തണുപ്പ്.

---------------

നീ ഓർമ്മയുടെ സുഖമുള്ള ചൂടാവുമ്പോൾ
നിന്നെ പുതച്ചൊന്നുറങ്ങണം എനിക്ക്.

നിർത്താതെ പെയ്യുന്ന ഇന്നത്തെ രാത്രിയിൽ
നിന്നിലെ കനലെരിയിച്ച് തീ കായണം .

നിന്റെ മേനിയിൽ മിന്നാമിനുങ്ങുകൾ പോലെ
വെട്ടം മിന്നിമായുന്ന മുത്തം നല്കണം

ആശ്ളേഷത്തിലമർത്തി വരിഞ്ഞ്
അധരങ്ങളിലെ മൃദുലത ചൂടാക്കി നുണയണം.

ഇനിയും കുളിര് ആശിക്കും വിധം
മറക്കാനാവാത്ത നിർവൃതി പകർന്ന്
ഈ രാവിന്റെ ദേവതയാക്കണം.

നിന്റെ ഗന്ധത്തിൽ മയങ്ങിയുറങ്ങുമ്പോൾ
ഒരു കുഞ്ഞിനെപ്പോലെ
സ്വപ്നത്തിൽ ചിരിക്കണം.

പാതി കൂമ്പിയ മിഴികളോടെ നീ
കാണുന്നതെല്ലാം അനുഭൂതിയാക്കണം.

ഉറക്കത്തിലും ചേർത്തു പിടിച്ച്
പുലരിയുടെ സുന്ദര കാഴ്ചകളിലേക്ക്
നിന്നോടൊപ്പം ഉണരണം.

Babu Thuyyam.
15/07/18.