വിത്ത്

●●●

ഞാനുറങ്ങിക്കിടക്കുന്നിതാ മണ്ണി,
ലെത്രകാലം കഴിഞ്ഞാലുമിത്തിരി 

തീർത്ഥമേറ്റാലുണർന്നിടും,കാലമെ
വാർത്തിടൂനിന്റെകണ്ണുനീർത്തുള്ളികൾ!

പാരിതിൽനൻമ പെയ്യുന്നനാളിലെൻ
വേരിലൂടെത്തലോടുന്ന സ്നേഹമേ
യാർത്തിടട്ടെ, മുളച്ചിടട്ടെയെന്റെ, 

യിഷ്ടനാളുകളാലോലമാടുവാൻ!

കാരിരുമ്പിൻ കരുത്തോടെയന്നു ഞാൻ
മാനമാകെപ്പടർന്നുല്ലസിച്ചിടും
പൂത്തിടും കായ്ച്ചിടും പിന്നെയാ,ഫലം
തീർത്തുനൽകും ധരിത്രിക്കു മാത്രമായ്!

ഓർത്തു പോകേണ്ടതൊന്നുമാത്രം ഫലം,
തീർത്തശേഷമീവിത്തുകൾ മണ്ണിലേ -
ക്കാഴ്ത്തണം, കുത്തിനോവിക്കരുതു നീ, 

കൂർത്തകല്ലിനാൽ തീർത്തിടല്ലെയെന്നേ!

രാജേഷ് ദാമോദരൻ