ചൂള

^^^^^
അവളിനി പിറക്കേണ്ടതുണ്ടോ
ആരാണവൾക്കായിടമൊരുക്കാൻ
ഇനിയൊരുകാലം കരമുയർത്താൻ
ഈർച്ചവാൾച്ചിറകുതാഴ്ത്തിയപൂവന്മാർ
ഉടലിലേറി കുഞ്ചിയിൽ കൊത്തിയാൽ
ഊമയായോരുരുവായി കിടക്കുവാൻ
ഋതുമതിയാകുന്നതിന്നേറെമുന്നേ
ഒരുങ്ങുവാനാണോ പിറക്കേണ്ടത്
ഓർമ്മയിലോമനക്കുരുന്നായ് പെണ്ണിനിനി
ഔദാര്യം നൽകുമോ ജന്മലോകം
അംഗഛേദിതപുഷ്പമായ് ഭൂമിയിൽ
അപഹാസ്യരേതസ്സിൽ തളിർക്കേണമോ
കാട്ടാളലോകത്തിൻ കാലത്തവളിനി
അരക്കെട്ടിലൊരുചൂള കരുതിപ്പിറക്കട്ടെ
ഖരമതിൽ കഠിനമാമീർച്ചവാളതിലിനി
ഉരുകിയൊലിക്കും ചൂളയുമായിനി
ഉയിരെടുക്കാനൊരു കരുത്തുമായവളിനി
തിളയ്ക്കുന്ന പെണ്ണായ് പിറന്നിടട്ടെ

VG.വാസ്സൻ