വാർത്താലേഖകൻ

വാർത്താലേഖകൻ
--------------------------------®

കരയും നേരംപോലും
പൊഴിയും മിഴി നിന്റെ
കരളിൽ നോക്കി കള്ള-
ച്ചിരിതൂകുന്നതെന്തേ..?

ചോദിച്ചുപോയി ഞാനാ-
വാർത്താലേഖകനോട്
ഇരതൻ ദുരിതങ്ങൾ
മുന്നിൽക്കണ്ടരിശത്തിൽ

വിടരുംമുമ്പേ തന്നെ
കൊഴിയും കുസുമത്തെ
വിറ്റു കാശാക്കുന്നതിൻ
ഗൂഢതന്ത്രത്താലാണോ..?

ദൈന്യമാം മൊഴിക്കൂടിൻ
കരളും തുരന്നു നീ
മഴു വച്ചിരിയ്ക്കയാണ-
യൊരുമോഹത്തിൻ വേരിൽ..?

സത്യത്തിൻ പുലബന്ധ-
മെത്തിനോക്കാത്ത വാർത്ത
തത്വത്തിൽ ചമയ്ക്കുമ്പോൾ
നിൻ കൈകൾ വിറയ്ക്കില്ലേ ...?

* * * * *

നോവതിൽ തെല്ലുമില്ല
ലാഭമാണെന്റെ ലക്ഷ്യം
സ്ഥാപനം തുടരുവാൻ
മറ്റേതുമില്ലാ വഴി...!

ഉണ്ടെനിക്കോരോ ലക്ഷ്യം
വാർത്തകൾ ചമയ്ക്കുമ്പോൾ
കണ്ണുനീർ ചൊരിഞ്ഞാലെൻ
കഞ്ഞി വേവുകയില്ല...!

സത്യം ഞാനെഴുതിയാൽ
തീർത്തുവായിക്കുമോ നീ..?
റേറ്റിങ്ങും, വിവാദവും
കാത്തുനിൽക്കുമീ നാട്ടിൽ..!

മാറ്റേണ്ടതെവിടെയാ-
ണോർക്കുക മനസ്സാലെ
പാഞ്ഞുനീ വരുന്നില്ലേ-
യിത്തരം വാർത്തയ്ക്കൊപ്പം..?

അന്യദു:ഖങ്ങൾ നിനക്ക-
ന്തിക്കു ചിരിയായ്
വിളമ്പും നേരത്തോർക്ക-
റേറ്റിംങ് റോക്കറ്റാകും

തേടിനീ പോകുംകാലം
വരെ,യിത്തരം കഥ
മിഴിവായ് ചമയ്ക്കുവാ-
നാളുകൾ കാണുംനാട്ടിൽ..!

ആരാണു തിരുത്തണ്ടതാ-
രാണതോർമ്മിക്കേണ്ട-
തറിവിൽ വിരാജിക്കും
മനമേ നിരീക്ഷിക്കൂ...!

ലേഖകൻ ചിരിച്ചു കൊ-
ണ്ടോതീയീ മറുമൊഴി
വാ തുറന്നിരിക്കുന്ന
പ്രതിയാമെന്നെനോക്കി..!

© രാജേഷ് ദാമോദരൻ.