ഒക്കെ ശരിയാക്കാം.

കച്ചവടം എല്ലാം പട്ടണത്തിലെ വൻകിട മാളുകളിലേയ്ക്ക് കുടിയേറിയപ്പോൾ നാട്ടുപുറത്തെ സാധാരണ
കച്ചവടക്കാരുടെ സ്ഥിതി വളരെ കഷ്ടമായി തുടങ്ങി.
കടം വാങ്ങാൻ മാത്രം നാട്ടിലെ ചെറിയ കടകളും കയ്യിൽ പണം ഉണ്ടെങ്കിൽ മാളും ഓൺ ലൈനും ആണ് ഇപ്പോഴത്തെ രീതി.
നാട്ടുപുറങ്ങളിലും സൂപ്പർ മാർക്കെറ്റുകൾ വ്യാപകമായി തുടങ്ങുകയും ചെയ്തു.

കച്ചവടം ഇല്ലെങ്കിലും ഉണ്ടെങ്കിലും രാവിലെ തന്നെ നാട്ടിലെ ചെറുകിട കടകൾ എല്ലാം പ്രവൃത്തനം ആരംഭിക്കും.
നോട്ട് ചില്ലറയാക്കാൻ വരുന്നവരും ഒപ്പം നാളെ തരാം എന്ന് പറഞ്ഞ് വരുന്നവരും പതിവ് പോലെ ആദ്യം എത്തും.
കൊടുത്തതിന്റെ പൈസ തിരികെ കിട്ടണമെങ്കിൽ അവരുടെ എല്ലാ ബുദ്ധിമുട്ടുകളും കഴിഞ്ഞാൽ മാത്രം .
അപൂർവ്വമായി ശരിയ്ക്ക് കൊടുക്കുന്നവരും ഉണ്ട്.

മുൻപ് ഉണ്ടായ ഒരു സംഭവം തമാശ പോലെ ഞാൻ ഇന്നും ഓർക്കുന്നു.
അതായത് തമിഴ്നാട് മുൻ മുഖ്യമന്ത്രി ജയലളിതയെ ആശുപത്രിയിൽ പ്രവേശിപ്പിച്ച സമയം.
മാസങ്ങളായി പണം തരാനുള്ള ഒരാളെ കണ്ടു.

എന്തായി നമ്മുടെ പണം?

തരാം....... നീട്ടി പറഞ്ഞു.

കുറെ കാലമായല്ലോ. എന്തെങ്കിലും കുറശേ തരാൻ നോക്ക്.

തരാം ന്നെ, പിന്നെ പണി കുറവാ.. ആ ജയലളിത കിടക്കുന്ന കിടപ്പ് നോക്കേയ്.
അത് ശരിയാകാതെ ബുദ്ധിമുട്ടാ.

ഏത് ജയലളിതാ?

തമിഴ്‌നാട് മുഖ്യമന്ത്രി.
ചേട്ടൻ പേപ്പർ വായിക്കാറില്ലേ?

അത് നിന്റെ ആരാ? നീയാണോ അതിന്റെ ചിലവ് വഹിക്കുന്നേ?

ചേട്ടാ തമിഴ്നാട്ടിൽ നിന്നും സാധനങ്ങൾ വരാത്ത കാരണം പണി കുറവാണ്. കുറച്ച് കഴിയും.

ജയലളിത നല്ല ആരോഗ്യം ഉള്ള സമയത്ത് വാങ്ങിയതാ ഇനി അസുഖം മാറിയാലെ പണം കിട്ടു.
ഇതിലും നല്ലത് നിനക്ക് കക്കാൻ പോകുന്നതല്ലെ?

ഒക്കെ ശരിയാക്കാം.

കൂളായി ആൾ നടന്നു പോയി.
ഒന്നും സംഭവിക്കാത്ത പോലെ.
അതെ അലമ്പില്ലാതെ കാര്യം നടക്കണമെങ്കിൽ തമിഴ്നാട് മുഖ്യമന്ത്രി സുഖം പ്രാപിക്കണം.
ഇതാണ് നാട്ടിലെ സൗഹൃദ കച്ചവട സ്ഥാപനങ്ങളുടെ അവസ്ഥ.

By: ഷാജു തൃശ്ശോക്കാരൻ
10/01/2018