ആദ്യത്തെ കൺമണി

ഹലോ അരുണേട്ടാ ഇത് എവിടാ ?

ഞാൻ നന്മുടെ ക്ലബ്ബിൽ ഉണ്ട് .എന്താ?

വന്നിട്ട് 2 മാസമായി ഏത് നേരവും ആ ക്ലബ്ബിൽ ആണല്ലോ. ഒന്ന് വേഗം വീട്ടിലേക്ക് ഓടി വായോ നിക്ക് ഒരു കാര്യം പറയാനുണ്ട്.

നീ എന്താ കാര്യം പറ ചുമ്മാ മനുഷ്യനെ പേടിപ്പിക്കാതെ .

അതൊക്കെ വന്നിട്ട് പറയാം. ആ പിന്നെ വരുമ്പോൾ ഒരു മസാല ദോശ കൂടി മേടിച്ചോ.

മസാല ദോശയോ ഇപ്പോഴോ? നിനക്ക് വട്ടായോ അനു.

പറ്റുമെങ്കിൽ മതി ഇല്ലേൽ പോ ആ ക്ലബ്ബിൽ തന്നെ കുത്തിയിരുന്നോ.

ഓ ഇനി അതിന് പിണങ്ങണ്ട ഞാൻ ഇപ്പോൾ വരാം ഒരു അഞ്ച് മിനിറ്റ് .

ആ എന്നാൽ വേഗം വാ.

അരുൺ ക്ലബ്ബിൽ നിന്ന് ഇറങ്ങി ഒരു മസാല ദോശയും പാഴ്സൽ വാങ്ങി നേരെ ബൈക്കുമെടുത്ത് വീട്ടിലേക്ക് തിരിച്ചു.

അനൂ അനൂ നീ ഇത് എവിടെ പോയി കിടക്ക്യാ.

ഇവിടെ തന്നെയുണ്ട്.

ഇതാ നിന്റെ മസാല ദോശ ഇനി കാര്യം പറ എന്താ?

അതൊക്കെ പറയാം എനിക്ക് ഒരു ആഗ്രഹം കൂടി ഉണ്ട് സാധിച്ചു തരണം .

ഇനി എന്ത് ആഗ്രഹം.

അരുണേട്ടൻ പോയി എനിക്ക് കുറച്ച് പച്ച മാങ്ങ വാങ്ങിച്ചു വരുവോ ?

എന്ത് ?എന്താ നീ പറഞ്ഞത് പച്ച മാങ്ങയോ? അനൂ സത്യം പറ നീ ഈ പറഞ്ഞത് സത്യമാണോ?

അതെ അരുണേട്ടാ നന്മുടെ നാലു വർഷത്തെ കാത്തിരിപ്പിനൊടുവിൽ നമ്മുക്ക് ഒരു കുഞ്ഞിക്കാല് പിറക്കാൻ പോകുന്നു .

എന്റെ അനൂ പൊന്നുമോളെ.

അരുണിന് സന്തോഷം അടക്കാൻ കഴിഞ്ഞില്ല രണ്ടു കൈകൾ കൊണ്ടും അവളെ എടുത്ത് ഉയർത്തി. ഒരായിരം ചുംബനങ്ങൾ കൊണ്ട് അവളെ പൊതിഞ്ഞു . അവളുടെ ഇരുകണ്ണുകളും നിറഞ്ഞ് ഒഴുകുന്നുണ്ടായിരുന്നു.

ഈ ഒരു വാർത്ത കേൾക്കാൻ എത്ര കാലമായിട്ട് ഞാൻ കാത്തിരിക്കുകയാണെന്ന് അറിയോ അനു.

ഞാൻ പറഞ്ഞില്ലേ ഏട്ടാ എന്റെ പ്രാർത്ഥന ദൈവം കേൾക്കാതിരിക്കില്ല എന്ന് ഈ കണ്ട കാലമെത്രയും ഞാൻ ദൈവത്തോട് ഈ ഒരു കാര്യമാണ് ആവശ്യപ്പെട്ടത്.

എന്തായാലും നിന്റെ കൃഷ്ണൻ നന്മുടെ പ്രാർത്ഥന കേട്ടൂല്ലോ? നിന്റെ വീട്ടിൽ അറിയിക്കണ്ടേ എനിക്ക് അറിയിക്കാൻ പിന്നെ സ്വന്തമെന്ന് പറയാൻ നീയല്ലാതെ ആരും ഇല്ലല്ലോ?

വേണ്ട ഏട്ടാ ആരോടും പറയണ്ട അന്ന് ഏട്ടന്റെ കൂടെ ഇറങ്ങിപ്പോന്നിട്ട് ഇപ്പോൾ നാലു വർഷമായി ഇത് വരെ മരിച്ചോ ജീവിച്ചിരിപ്പുണ്ടോ എന്ന് തിരിഞ്ഞ് നോക്കിയിട്ടില്ല.

അത് നീ എന്റെ കൂടെ ഇറങ്ങിപ്പോന്ന ദേഷ്യത്തിൽ ആവും ഞാനൊരു അനാഥനല്ലേ.

അരുണേട്ടൻ അനാഥൻ എന്ന വാക്ക് ഇനി മിണ്ടിപ്പോകരുത്. നന്മുക്ക് ആരും വേണ്ട നമ്മളും ഇനി പിറക്കാനിരിക്കുന്ന ഈ കുഞ്ഞും മാത്രം മതി.

ആ മതി അതിന്റെ പേരിൽ ഇനി വഴക്ക് കൂടി ഇന്നത്തെ സന്തോഷം മുഴുവൻ കളയണ്ട. എന്നാലും അനു കുറച്ച് വൈകിപ്പോയി ല്ലേ. ഞാൻ അടുത്തയാഴ്ച തിരിച്ച് പോകുവല്ലേ ദുബായിലേക്ക്.

അരുണേട്ടൻ ചോദിച്ചാൽ ഒരു മാസത്തെ ലീവ് കൂടി തരില്ലേ കമ്പനി.

ഇല്ല അനു ഇപ്പോൾ തന്നെ ലീവെല്ലാം തീർന്നു എന്നിട്ടും ഒരു 15 ദിവസം ഞാൻ കൂടുതൽ എടുത്തതാ ഇനി പോകാതിരിക്കാൻ പറ്റില്ല

നന്മുടെ ജീവിതത്തിലെ ഏറ്റവും പ്രധാനപ്പെട്ട നിമിഷങ്ങളിലൂടെയാണ് നന്മൾ ഇപ്പോൾ കടന്നു പോകുന്നത്.ഈ സമയം ഏട്ടൻ എന്റെ അടുത്ത് ഇല്ല എന്ന് പറയുമ്പോൾ

അനൂ നീ പേടിക്കണ്ട ഡെലിവെറിക്ക് ഇനിയും 8 മാസം ഉണ്ടല്ലോ ആ സമയത്ത് ഞാനിങ്ങ് വരില്ലേ?

ആ ഏട്ടൻ വരണം ഏട്ടനെ കാണാതെ ഞാൻ ലേബർ റൂമിലേക്ക് കയറില്ല.

ഞാൻ വരാം അനു

എനിക്ക് പേടിയാണ് ഏട്ടാ കഴിഞ്ഞ തവണ എന്റെ കയ്യിൽ നിന്നല്ലേ നമ്മുടെ കുഞ്ഞിനെ ദൈവം തട്ടിപ്പറിച്ചത്

അങ്ങിനെ ഒന്നും ഈ പ്രാവശ്യം സംഭവിക്കില്ല. ഇത് നന്മുക്ക് ഉള്ള കുഞ്ഞ് തന്നെയാണ്.ഈ സമയത്ത് നീ ആവശ്യമില്ലാത്തതൊന്നും ഓർത്ത് മനസ്സ് വിഷമിപ്പിക്കണ്ട. നീ കിടന്നോ നാളെ ആശുപത്രിയിൽ പോകാനുള്ളതല്ലേ.

സന്തോഷവും കളിയും ചിരിയുമായി ദിവസങ്ങൾ കടന്നു പോയി ഒടുവിൽ അണുണിന് പോകേണ്ട ദിവസം വന്നെത്തി.

അനു ഈ സമയത്ത് ഇങ്ങനെ കിടന്ന് കരയല്ലേ നീ. ഞാൻ പറഞ്ഞില്ലേ ആ സമയം ആവുമ്പോഴേക്കും ഞാൻ ഓടി വരില്ലേ?

അതല്ല ഏട്ടാ ഇതിന് മുൻപ് ഒന്നും പോകുമ്പോൾ ഞാൻ ഇത്ര സങ്കടപ്പെട്ടിട്ടില്ല പക്ഷേ ഇതിപ്പോ ഒരു പെണ്ണിന് ഭർത്താവിന്റെ പരിചരണം ഏറ്റവും കൂടുതൽ കിട്ടേണ്ട സമയമാണ് ഇത് ഈ സമയത്ത് ഏട്ടൻ അടുത്തില്ലാന്ന് പറയുമ്പോൾ എന്റെ ചങ്ക് പിടയുകയാണ്.

നന്മുടെ അവസ്ഥ അതല്ലേ അനു. നീ വിഷമിക്കണ്ട 7 മാസം ആവുമ്പോഴേക്കും നന്മുക്ക് ഹോം നഴ്സിനെ വെയ്ക്കാം പിന്നെ ഇപ്പോഴത്തെ കാര്യങ്ങൾ ഒക്കെ നോക്കാൻ അമ്മിണി ചേച്ചിയെ ഏൽപ്പിച്ചിട്ടുണ്ട്.

അരുണേട്ടാ എന്നാൽ ഇറങ്ങിക്കോ ഇനി നേരം വൈകണ്ട.

ഉം. ഞാൻ എത്തിയാൽ ഉടനെ വിളിക്കാം പിന്നെ എന്തെങ്കിലും പ്രയാസം തോന്നിയാൽ എന്നെ ഒന്ന് വിളിച്ചാൽ മതി ഞാൻ ബാക്കിയെല്ലാം നോക്കിക്കോളാം.

ഉം.

അരുൺ അവളെ മാറോട് ചേർത്തണച്ചു തിരുനെറ്റിയിൽ ഒരു ചുംബനം നൽകി. അരുൺ കൺമുന്നിൽ നിന്ന് നടന്ന് അകലുന്ന വരെ നിറമിഴികളുമായി അനു പൂമുഖത്ത് നോക്കി നിന്നു.

ഫോൺ വിളിയും വാട്സാപ്പും ഒക്കെയായി മാസങ്ങൾ കടന്നു പോയതറിഞ്ഞില്ല അനു വിന്റെ ഡെലിവെറി ഡേറ്റ് അടുക്കുന്തോറും അരുണിന്റെ പേടി കൂടി കൂടി വന്നു.

സുധി ഏട്ടാ മഹേഷിനെ കണ്ടോ ?

ആര് നിന്റെ പാട്നറോ?

ആ ഒരാഴ്ചയായി അവനെ കണ്ടിട്ട് വിളിച്ചാൽ ഫോൺ എടുക്കുന്നില്ല പണിക്കാർക്ക് ശബളവും കൊടുത്തിട്ടില്ല.

അല്ല അപ്പോൾ നീ എവിടാർന്നു.

ഞാൻ ഒരു മാസമായി അബുദാബിയിൽ ആയി രുന്നു. അവിടെ ഒരു സൈറ്റിൽ പണി നടക്കുന്നുണ്ട്.

ഞാനും കണ്ടിട്ട് ഒരാഴ്ച ആയി അവൻ നിന്റെ റൂമിലും ഇല്ല പിന്നെ എവിടെ പോയി.

ശ്ശേ എന്നാലും ഇവൻ പറയാതെ ഇത് എങ്ങോട്ട് പോയി.

എന്താടാ ഒരു ടെൻഷൻ എന്താ പ്രശ്നം.

സുധി ഏട്ടാ അവനെ കാണാനില്ല കമ്പനി അക്കൗണ്ടിലെ പൈസയും കാണാൻ ഇല്ല.

അരുണേ നീ എന്താടാ ഈ പറയുന്നത്

സുധിക്ക് അരുണിന്റെ വാക്കുകൾ വിശ്വസിക്കാൻ കഴിഞ്ഞില്ല.

സുധി ഏട്ടാ ഞങ്ങൾ രണ്ടും പേരും കൂടി അല്ലേ ഈ കമ്പനി തുടങ്ങിയത് എന്റെ ഇത്ര നാളത്തെ സമ്പാദ്യം മുഴുവൻ ഇതിലായിരുന്നു' ഇപ്പോൾ അവൻ അക്കൗണ്ടിലെ പൈസ മുഴുവൻ എടുത്ത് മുങ്ങി . ഇനി ഞാൻ എന്താ ചെയ്യാ സുധി ഏട്ടാ.

നീ വിഷമിക്കല്ലെടാ നമ്മുക്ക് അന്വഷിക്കാം. ഇവിടുന്ന് മുങ്ങിയാലും അവൻ നാട്ടിൽ കാണുമല്ലോ?

നാട്ടിൽ ഒക്കെ ആളെ വിട്ട് ഞാൻ അന്വഷിപ്പിച്ചു അവിടെ ഒന്നും ചെന്നിട്ടില്ല അവൻ .

ഇരു കൈകൾ കൊണ്ടും അരുൺ മുഖം പൊത്തി കരഞ്ഞു.

ഡാ നീ തളരല്ലേ നന്മുക്ക് വഴി ഉണ്ടാക്കാം.

മഹേഷിനെ തിരക്കി നടന്ന് ആഴ്ചകൾ കടന്നു പോയി. പക്ഷേ ഒരു ഫലവും ഉണ്ടായില്ല.

ഡാ അരുണേ സുധി ഏട്ടനാടാ

സുധി ഏട്ടാ പറ

നിന്റെ ക്രഡിറ്റ് കാർഡ് എവിടെ?

അതെല്ലാം അവന്റെ കൈയ്യിലാണ്.

എന്ത് പണിയാടാ നീ കാണിച്ചത്.

ക്രഡിറ്റ് കാർഡും നിന്റെ പാസ്പോർട്ടിന്റെ കോപ്പിയും വെച്ച് കമ്പനി പേരിൽ അവൻ വൻ തുക ലോണെടുത്തിട്ടുണ്ട്.

എന്റെ ദൈവമേ അടുത്തയാഴ്ച അനുവിന്റെ പ്രസവമാണ് എനിക്ക് എങ്ങിനെയെങ്കിലും നാട്ടിൽ പോകണം സുധി ഏട്ടാ.

അരുണേ ഞാൻ പറയുന്നത് കേട്ട് നീ പേടിക്കരുത് രണ്ട് മൂന്ന് ചെക്ക് കേസുകൾ കൂടി നിന്റെ പേരിൽ ഉണ്ട് പിന്നെ നിന്റെ സ്പോൺസർ നിന്റെ പേരിൽ കേസ് കൊടുത്തിട്ടുണ്ട്.

സുധിയുടെ വാക്കുകൾ മിസൈലു പൊലെ അരുണിന്റെ കാതുകളിൽ തുളച്ചു കയറി. അവന് ഭൂമി പിളർന്ന് താൻ താഴെ പോകുന്ന പൊലെ തോന്നി.

അരുണേ ഇപ്പോൾ നിനക്ക് നാട്ടിൽ പോകാൻ പറ്റില്ല ബാങ്കിൽ പൈസ അടച്ചില്ലെങ്കിൽ ഏത് നിമിഷവും നിന്നെ ദുബായ് പോലീസ് അറസ്റ്റ് ചെയ്യും.

സുധി ഏട്ടാ എനിക്ക് നാട്ടിൽ പോണം ഞാൻ അനുവിന് കൊടുത്ത വാക്കാണത്. എന്ത് ചെയ്തിട്ടാണെങ്കിലും നന്മുക്ക് ബാങ്കിലെ കാശ് അടയ്ക്കാം.

നീ എന്താ പറയുന്നേ അരുണേ ഇവിടുത്തെ ഒന്നൊന്നര ലക്ഷം ദിർഹം വേണം നാട്ടിലെ മൂന്ന് കോടി രൂപ നിന്റെ നാട്ടിലെ വീടും സ്ഥലവും വിറ്റാലും നമുക്ക് അത് അടയ്ക്കാൻ കഴിയില്ലെടാ .

സുധി ഏട്ടാ എനിക്ക് എന്റെ അനുവിനെയും കുഞ്ഞിനെയും കാണണം അരുൺ പൊട്ടിക്കരഞ്ഞു.

നീ ഇങ്ങനെ കിടന്ന് കരയാതെ ഞാൻ നിന്റെ സ്പോൺസറുമായി ഒന്ന് സംസാരിക്കട്ടെ ഇപ്പോൾ നീ റൂമിൽ തന്നെ ഇരുന്നോ പുറത്തോട്ട് ഇറങ്ങണ്ട.

ഒരു പത്തു മിനിറ്റ് കഴിഞ്ഞപ്പോഴേക്കും പോലീസ് സ്റ്റേഷനിൽ നിന്ന് വിളി വന്നു. ജീവിതം ഇവിടെ അവസാനിച്ചു എന്ന് അരുണിന് ഉറപ്പായിരുന്നു. അവൻ നേരെ ജയിലിലേക്ക് പോകുമ്പോഴും അനുവിന്റെയും തനിക്ക് പിറക്കാൻ ഇരിക്കുന്ന കുഞ്ഞിന്റെയും മുഖമായിരുന്നു മനസ്സിൽ.

മാസങ്ങൾ കടന്നു പോയി ദൈവദൂതനെ പൊലെ ഒരാൾ തന്നെ രക്ഷിക്കാൻ വരുമെന്ന വിശ്വാസമായിരുന്നു അപ്പോഴും അവന്റെ മനസ്സിൽ പക്ഷേ ആരും വന്നില്ല സുധിയേട്ടനല്ലാതെ. '

അരുണേ നിനക്ക് അറിയാലോ ഇവിടെ നാട്ടിലത്തെ ജയിലിൽ കാണാൻ വരുന്ന പൊലെ എപ്പോഴും കാണാൻ പറ്റിലല്ലോ ആ പിന്നെ അനു പ്രസവിച്ചു ആൺ കുട്ടിയാടാ .

സന്തോഷം കൊണ്ട് അരുണിന്റെ കണ്ണുകൾ രണ്ടും നിറഞ്ഞൊഴുകി.

സുധി ഏട്ടാ എന്റെ മോൻ

അവളും കുഞ്ഞും സുഖമായിരിക്കുന്നു .സുഖപ്രസവമാണ് ഒരു കുഴപ്പവുമില്ല. പിന്നെ നിന്റെ കാര്യം എല്ലാം അവളുടെ വീട്ടിൽ അറിയിച്ചു. ഹോസ്പറ്റലിൽ നിന്നും ഡിസ്ചാർജ്ജ് ആയാൽ അവർ അവളെ കൊണ്ടു പോകും അത് ഓർത്ത് നീ പേടിക്കണ്ട.

എനിക്ക് എന്റെ കുഞ്ഞിനെ ഒന്ന് കാണാൻ പറ്റുമോ?

ഇല്ലെടാ മൊബൈൽ ഫോൺ ഇങ്ങോട്ട് കടത്തിവിടിലല്ലോ. നിന്നെ പൊലെ തന്നെയാടാ ഒരു കുട്ടി കുറുമ്പൻ.

അരുൺ കവിളിലൂടെ ഒലിച്ചിറങ്ങിയ കണ്ണൂനീർ തുടച്ചു

ഇത്രയൊക്കെയാടാ എന്നേക്കൊണ്ട് ഇവിടെ നിന്ന് ചെയ്യാൻ പറ്റൂ പിന്നെ എന്റെ അവസ്ഥ അറിയാലോ മൂന്ന് കോടി രൂപ ഞാൻ എവിടുന്ന് സംഘടിപ്പിക്കാനാ

സുധി ഏട്ടൻ ഇത്രയും ചെയ്തത് തന്നെ വലിയ ഉപകാരമാണ് എങ്ങനെ നന്ദി പറയണം എന്ന് എനിക്ക് അറിയില്ല.

പ്രതീക്ഷ കൈ വിടണ്ട നിന്റെ സ്പോൺസറെ ഒന്നുകൂടി പോയി കാണട്ടെ പിന്നെ ഇവിടുത്തെ മലയാളി അസോസിയേഷനുമായി ഞാൻ സംസാരിച്ചിട്ടുണ്ട് കുറച്ച് പൈസ കൊടുത്താൽ നിനക്ക് ഒരു പക്ഷേ മാപ്പ് എഴുതി തന്നാലോ.

എവിടുന്ന് സുധി ഏട്ടാ ഇത്രയും പൈസ കൊടുത്ത് എന്നെ ആര് പുറത്തിറക്കാനാണ്.

അങ്ങിനെ ഒന്നും ചിന്തിക്കല്ലേ നീ ദൈവം ഒരു വഴി കാണിച്ച് തരാതിരിക്കില്ല.ഞാൻ എന്നാൽ ഇറങ്ങട്ടെടാ എന്തേലും വഴി കണ്ടാൽ വരാം.

ശരി സുധി ഏട്ടാ.

മാസങ്ങളും വർഷങ്ങും കടന്നു പോയി പ്രാർത്ഥനയോടെ അനുവും കുടുംബവും അരുണിന് വേണ്ടി കണ്ണീരോടെ കാത്തിരുന്നു. വിളിക്കാത്ത ദൈവങ്ങൾ ഇല്ല പോകാത്ത അമ്പലങ്ങൾ ഇല്ല പ്രാർത്ഥനയ്ക്കും വഴിപാടിനും ഒന്നും അരുണിനെ രക്ഷിക്കാനായില്ല. പിച്ചവെച്ചു നടന്ന അരുണിന്റെ ആദിക്ക് മൂന്ന് വയസ്സ് കഴിഞ്ഞു. ജയിലിലെ യാതനകൾക്കിടയിലും അരുണിന്റെ മനസ്സിൽ അവന്റെ കുഞ്ഞിന്റെ കാണാത്ത മുഖമായിരുന്നു.

നീണ്ട നാല് വർഷത്തെ കാത്തിരിപ്പിനൊടുവിൽ അവസാനം ദൈവം അനുവിന്റെ പ്രാർത്ഥന കേട്ടു .

സുധി ഏട്ടാ ഒരു പാടായല്ലോ ഇങ്ങോട്ട് വന്നിട്ട്

ഉം നിന്റെ ഈ അവസ്ഥ കാണാൻ വയ്യാത്തതു കൊണ്ടാടാ .

എന്താ ഇപ്പോ വിശേഷിച്ച്.

ഈ ദൈവം ഉണ്ട് എന്ന് പറയുന്നത് വെറുതെയല്ലെടാ നിനക്ക് മാപ്പ് എഴുതി തന്നു നിന്റെ സ്പോൺസർ ബാങ്കിലെ നിന്റെ മുഴുവൻ പെസയും അടയ്ക്കാം എന്ന് പറഞ്ഞെടാ.

അരുണിന് അവന്റെ കാതുകളെ വിശ്വസിക്കാനായില്ല.

എങ്ങനെ സുധി ഏട്ടാ എന്താ സംഭവിച്ചത്.

നിനക്ക് അറിയാലോ ഞാൻ എല്ലാ മാസവും നിന്റെ സ്പോൺസറെ പോയി കാണാറുണ്ട്. പക്ഷേ അന്നൊന്നും അയാൾ അതിന് സമ്മതിച്ചില്ല അവസാനം ഞാൻ പോയപ്പോൾ അനുവും മോനും നിനക്ക് വേണ്ടി കരയുന്ന ഒരു വീഡിയോ ഞാൻ അയാൾക്ക് കാണിച്ച് കൊടുത്തെടാ നിനക്ക് വെറെ ആരും ഇല്ല അവർ മാത്രമേ ഉള്ളൂ എന്നുള്ള നിന്റെ കഥകളെല്ലാം പറഞ്ഞു. അയാൾക്ക് മനസ്സിലായി നിന്നെ ആരോ ചതിച്ചതാന്നെന്ന്. പിന്നെ ഇത് പുണ്യ റമളാൻ മാസമല്ലേ ദൈവം അങ്ങിനെ തോന്നിച്ചുതാവും.

അരുണിന്റെ സന്തോഷത്തിന് അതിരുകൾ ഇല്ലായിരുന്നു. ഈ കണ്ട കാലം അത്രയും ഇതിന്റെ ഉള്ളിൽ കഴിഞ്ഞത് തന്റെ കുഞ്ഞിന്റെ മുഖം ഒന്ന് കാണാൻ ആയിരുന്നു. അത് സഫലമാകാൻ പോകുന്നു എന്നറിഞ്ഞപ്പോൾ അരുണിന്റെ സന്തോഷം ഇരട്ടിയായി.

ഡാ നീ പേടിക്കണ്ട പേപ്പർ എല്ലാം ഞാൻ കൊടുത്തിട്ടുണ്ട് നാളെ പുറത്ത് ഇറങ്ങാം. നേരെ എയർപോർട്ടിലേക്ക്.

സുധി ഏട്ടാ ഞാനീ അവസ്ഥയിൽ എന്റെ 'കുഞ്ഞിന് എന്തേലും വാങ്ങണ്ടേ.

അതൊന്നും നീ പേടിക്കണ്ട നീ എയർപോർട്ടിൽ എത്തുമ്പോഴേക്കും ഞാൻ അവിടെ ഉണ്ടാവും പോരെ.

സുധി ഏട്ടാ ഞാൻ ഇതിനൊക്കെ എങ്ങനെയാ നന്ദി പറയേണ്ടത്.

നീ ഒന്ന് പോടാ ഞാനല്ല നിന്നെ പുറത്ത് ഇറക്കിയത് നിന്റെ അനുവും മോനുമാണ്.

പിറ്റേ ദിവസം എയർപോർട്ടിൽ സുധി അരുണിനുള്ള സാധമെല്ലാം മേടിച്ച് നേരത്തെ എത്തിയിരുന്നു.

ആ അരുണേ നീ വേഗം പോയി ഈ ഡ്രസ്സ് ചേയ്ഞ്ച് ചെയ്യ് പിന്നെ അധികം സമയം ഇല്ല വേഗം ചെക്കിൽ ചെയ്യണം ഇവർ കറക്ട് സമയത്തെ ഇവിടെ നിന്നേം കൊണ്ട് വരൂ എന്ന് എനിക്ക് അറിയായിരുന്നു.

ഉം. ശരി സുധിയേട്ടാ.

അരുൺ ഡ്രസ്സ് ചെയ്ഞ്ച് വന്നു.

ഇപ്പോഴാടാ ഒരു മനുഷ്യക്കോലം ആയത്. വേഗം എന്നാൽ ഇനി വൈകണ്ട

അരുൺ സുധിയെ കെട്ടിപ്പിടിച്ച് കരഞ്ഞു.സുധിക്കും തന്റെ കണ്ണുനീരിനെ പിടിച്ച് നിർത്താനായില്ല .സുധി അരുണിന് ട്രോളിയും കുറച്ച് പണവും കൈമാറി. നിറകണ്ണുകളോടെ യാത്രയാക്കി.

വീടിന്റെ ഗേറ്റിനു മുന്നിൽ കാറ് വന്നു നിന്നു. അരുൺ പയ്യേ കാറിൽ നിന്ന് ഇറങ്ങി. പണ്ട് അനുവിനെ വിളിച്ചെറക്കി കൊണ്ടു പോകാൻ വന്നതാന്ന് ആ വീട്ടിൽ പിന്നെ ഇങ്ങോട്ട് കാല് കുത്തിയിട്ടില്ല. പഴയ മാർമ്മകൾ ഒരു ഞെരിപ്പോട് പോലെ അവന്റെ മനസ്സിൽ കിടന്ന് നീറി.

പതിയെ ഗെയ്റ്റ് തള്ളിത്തുറന്നു . വീടിന്റെ പൂമുഖത്തിരുന്ന് കളിക്കുന്ന ആദി മോനെയാണ് അവൻ കണ്ടത്. ഓടിച്ചെന്ന് കുഞ്ഞിനെ വാരിയെടുത്ത് ഉമ്മകൾ കൊണ്ട് പൊതിഞ്ഞു ശബ്ദം കേട്ടതും അടുക്കളയിൽ നിന്നും അനു വിളിച്ചു ചോദിച്ചു

ആദി ആരാ അത് അവിടെ.

അരുൺ അനു എന്ന് വിളിക്കാൻ ഒരുങ്ങിയപ്പോഴേക്കും ആദി വിളിച്ചു പറഞ്ഞു.

മൊബൈലിൽ അമ്മ കാണിച്ച് തരാറില്ലേ നന്മുടെ അച്ഛൻ.

അനുവിന് ആദി പറഞ്ഞത് വിശ്വസിക്കാൻ ആയില്ല അവൾ അടുക്കളിൽ നിന്ന് ഓടി പൂമുഖത്തേക്ക് വന്നു. ആദിയെ വാരിയെടുത്ത് ഉമ്മവെയ്ക്കുന്ന അരുണിനെയാണ് അവൾ കണ്ടത്.

അരുണേട്ടാ എന്ന് വിളിച്ച് മുഴുമിപ്പിക്കാനായില്ല അപ്പോഴേക്കും അവൻ അവളെ പിടിച്ച് മാറോടണച്ചിരുന്നു.

ശുഭം.

രചന: സനൽ SBT