നതിന്റെ കുറച്ചുമാറി മറ്റൊരു സ്ത്രീയും ഇരിപ്പുണ്ടായിരുന്നു. സമയം കൊല്ലാൻ വെറുതെ കുത്തിയിരിക്കുന്ന മൂന്ന് സ്ത്രീകൾ അങ്ങനെ ഒത്തുചേരുന്നു. പിന്നെ പരിചയപ്പെടലായി അന്വേഷങ്ങളായി അങ്ങനെ അങ്ങനെ....

കാനഡയിൽ നിന്നും ചികിത്സക്കായി നാട്ടിലേക്ക് വന്നതാണവർ.ചികിത്സാന്നു പറഞ്ഞാൽ ആദ്യപ്രസവം കഴിഞ്ഞതിന്റെ ക്ഷീണം മാറ്റാനുള്ള ഒരു സുഖചികിത്സ. കുഞ്ഞിനെ വീട്ടിൽ അമ്മയുടെ അടുത്തേൽപ്പിച്ചാണവർ വന്നിരിക്കുന്നത്. സംസാരത്തിനിടയിൽ മുഴുവൻ അവർ കാനഡയെ വല്ലാണ്ട് പുകഴ്ത്തുന്നുണ്ട്. അവരുടെ അഭിപ്രായത്തിൽ ഇന്ത്യ തനി കൺട്രി പ്ലേസ് ആണ്, ഗുഡ് ഫോർ നത്തിങ് കൺട്രി .

അങ്ങനെ സംസാരമൊക്കെ തുടരുന്ന കൂട്ടത്തിൽ 'അമ്മ അവരോട് ചോദിച്ചു,

"അല്ല അപ്പൊ പ്രസവമൊക്കെ നാട്ടിലായിരുന്നു?"

കാനഡ: ഏയ് അതൊക്കെ കാനഡേലാരുന്നു, അതാ സേഫ് അവിടെ ഇവിടത്തെപ്പോലെ അല്ല ഡെലിവറിന്നൊക്കെ പറഞ്ഞാൽ സൊ സിമ്പിൾ ആണ്.

'അമ്മ:അവിടപ്പോ പത്തു മാസമല്ലേ?

കാനഡ : യ്യോ അതല്ല ഇവിടുത്തെ പോലെ അല്ല, ഹോസ്പിറ്റലിലൊക്കെ ഭയങ്കര ഫെസിലിറ്റീസ് ആണ്, അവിടൊക്കെ പ്രസവത്തിന്റെ തലേന്ന് വരെ കൂളായിട്ട് നടക്കും, ഇവിടെ ബെഡ് റസ്റ്റ്, ചുമ്മാ കൊറേ ടാബ്ലറ്റ്സ് ഹോ ഇറ്റ്ഈസ് ടൂ കോംപ്ലിക്കേറ്റഡ്

'അമ്മ: ആഹ് ആരാ പറഞ്ഞെ ദെയ് ഈ ഇരിക്കുന്നതെ എന്റെ മോളാ ഇവള് വയറ്റിലുള്ള സമയത്തു വീട്ടിലെ എല്ലാ ജോലിയും ഞാൻ തനിച്ച ചെയ്തോണ്ടിരുന്നേ, ഒരു ദിവസം തുണി അലക്കിക്കൊണ്ടിരുന്നപ്പോ ഒരു ചെറിയ വേദന തോന്നി ഉടുത്തിരുന്ന സാരിയിലാ ചെന്നപ്പോളാ പറയുന്നേ പ്രസവവേദനേടെ തുടക്കമാണ് ന്നു, പിന്നെ ദാന്നു പറയുന്ന സമയത്തിനുള്ളിൽ ഒക്കെ കഴിഞ്ഞു.

ഹോ എന്നെ സൂപർ കൂൾ ആയി പെറ്റ കഥ പറയുകയാണ് 'അമ്മ. കൂൾ പ്രസവം അങ്ങ് കാനഡേല് മാത്രല്ല ഇങ്ങു ഇൻഡിയേലും നടക്കും . കാനഡ എന്ത് പറയുമെന്ന് ഓർത്തു ഇരിക്കുവാണ്.

കാനഡ : പിന്നെ ബേബി ബോയ് ആണോ ഗേൾ ആണൊന്നൊക്കെ അവിടെ നേരത്തെ അറിയാൻ പറ്റും, ഇവിടെ അത് ലീഗലി അറിയാൻ പറ്റില്ലല്ലോ ഗേൾ ആണെന്ന് അറിഞ്ഞാൽ അബോർട് ചെയ്തു കളയുന്നവർ ആണല്ലോ ഇവിടെ കൂടുതലും,

'അമ്മ വിടാൻ ഭാവമില്ല,

'അമ്മ: അതൊക്കെ തലക്കുവിവരമില്ലാത്ത ചിലര് ചെയ്യുന്ന പണിയല്ലേ, കേൾക്കണോ രണ്ടാമത് ഗര്ഭിണിയായപ്പോ ബുദ്ധിമുട്ടുകൾ കാരണം വേണ്ടാന്നു വെയ്ക്കണോന്നു വിചാരിച്ചു ഇരുന്നപ്പോ എന്റെ ഭർത്താവ് പറഞ്ഞത് ഇതൊരു പെങ്കൊച്ചായിരിക്കും, പെങ്കൊച്ചിനെ വളർത്തുന്ന സുഖം ഒന്ന് വേറെയാണ്ന്നു. അങ്ങനെ ഉണ്ടായത ധാ ഇവൾ,

അത് ശരി എന്റെ പിറവിക്കു പിന്നിലെ കഥകൾ ഓരോന്നായിങ്ങനെ ചുരുളഴിയുകയാണ്.

"എങ്ങനെ പ്രസവിച്ചാലും മക്കളെ നല്ലത് പോലെ വളർത്തണം അതിലാ കാര്യം, അതിപ്പോ കൂളായിട്ട് പ്രസവിച്ചാലും അല്ലേലും ശരി"

ഇത് പിടിച്ചിടത്തു നിക്കില്ലന്നു മനസിലായ കാനഡ പതിയെ സ്കൂട്ടായി. സംസാരിച്ചു വേസ്റ്റാക്കിയ എനർജി റീഫിൽ ചെയാൻ ഒരു ബൂസ്റ്റ് കുടുക്കാൻ ഞങ്ങൾ നേരെ ക്യാന്റീനിലേക്കും വച്ചുപിടിച്ചു.

by: Anjali Kini