കാഴ്ച്ചകൾ

കാഴ്ച്ചകൾ വാരിനിറച്ചു -
കണ്ണുടയാടകൾ മൂടുന്നുവോ -
മനസിന്റെ നഗ്നതയെന്നും.

കണ്ടില്ലെന്നു നടിക്കുവാൻ നാം,
കാരണമേറെ തേടുകിൽ,
നഗ്നനാക്കപ്പെടുന്നു വീണ്ടുമവിടെ.

ജനന സ്മൃതികളിൽ മുഴുകി -
കടന്നുപോകിലും നമുക്കുചുറ്റും -
ശരണമിരക്കുന്നവരെ മറന്നിടാതെ.

കരുത്തു പകരുവാൻ കഴിഞ്ഞില്ലയെങ്കിലും -
ചെറുത് തോൽപിക്കാൻ ശ്രമിക്കാതിരിക്കുക,
അവരും പാരിതിൽ അവകാശികൾ.

സമരമുഖത്തു ഉജ്വലമായി വെറുതെ അലറുന്ന -
കോമാളിയും, കരളിൽ കരുണയില്ലാത്തവനും,
ഒരുപോലെ നികൃഷ്ടരീ മണ്ണിൽ.

സ്വാർത്ഥ താല്പര്യങ്ങൾ നെറുകയിൽ -
പൂമാലയായ് ചാർത്തുവാൻ നിങ്ങളിനിയും -
ചവിട്ടിയരക്കരുത് ഈ പാവങ്ങളെ.

നിങ്ങൾക്കായും അരക്കില്ലമൊരുക്കി -
കാത്തിരിക്കുന്നുണ്ടാകും വിധിയെന്ന -
സൂത്ര വാക്യം, കരുതിയിരിക്കുക.

ഇനിയെങ്കിലും ഓർത്തീടുക, ജനനത്തിന് -
മുൻപേ നാമെല്ലാം പാരിതിൽ പിറക്കുവാൻ -
അവകാശം തുല്യമായി വീതിച്ചിരുന്നെന്നു.

അനിലൻ.