തിരുവാതിരയണഞ്ഞല്ലോ!
ധനുമാസക്കുളിരുതിര്ന്നല്ലോ!
ധനുമാസക്കുളിരുതിര്ന്നല്ലോ!
തിരുവൈരാണിക്കുളത്തും തിരുവേഗപ്പുറയിലും
തൃശ്ശിവപ്പേരൂര് നടയിലുമുത്സവമല്ലോ!
തൃശ്ശിവപ്പേരൂര് നടയിലുമുത്സവമല്ലോ!
മഹിമയേറും മമ്മിയൂരിലും
മഹേശ്വരി തന് മനസ്സിലും
മഹേശന് തന് തിരുനാളിന് ഉത്സവമല്ലോ!
മഹേശ്വരി തന് മനസ്സിലും
മഹേശന് തന് തിരുനാളിന് ഉത്സവമല്ലോ!
ഉടല് പകുത്തെടുത്തീടിലും
ഉമാദേവിയും വ്രതമെടുപ്പൂ
ഉടയവന്റെ ഉയിരിനും ഉന്നതിയ്ക്കുമായ്!
ഉമാദേവിയും വ്രതമെടുപ്പൂ
ഉടയവന്റെ ഉയിരിനും ഉന്നതിയ്ക്കുമായ്!
മഞ്ഞളാടിക്കുളിയ്ക്കുന്നു
പാതിരാപ്പൂ ചൂടുന്നു
കുങ്കുമാലങ്കാരമോടെ പൂജ ചെയ്യുന്നു
പാതിരാപ്പൂ ചൂടുന്നു
കുങ്കുമാലങ്കാരമോടെ പൂജ ചെയ്യുന്നു
അപര്ണ്ണ തന് തപസ്സായി
സതീദേവി തന് ആഹുതിയായ്
ഗംഗ തന്റെ വിശുദ്ധിയായ് ശക്തിയുണരുന്നു!
സതീദേവി തന് ആഹുതിയായ്
ഗംഗ തന്റെ വിശുദ്ധിയായ് ശക്തിയുണരുന്നു!
നടരാജനൃത്തതാളം ചടുലമാകുന്നു
ശക്തി ശിവനിലലിയുന്നു
കനലെരിയും ശംഭുനയനമാര്ദ്രമാവുന്നു!
ശക്തി ശിവനിലലിയുന്നു
കനലെരിയും ശംഭുനയനമാര്ദ്രമാവുന്നു!
മംഗളദേവതയായ് മംഗല്യദായികയായ്
മഞ്ജുളാംഗിയാം മഹേശ്വരി ദര്ശനമേകുന്നു
മങ്കമാരുടെ വ്രതപൂജകള് സഫലമാകുന്നു!
മഞ്ജുളാംഗിയാം മഹേശ്വരി ദര്ശനമേകുന്നു
മങ്കമാരുടെ വ്രതപൂജകള് സഫലമാകുന്നു!
ശങ്കരധ്യാനം ജപിയ്ക്കാം
ശങ്കരീരൂപം ഭജിയ്ക്കാം
സുമംഗല്യപുണ്യത്തിനായ് പൂക്കളര്പ്പിയ്ക്കാം!
ശങ്കരീരൂപം ഭജിയ്ക്കാം
സുമംഗല്യപുണ്യത്തിനായ് പൂക്കളര്പ്പിയ്ക്കാം!
പൊന്കസവു പുടവയുടുക്കാം
കൈവളകള് കിലുക്കിച്ചിരിയ്ക്കാം
കൈകോര്ത്തൊരു ലാസ്യനടനമാടാം!
കൈവളകള് കിലുക്കിച്ചിരിയ്ക്കാം
കൈകോര്ത്തൊരു ലാസ്യനടനമാടാം!
തളിര്വെറ്റില താംബൂല മധുരമറിയാം
ഊഞ്ഞാലിലോര്മ്മകള്ക്കൊപ്പമാടാം
തിരുവാതിരയൊരാഘോഷമാക്കാം!
ഊഞ്ഞാലിലോര്മ്മകള്ക്കൊപ്പമാടാം
തിരുവാതിരയൊരാഘോഷമാക്കാം!
ആശംസകള്
രാധാസുകുമാരന്
01.01.2018
01.01.2018
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക