ഏഴുമല പൂഞ്ചോല

.................................................

ഡാ ഇന്നു ശരിക്കുണ്ടോടാ ...
ഡാ നിയാണെ ഞാനാണേ മ്മടെ ഷഫീക്കാണെ സത്യായിട്ടും ഇന്നു ദൂരദർശനനിൽ രാത്രി ചിത്രഗീതത്തിൽ സ്ഫടികത്തിലെ ഏഴു മല പൂഞ്ചോല പാട്ടുണ്ട് ....
ദേ ഇത്രേം കേട്ടാ മതി എനിക്കു ...
മനുവിനു സന്തോഷമായി ...
കുറെ നാളായി ഞാനും മനുവും ഷഫീഖും ചിത്രഗീതത്തിൽ ഇതും നോക്കിയിരിക്കുന്നു ...
അങ്ങനെ ഇരിക്കുമ്പോഴാണ് ഞങ്ങളുടെ പ്രാർത്ഥന കേട്ട ദൂരദർശൻ ഇന്നത്തെ ചിത്രഗീതത്തിൽ ഈ പാട്ടു ഉൾപ്പെടുത്തുന്നത് ...
ഷഫീക്ക് ഇന്നു ക്ലാസ്സിൽ എത്തീട്ടില്ല ...
വയറു വേദന ആണെന്നാ പറഞ്ഞെ അവന്റെ വീടിന്റെ അടുത്തുള്ള ചെക്കൻ പറഞ്ഞേ ...
വൈകീട്ടു സ്കൂൾ വിട്ടു ഞാനും മനുവും സൈക്കിളെടുത്തു ഷെഫീക്കിന്റെ വീട്ടിലേക്കു കുതിച്ചു ....
ആകാംക്ഷ ഒട്ടും ചോർന്നു പോകാതെ ഞങ്ങൾ അവനോടു കാര്യം പറഞ്ഞു ...
ഷെഫീക്കിനു സന്തോഷമായി.
വൈകീട്ടു വീട്ടിലെത്തിയ ഞാൻ കുളിച്ചു ചായയൊക്കെ കുടിച്ചു വളരെ സന്തോഷത്തോടെ ടിവിയുടെ മുന്നിലേക്കു ...
ധു ത്തു ത്തു (background music ) ചിത്രഗീതം ...
നമസ്ക്കാരം ഏല്ലാവർക്കും ചിത്രഗീതം പരിപാടിയിലേക്കു സ്വാഗതം .
ആദ്യ ഗാനം മോഹൻലാൽ അഭിനയിച്ച സ്ഫടികത്തിൽ നിന്നും ....
ഹൊയ് ഹൊയ് ഹൊയ് ഹൊയ് ...
ആ ഏഴുമല പൂഞ്ചോലാലാലാ
മാമനുക്ക് മണിമാല ...
ബിഷ്യു ....
പോയി kseb ക്കാര് പണി പറ്റിച്ചു ...
വിങ്ങി പൊട്ടിയ മനസുമായി ഞാൻ അത്താഴം പോലും കഴിക്കാതെ കട്ടിലിൽ നിലം പൊത്തി ....
പിറ്റേന്നു ശനിയാഴ്ച്ച ക്ലാസ്സില്ലാത്തതിനാൽ രാവിലെ തന്നെ ഗ്രൗണ്ടിലേക്ക് വിട്ടു ...
ഞാൻ ചെല്ലുമ്പോൾ ഗ്രൗണ്ടിൽ മനുവും ഷഫീക്കും മൂകരായി
ഇരിക്കുകയാണ് ...
എന്നെ കണ്ട വഴി മനു എന്നോടു ചോദിച്ചു ...
ഇന്നലെ പാട്ടു തുടങ്ങിയപ്പോ തന്നെ കറണ്ട് പോയല്ലേ ...

ങേ നിന്റെ വീട്ടിലും പോയോ ..
പിന്നെ പോവാതെ കൊഞ്ചേടി
കൊഞ്ചേടി ഞാറ്റു മുത്തേ ദേ പോണു ...
ങേ അതെങ്ങനാടാ എന്റെ വീട്ടിലു മാമനുക്ക് മണിമാല വരെയാലോ കിട്ടീത് അപ്പോഴേക്കും വീട്ടില് പോയല്ലോ ..
ഇത് കേട്ട ഷെഫീക്ക് അവന്റെ ജിജ്ഞാസ ഞങ്ങളോട് പങ്കു വച്ചു ...
അത് ശരിയാണല്ലോ നിങ്ങടെ രണ്ടാൾടെ വീട് ഒരു രണ്ടു കുടിക്കപ്പുറമല്ലേ അപ്പൊ രണ്ടു പേരുടെയും വീട്ടിൽ ഒരേ സമയമല്ലേ പോണ്ടത് ...
ങേ ശരിയാണല്ലോ ഞാനും ഷഫീഖിന്റെ ജിജ്ഞാസയിൽ പങ്കു ചേർന്നു ...
ഡാ നമ്മുടെ ഒരേ ലൈൻ ആണു സമ്മതിച്ചു പക്ഷെ മ്മടെ വെവ്വേറെ പോസ്റ്റല്ലേ ...
മനു പറഞ്ഞത് ഞാനും ഷഫീഖും സമ്മതിച്ചു ...
അപ്പൊ നീ പറഞ്ഞത് ശരിയാ ഇവന്റെ വീട്ടില് മാമനുക്ക് മണിമാലയിൽ കരണ്ടു പോയി ആ കരണ്ടു ലൈൻ കമ്പിലൂടെ മ്മടെ സർക്കി ചേട്ടന്റെ കുടി വഴി വളഞ്ഞു വന്ന നേരം കൊണ്ട് നിന്റെ ടിവിയിൽ കൊഞ്ചേടി ഞാറ്റു മുത്ത് വരെ കിട്ടി ...
ഒരു കൊലപാതക കേസിനെ അനുസ്മരിപ്പിക്കുന്നതു പോലുള്ള ഷെഫീക്കിന്റെ കണ്ടെത്തൽ ഞങ്ങളിൽ അതിശയമുണർത്തി ...
അപ്പൊ ഷെഫീക്കെ നീയും കണ്ടില്ലേ ...
ബാപ്പ വീട്ടിലുണ്ടാർന്നു എന്നും എട്ടരയ്ക്ക് വരുന്ന ബാപ്പ ഇന്നലെ ഏഴിനു വന്നു...
വിധി അവനെയും തോൽപിച്ചു ....
ഞാവൽ പഴുത്തപ്പോ കാക്കക്കു വായ്പ്പുണെന്നു പറഞ്ഞ മാതിരിയ്യായി ഞങ്ങളുടെ അവസ്ഥ ...ഇനി അടുത്തെങ്ങും പൂഞ്ചോല ദൂരദർശനിൽ നോക്കണ്ടാ ...
ഇനിയെന്തു ചെയ്യും എന്നാലോചിച്ചിരിക്കുമ്പോഴാണ് ഷെഫീഖ് അതു പറഞ്ഞത് .
ഡാ പ്രതികരണം ...
എന്തു പ്രതികരണം ..
ഞാനും മനുവും ഒരേ സമയം പറഞ്ഞു ...
ഡാ നിങ്ങൾ ദൂരദർശനിലെ പ്രതികരണം പരിപാടി കണ്ടിട്ടില്ലേ ...
ഡാ നീ എന്താ ഉദ്ദേശിക്കുന്നെ ..
മനു നെറ്റി ചുളിച്ചു ...
ഇതു കേട്ടപ്പോൾ ഷെഫീക്ക് ഞങ്ങളുടെ മുന്നിൽ ഒരു അവതരണം ..
മാന്യ പ്രേക്ഷകർക്ക് പ്രതികരണം പരിപാടിയിലേക്കു സ്വാഗതം .
ചെങ്ങന്നൂരിൽ നിന്നും സുധി

സൂര്യ സുമേഷ് എന്നിവർ എഴുതുന്ന കത്ത് ..കഴിഞ്ഞ ആഴ്ചയിലെ എന്റെ പാചകത്തിൽ ഉള്ളി തീയൽ വെച്ചത് വളരെ മനോഹരമായിരിക്കുന്നു ...
ആദ്യമായാണ് ഉള്ളി തീയിലിട്ടു ചുട്ട് ഉള്ളി തീയൽ എന്ന വിഭവം ഉണ്ടാക്കുന്നത് കണ്ടത് ..വളരെയധികം ഈ ഉള്ളി തീയൽ ഞങ്ങളെ പുളകം കൊള്ളിച്ചു ..
വളരെ നല്ലൊരു പരിപാടിയായിരുന്നു അത് .. വരുന്ന ആഴ്ച്ച ഉള്ളിയുടെ ചേട്ടനായ സബോളയെ വെച്ചു ഈ പരിപാടി അവതരിപ്പിക്കണമെന്നു ഞങ്ങൾ അഭ്യർത്ഥിക്കുന്നു ....
നിങ്ങൾ നോക്കിക്കോ നമ്മളും
എഴുതും പ്രതികരണത്തിലേക്കു ...
എടാ ഇതൊക്കെ നടക്കോ ..
മ്മടെ പേരു വെച്ചു അതു നാണക്കേടാ മാത്രല്ലാ വീട്ടുകാരറിഞ്ഞാൽ തല പോകും ..
ഞാൻ അൽപ്പം ഭയത്തോടെ പറഞ്ഞു ...
അതൊക്കെ എനിക്കു വിട് ഞാൻ ഒരു സാംപിൾ തിങ്കളാഴ്ച ക്ലാസ്സിൽ വരുമ്പോൾ ഒരു പേപ്പറിൽ എഴുതി കൊണ്ടു വരുന്നുണ്ട് ...
തിങ്കളാഴ്ച ഷെഫീക്ക് ക്ലാസിലെത്തിയപ്പോൾ ഞാനും മനുവും സാംപിളിനെ കുറിച്ച് ചോദിച്ചു ...
ഒക്കെ റെഡിയായിട്ടുണ്ട് ഇന്ട്രെവലിനു കാണിക്കാന്നു ഷെഫീഖ് ഞങ്ങളൊടു പറഞ്ഞു ...
ക്ലാസ് ടീച്ചർ വന്നു ഹാജർ എടുത്തു ...
ടീച്ചർ ഷെഫീക്കിന്റെ ഹാജർ എടുത്തപ്പോൾ ഷെഫീക്കിനോടു കഴിഞ്ഞ ദിവസത്തെ ലീവ് ലെറ്റർ തരാൻ പറഞ്ഞു ...
ഷഫീക്ക് ബുക്കിന്റെ ഇടെന്നു ഒരു പേപ്പർ മടക്കു എടുത്തു കൊടുത്തു ...
ടീച്ചർ ലീവ് ലെറ്റർ വായിച്ചതും ഷഫീക്കിനെയും കൊണ്ട് കലിപ്പില് നേരെ പുറത്തേക്കു പോയി ..
ഞങ്ങൾക്കൊന്നും മനസിലായില്ല ...
കുറച്ചു കഴിഞ്ഞു ടീച്ചർ വന്നു എന്നെയും മനുവിനെയും കൂട്ടിക്കൊണ്ടു പോയി ...
ഞങ്ങൾ ചെല്ലുമ്പോൾ ഷെഫീക്ക് പ്രിൻസിപ്പലിന്റെ മുന്നിൽ കിടന്നു വിറക്കാണ് ..
നിങ്ങളും ഉണ്ടോടാ ഇവന്റെ കൂടെ ഞങ്ങളെ കണ്ട വഴി പ്രിൻസിപ്പൽ ചൂടായി ...
ഇല്ല സാർ ഞങ്ങൾ ഒന്നിച്ചു പറഞ്ഞു ...
അപ്പൊ ഇവൻ നിങ്ങളും ഉണ്ടെന്നാലോ പറഞ്ഞെ ...

സാറിന്റെ ഒച്ച പൊന്തി ...
ഞങ്ങൾ ഞങ്ങളില്ല സാർ ..
ഞങ്ങൾ വീണ്ടും പറഞ്ഞു ..
സത്യത്തിൽ ഞങ്ങൾക്കൊന്നും മനസിലായില്ല ...
ഉം പൊക്കോ ...
ഞങ്ങൾ തിരിഞ്ഞു നടന്നപ്പോൾ ...
പടെ പടെ നാലടി കേട്ടു ..
തിരിഞ്ഞു നോക്കിയപ്പോ ഷെഫീക്കിന്റെ ദീനമായ നോട്ടം ഞങ്ങളുടെ നേർക്കു
എന്തിനാ ?
എന്താ അവൻ ചെയ്ത കുറ്റം ?
flashback ..
അതു പറയണമെങ്കിൽ അവൻ ടീച്ചർക്ക് കൊടുത്ത ലീവ് ലെറ്റർ തുറക്കണം ...
"
പ്രിയപ്പെട്ട പ്രതികരണം പരിപാടിയിലേക്ക് ഞങ്ങൾ ഈ പരിപാടിയുടെ സ്ഥിരം പ്രേക്ഷകരാണ് ...കഴിഞ്ഞ ആഴ്ച്ച പ്രേഷേപണം ചെയ്‌ത ചിത്രഗീതത്തിൽ സ്ഫടികത്തിലെ" ഏഴു മല പൂഞ്ചോല മാമനുക്കു മണിമാല" എന്ന ഗാനം ചില കാരണങ്ങൾ കൊണ്ടു ഞങ്ങൾക്കു കാണാൻ സാധിച്ചില്ല അതുകൊണ്ടു വരുന്ന ആഴ്ചയിലെ ചിത്രഗീതം പരിപാടിയിൽ സ്ഫടികത്തിലെ "ഏഴു മല പൂഞ്ചോല" എന്ന ഗാനം ഉൾപ്പെടുത്തണമെന്നു ഞങ്ങൾ അഭ്യർത്ഥിക്കുന്നു ..
എന്ന് ...
കുറുമശേരിയിൽ നിന്നും .
സുഗതൻ (ഞങ്ങടെ പ്രിൻസിപ്പൽ )
രാധമണി (ഞങ്ങടെ ക്ലാസ് ടീച്ചർ )
ഇന്ദുമതി (ഹിന്ദി ടീച്ചർ )
സുകുമാരൻ (കണക്കു സാർ )
ലോനപ്പൻ (p t a പ്രെസിഡണ്ട് )
കവിത (ഉച്ച കഞ്ഞി വെക്കണ ചേച്ചി )..
അങ്ങനെ ഞങ്ങടെ സ്കൂളിൽ ഇപ്പൊ പഠിപ്പിക്കുന്നതും റിട്ടയേർഡ് ആയി പോയവരുടെയും ഒരു നീണ്ട നിര തന്നെ ഷെഫീക്കിന്റെ സാംപിൾ പ്രതികരണം കോപ്പിയിൽ ...
ലീവ് ലെറ്റെരെന്നും പറഞ്ഞു പഹയൻ കൊടുത്തതു മാറിപ്പോയി ...
ഇനി ഇവന്റെ ഡിസ്‌മിഷൻ ഒഴിവാക്കാൻ ഞങ്ങളും എഴുതാൻ പോവാ ...
മുഖ്യ മന്ത്രിയുടെ സുതാര്യ കേരളത്തിലേക്കു ....

Aneesh. Pt